IL-PAPA
FRANĠISKU
UDJENZA
ĠENERALI
Awla
Pawlu VI
L-Erbgħa
30 ta’ Novembru
2016
38.
Nitolbu lil Alla għall-ħajjin u
għall-mejtin
Għeżież
ħuti, l-għodwa t-tajba!
Bil-katekeżi
tal-lum qed nagħlqu ċ-ċiklu ddedikat lill-ħniena. Imma
għalkemm il-katekeżi jispiċċaw, il-ħniena trid tibqa’!
Nirringrazzjaw lill-Mulej ta’ dan kollu u ngħożżuh fil-qalb
tagħna biex ikun ta’ konsolazzjoni u faraġ għalina.
L-aħħar
opra spiritwali tal-ħniena titlob minna li nitolbu għall-ħajjin u għall-mejtin. Magħha
nistgħu nżidu wkoll l-aħħar opra korporali tal-ħniena
li tistedinna nidfnu l-mejtin. Din
tal-aħħar taf tidher talba stramba; imma, f’xi nħawi tad-dinja
li jinsabu taħt il-madmad tal-gwerra, bil-bumbardamenti li lejl u nhar
jiżirgħu l-biża’ u vittmi innoċenti, ikollna ngħidu li
din l-opra hi attwali ħafna. Il-Bibbja għandha eżempju
l-ġmiel tiegħu ta’ dan: dak tax-xwejjaħ Tobit, li, b’riskju
għal ħajtu stess, kien jidfen il-mejtin minkejja l-ordni tas-sultan biex
ma jsirx dan (ara Tob 1:17-19; 2:2-4). Anki llum hemm min qed jirriskja
ħajtu biex jidfen lill-imsejkna vittmi tal-gwerra. Mela, din l-opra
tal-ħniena li tmiss il-ġisem mhix imbiegħda mill-ħajja
tagħna ta’ kuljum. U ġġagħalna naħsbu f’dak li
seħħ nhar il-Ġimgħa l-Kbira, meta l-Verġni Marija, ma’
Ġwanni u xi nisa kienu taħt is-salib ta’ Ġesù. Wara l-mewt
tiegħu, ġie Ġużeppi minn Arimatija, raġel għani,
membru tas-Sinedriju li kien sar dixxiplu ta’ Ġesù, u offra għalih
il-qabar ġdid li kellu, imħaffer fil-blat. Mar personalment
għand Pilatu u talbu l-ġisem ta’ Ġesù: vera opra tal-ħniena
magħmula b’kuraġġ kbir (ara Mt 27:57-60)! Għall-Insara, id-dfin
hu att ta’ pjetà, imma wkoll għemil ta’ fidi kbira. Inqiegħdu
fil-qabar il-ġisem tal-għeżież tagħna, bit-tama
fil-qawmien tagħhom (ara 1 Kor 15:1-34). Dan hu rit li baqa’ qawwi
ħafna u jinħass mill-poplu tagħna, u li jsib riżonanza
speċjali f’dan ix-xahar ta’ Novembru ddedikat b’mod partikulari
lit-tifkira u lit-talb għall-mejtin tagħna.
Li nitolbu għall-mejtin hu,
qabelxejn, sinjal ta’ għarfien għax-xhieda li ħallewlna u
l-ġid li għamlulna. Hu ringrazzjament lill-Mulej li tahomlna u
għall-imħabba u l-ħbiberija tagħhom. Il-Knisja titlob
għall-mejtin b’mod partikulari waqt il-Quddiesa. Is-saċerdot
jgħid: “Ftakar
ukoll, Mulej, fil-qaddejja tiegħek, li telqu
qabilna bis-sinjal tal-fidi li ħadu fil-Magħmudija, u qegħdin jistrieħu fir-raqda tas-sliem. Ħenn għalihom, Mulej, u agħti lilhom, u lil dawk kollha
li jistrieħu fi Kristu,
il-hena, id-dawl u s-sliem” (Kanoni
Ruman). Tifkira sempliċi, effikaċi, mimlija sinifikat, għax terħi
lill-għeżież tagħna f’idejn il-ħniena ta’ Alla.
Nitolbu b’tama Nisranija li jkunu miegħu fil-Ġenna, bit-tama li
għad nerġgħu niltaqgħu lkoll flimkien f’dak il-misteru ta’
mħabba li ma nifhmuhx, imma li nafu li hu veru għax hu wegħda li
Ġesù għamlilna. Ilkoll għad inqumu mill-ġdid u lkoll se
nibqgħu għal dejjem ma’ Ġesù, miegħu.
It-tifkira
tal-fidili mejtin m’għandha qatt tnessina wkoll li għandna nitolbu għall-ħajjin, li
flimkien magħna ta’ kuljum jaffrontaw il-provi tal-ħajja.
Il-ħtieġa ta’ din it-talba hi iżjed u iżjed ċara jekk
inqegħduha fid-dawl tal-istqarrija tal-fidi li tgħid: “Nemmen
fix-xirka tal-qaddisin”. Hu l-misteru li jesprimi l-ġmiel tal-ħniena
li wriena Ġesù. Fil-fatt ix-xirka tal-qaddisin turina li aħna lkoll
mgħaddsa fil-ħajja ta’ Alla u ngħixu fi mħabbtu. Ilkoll,
ħajjin u mejtin, aħna f’din ix-xirka, jiġifieri bħal f’għaqda;
imxierka fil-komunità ta’ dawk kollha li rċivew il-Magħmudija, u ta’
dawk li jitrejqu bil-Ġisem ta’ Kristu u jagħmlu parti mill-familja
kbira ta’ Alla. Aħna lkoll familja waħda, magħquda. U
għalhekk li nitolbu għal xulxin.
Hemm diversi modi
kif nistgħu nitolbu għall-proxxmu tagħna! Kollha tajbin u
mogħġuba minn Alla jekk isiru bil-qalb. Jiġuni f’moħħi
b’mod partikulari l-ommijiet u l-missirijiet li jbierku lil uliedhom kull
filgħodu u filgħaxija. Għad hemm din id-drawwa f’xi familji: li
tbierek lil uliedek hi talba; jiġini f’moħħi t-talb
għall-morda, meta mmorru narawhom u nitolbu għalihom;
l-interċessjoni siekta, xi drabi bid-dmugħ, f’tant sitwazzjonijiet
iebsin li għalihom nitolbu. Ilbieraħ ġie għall-Quddiesa
f’Santa Marta raġel twajjeb, negozjant. Dak ir-raġel
żagħżugħ ħa jkollu jagħlaq il-fabbrika
tiegħu għax ma jistax ikompli u qalli jibki: “Jien ma nafx kif
ħa nagħmel biex inħalli iżjed minn ħamsin familja bla
xogħol. Nista’ niddikjara l-falliment tan-negozju tiegħi: nitlaq bi
flusi, imma qalbi tibqa’ tibki ħajti kollha għal dawn il-ħamsin
familja”. Araw kif ikun Nisrani tajjeb li jitlob bl-opri: ġie l-Quddiesa
biex jitlob ħalli l-Mulej jiftaħlu triq biex joħroġ minn
dan l-isqaq, mhux biss għalih, imma għal dawk il-ħamsin familja.
Dan hu bniedem li jaf jitlob, bil-qalb u bil-fatti, jaf jitlob
għall-proxxmu tiegħu. Hi sitwazzjoni diffiċli. U mhux qed ifittex
l-aktar soluzzjoni faċli: “Imbagħad jaraw huma”. Dan hu Nisrani. Kemm
għamilli ġid nisimgħu jitkellem! U jalla hawn ħafna hekk,
illum, f’dan iż-żmien meta tant persuni qed ibatu minħabba
n-nuqqas ta’ xogħol; jiġini f’moħħi wkoll ir-radd
il-ħajr għal xi aħbar tajba dwar ħabib, qarib, kollega…:
“Grazzi, Mulej, ta’ din il-ħaġa sabiħa!”, anki hekk tkun titlob
għall-oħrajn! Tirringrazzja lill-Mulej li l-affarijiet sejrin sew. Xi
drabi, kif jgħid San Pawl, “aħna anqas biss nafu nitolbu kif imiss,
imma l-Ispirtu stess jidħol għalina bit-talb tiegħu bi tnehid li
ma jistax jitfisser bil-kliem” (Rum 8:26). Hu l-Ispirtu li jitlob fina. Mela
ejjew niftħu qalbna, hekk li l-Ispirtu s-Santu, li jgħarbel ix-xewqat
li huma fil-qiegħ nett tal-qalb tagħna, jista’ jsaffihom u
jwettaqhom. Imma għalina u għall-oħrajn ejjew nitolbu dejjem li
ssir ir-rieda ta’ Alla, bħal fil-Missierna, għax ir-rieda tiegħu
żgur li hi l-ikbar ġid, il-ġid ta’ Missier li qatt ma jitlaqna
waħidna: nitolbu u nħallu lill-Ispirtu s-Santu jitlob fina. U din hi ħaġa
sabiħa fil-ħajja: titlob billi tirringrazzja, tfaħħar lil
Alla, titolbu xi ħaġa, tibki meta tinqala’ xi diffikultà, bħal
dak ir-raġel. Imma ħa tkun il-qalb dejjem miftuħa
għall-Ispirtu biex jitlob fina, magħna u għalina.
Fl-għeluq ta’
dawn il-katekeżi fuq il-ħniena, ejjew inħabirku biex nitolbu
għal xulxin biex l-opri tal-ħniena li jmissu l-ġisem u
r-ruħ isiru dejjem iżjed l-istil ta’ ħajjitna. Il-katekeżi,
kif għidt fil-bidu, jagħlqu hawn. Għamilna mixja mal-erbatax-il opra
tal-ħniena, imma l-ħniena tibqa’ u jeħtieġ ngħixuha
b’dawn l-erbatax-il mod. Grazzi.
miġjub mit-Taljan għall-Malti minn
Francesco Pio Attard