ĠUBLEW STRAORDINARJU TAL-ĦNIENA
IL-PAPA FRANĠISKU
UDJENZA ĠUBILARI
Is-Sibt 10 ta’ Settembru
2016
Ħniena u Fidwa
Għeżież ħuti, l-għodwa
t-tajba!
Is-silta li għadna kif smajna tkellimna fuq
il-ħniena ta’ Alla li titwettaq fil-Fidwa, jiġifieri fis-salvazzjoni
li ngħatatilna bid-demm ta’ Ibnu Ġesù (ara 1 Pt 1:18-21). Il-kelma
“fidwa” ftit li xejn tintuża, imma hi fundamentali għax turi l-akbar
ħelsien li Alla seta’ jikseb għalina, għall-bnedmin kollha u
għall-ħolqien sħiħ. Donnu l-bniedem tal-lum m’għadux jifraħ
jaħseb li ġie meħlus u mifdi b’għemil ta’ idejn Alla;
fil-fatt il-bniedem tal-lum moħħu mimli bil-libertà tiegħu li
biha għandu s-saħħa jaħtaf kollox taħt idejh.
Jiftaħar ukoll b’dan. Imma fir-realtà mhuwiex hekk. Kemm
illużjonijiet jinbiegħu f’isem il-libertà u kemm għamliet
ġodda ta’ jasar jinħolqu fi żmienna f’isem libertà falza! Tant u
tant ilsiera: “Jien qed nagħmel dan għax irrid nagħmlu,
nieħu d-droga għax togħġobni, jiena ħieles, jien
nagħmel din il-ħaġa jew l-oħra”. Huma lsiera! F’isem il-libertà
jsiru lsiera. Ilkoll kemm aħna rajna nies ta’ din il-qatgħa li
fl-aħħar jispiċċaw jistabtu mal-art. Għandna
bżonn lil Alla biex jeħlisna minn kull xorta ta’ indifferenza, ta’
egoiżmu u ta’ awtosuffiċjenza.
Kliem l-Appostlu Pietru jesprimi tajjeb ħafna
s-sens tal-istat ta’ ħajja ġdida li għalih aħna
msejħa. Meta sar wieħed minna, il-Mulej Ġesù mhux biss ħa
fuqu l-qagħda tagħna ta’ bnedmin, imma refagħna
għall-possibbiltà li nsiru wlied Alla. Bil-mewt u l-qawmien tiegħu,
Ġesù Kristu, Ħaruf bla tebgħa, rebaħ fuq il-mewt u d-dnub
biex jeħlisna mill-ħakma tagħhom. Hu l-Ħaruf li ġie
ssagrifikat għalina, biex aħna jista’ jkollna ħajja ġdida
magħmula mill-maħfra, l-imħabba u l-ferħ. Kemm huma
sbieħ dawn it-tliet kelmiet: maħfra, imħabba u ferħ! Dak kollu
li hu ħa fuqu ġie wkoll mifdi, meħlus u salvat. Huwa minnu li
l-ħajja ġġarrabna u xi drabi nbatu minħabba f’hekk.
Madankollu, f’dawn il-waqtiet aħna mistiedna nsammru ħarsitna fuq
Ġesù mislub li jbati għalina u magħna, bħala prova
ċerta li Alla qatt mhu sa jitlaqna waħidna. Ma rridu qatt ninsew li
fl-hemm u fil-persekuzzjonijiet, kif ukoll fit-tbatijiet ta’ kuljum aħna
dejjem meħlusa mid-driegħ ħanin ta’ Alla li jerfagħna lejh
u jwassalna għal ħajja ġdida.
L-imħabba ta’ Alla hi bla tarf:
nistgħu niskopru sinjali dejjem ġodda li juruna l-attenzjoni
tiegħu lejna u fuq kollox kemm jixtieq jilħaqna u jimxi qabilna.
Ħajjitna kollha, anki jekk mimsusa mid-dgħufija tad-dnub,
qiegħda taħt il-ħarsa ta’ Alla li jħobbna. Kemm paġni
tal-Iskrittura Mqaddsa jkellmuna fuq il-preżenza, il-qrubija u
l-ħlewwa ta’ Alla għal kull bniedem, speċjalment
għaċ-ċkejknin, għall-iżjed dgħajfa,
għall-mormija tas-soċjetà! Iktar ma nkunu fil-bżonn, iżjed
il-ħarsa tiegħu fuqna timtela bil-ħniena. Hu juri ħniena
kollha mogħdrija lejna għax jaf x’inhuma d-dgħufijiet
tagħna. Jafhom id-dnubiet tagħna u jaħfrilna; jaħfer
dejjem! Hu wisq twajjeb magħna, hu wisq twajjeb dan Missierna.
Għalhekk, ħuti, ejjew niftħu
qalbna għalih, nilqgħu l-grazzja tiegħu! Għax, kif
jgħid is-Salm, “għand il-Mulej hemm it-tjieba, u l-fidwa għandu
bil-kotra” (130:7).
miġjub
mit-Taljan għall-Malti minn Francesco Pio Attard