ĠUBLEW
STRAORDINARJU TAL-ĦNIENA
IL-PAPA
FRANĠISKU
UDJENZA ĠUBILARI
Is-Sibt
12 ta’ Marzu
2016
Ħniena
u Qadi
Għeżież
ħuti, l-għodwa t-tajba!
Qed noqorbu lejn
il-festa ta’ l-Għid, il-misteru ewlieni tal-fidi tagħna. Il-Vanġelu ta’ Ġwanni – kif smajna
– jirrakkonta li qabel ma miet u qam mill-mewt għalina, Ġesù wettaq
ġest li tnaqqax fil-memorja tad-dixxipli: il-ħasil
tar-riġlejn. Ġest li ma kinux
qed jistennew u ħawwadhom, tant li Pietru ma riedx
jaċċettah. Nixtieq nieqaf fuq
l-aħħar kelmiet ta’ Ġesù: “Tafu
x’għamiltilkom? […]
Jekk jien, li jien il-Mulej u l-Imgħallem, ħsiltilkom saqajkom, hekk
intom għandkom taħslu saqajn xulxin” (13:12,14). B’dan il-mod Ġesù juri
lid-dixxipli tiegħu li l-qadi hu
t-triq li jridu jimxu biex jgħixu l-fidi Fih u jagħtu xhieda ta’
mħabbtu. Ġesù stess applika
għalih ix-xbieha tal-“Qaddej ta’ Jaħweh” li juża l-Profeta
Isaija. Hu, li hu l-Mulej, isir qaddej!
Meta ħasel
riġlejn l-Appostli, Ġesù ried juri kif Alla jimxi magħna, u
jagħti l-eżempju tal-“kmandament ġdid” (Ġw 13:34)
tiegħu li aħna għandna nħobbu lil xulxin kif ħabbna
Hu, jiġifieri billi ta ħajtu għalina. L-istess Ġwanni dan jiktbu fl-Ewwel
Ittra tiegħu: “B’dan naslu biex nagħrfu x’inhi
l-imħabba: li Ġesù Kristu ta ħajtu għalina.
Aħna
wkoll mela għandna nagħtu ħajjitna għall-aħwa.
[…] Uliedi, ma nħobbux
bil-kliem u t-tpaċpiċ, imma bl-għemil u bis-sewwa” (3:16,18).
Mela l-imħabba hi meta konkretement naqdu lil xulxin.
L-imħabba m’hix kliem, hi għemil u qadi; qadi umli, magħmul fis-skiet u fil-moħbi, kif qal Ġesù nnifsu: “idek
ix-xellugija m’għandhiex tkun taf x’inhi tagħmel il-leminija” (Mt 6:3). Biex
naqdu, irridu nqiegħdu għad-dispożizzjoni ta’ l-oħrajn
id-doni li l-Ispirtu s-Santu sawwab fuqna, biex il-komunità kollha tista’
tikber (ara 1 Kor 12:4-11). Barra minn
hekk, il-qadi nesprimuh fil-qsim
tal-ġid materjali, biex ħadd ma jibqa’ fil-bżonn. Dan tal-qsim u ta’ l-għotja għal
min hu fil-bżonn hu stil ta’ ħajja li Alla jissuġġerixxi
wkoll lil ħafna li m’humiex Insara, bħala triq ta’ umanità awtentika.
Fl-aħħar
nett, ma ninsewx li meta ħasel riġlejn id-dixxipli u talabhom
jagħmlu l-istess, Ġesù stedinna wkoll nistqarru lil xulxin
in-nuqqasijiet tagħna u nitolbu għal xulxin biex nagħrfu
naħfru mill-qalb. F’dan is-sens,
niftakru fi kliem l-Isqof qaddis Santu Wistin meta kiteb: “In-Nisrani
m’għandux jibqa’ lura milli jagħmel dak li għamel Kristu. Għax meta l-ġisem jitbaxxa sa quddiem
riġlejn ħuh, anki fil-qalb jitkebbes, jew jekk diġà jkun hemm, jisseddaq
is-sentiment ta’ l-umiltà […] Naħfru lil xulxin il-ħtijiet tagħna u
nitolbu għal xulxin minħabba fi ħtijietna u hekk b’xi mod inkunu
naħslu riġlejn xulxin” (In Joh 58,4-5). L-imħabba, il-karità hi l-qadi,
li ngħinu lil xulxin, naqdu lil xulxin. Hemm ħafna nies li jgħaddu
ħajjithom hekk, fil-qadi ta’ l-oħrajn. Il-ġimgħa l-oħra rċivejt
ittra minn għand persuna li rringrazzjatni ta’ din is-Sena
tal-Ħniena; talbitni nitlob għaliha, biex tista’ tkun iktar qrib
tal-Mulej. Il-ħajja ta’ din
il-persuna tqattagħha tieħu ħsieb ta’ ommha u ta’ ħuha:
ommha fis-sodda, anzjana, moħħha għadu ċar imma ma tistax
tiċċaqlaq, u ħuha għandu diżabbiltà, fuq
is-siġġu tar-roti. Din
il-persuna, ħajjitha, hi qadi, il-ħin kollu tgħin. U din hi l-imħabba! Meta int tinsa lilek innifsek u taħseb
fl-oħrajn, din hi l-imħabba! U
bil-ħasil tar-riġlejn il-Mulej jgħallimna nkunu qaddejja,
iżjed: qaddejja, kif Hu sar qaddej għalina, għal kull
wieħed u waħda minna.
Għalhekk,
għeżież ħuti, li
nkunu ħanina bħall-Missier ifisser li nimxu wara Ġesù fit-triq
tal-qadi. Grazzi.
miġjuba mit-Taljan għall-Malti minn
Francesco Pio Attard