ĠUBLEW STRAORDINARJU TAL-ĦNIENA
IL-PAPA FRANĠISKU
UDJENZA ĠUBILARI
Is-Sibt 30 ta’ April
2016
Ħniena u Rikonċiljazzjoni
Għeżież ħuti, l-għodwa
t-tajba!
Il-lum nixtieq nirrifletti flimkien magħkom
fuq aspett importanti tal-ħniena: ir-rikonċiljazzjoni. Alla qatt ma
naqas li joffri lill-bnedmin il-maħfra tiegħu: il-ħniena
tiegħu juriha minn nisel għal nisel. Spiss naħsbu li d-dnubiet
tagħna jbiegħdu lill-Mulej minna: fil-verità, meta nidinbu, aħna
li nitbiegħu Minnu, imma Hu, meta jara li aħna fil-periklu, iktar
jiġi jfittixna. Alla qatt ma jirrassenja ruħu għall-possibbiltà
li xi persuna tibqa’ barra minn imħabbtu, imma dan bil-kundizzjoni li jsib
fiha xi sinjal ta’ ndiema għall-ħażen li tkun għamlet.
Bil-qawwa tagħna waħidna ma
jirnexxilniex nirrikonċiljaw ruħna ma’ Alla. Id-dnub hu tabilħaqq
espressjoni ta’ ċaħda ta’ mħabbtu, bil-konsegwenza li
ningħalqu fina nfusna, u nitqarrqu naħsbu li nistgħu nsibu
libertà u awtonomija ikbar band’oħra. Imma ’l bogħod minn Alla ma
jifdlilniex iżjed destinazzjoni lejn xiex nimxu, u minn pellegrini f’din
id-dinja nispiċċaw niġġerrew ’l hawn u ’l hemm bla nafu
fejn sejrin. Fi kliem iżjed sempliċi u komuni spiss ngħidu li
meta nidinbu nkunu “nagħtu daharna lil Alla”. U hekk hu; id-dnub jara biss
lilu nnifsu u hekk jippretendi li jista’ jagħmel kollox waħdu;
għalhekk, id-dnub iwessa’ dejjem iżjed id-distanza bejna u bejn Alla,
u dan jista’ jsir fondoq. Madankollu, Ġesù jiġi jfittixna bħal
ragħaj twajjeb li ma jikkuntentax ruħu qabel ma jerġa’ jsib
in-nagħġa l-mitlufa, kif naqraw fil-Vanġelu (ara Lq 15:4-6). Hu
jerġa’ jibni l-pont li jgħaqqadna mal-Missier u bih nistgħu
nerġgħu nsibu d-dinjità tagħna ta’ wlied.
Bis-sagrifiċċju ta’ ħajtu reġa’ ħabbibna mal-Missier u
raddilna l-ħajja ta’ dejjem (ara Ġw 10:15).
“Ħallu lil Alla jħabbibkom
miegħu!” (2 Kor 5:20): il-karba ta’ l-Appostlu Pawlu lill-ewwel Insara ta’
Korintu, il-lum bl-istess qawwa u konvinzjoni tgħodd għalina lkoll.
Ħa nħallu lil Alla jħabbibna miegħu! Dan il-Ġublew
tal-Ħniena għal kulħadd hu żmien ta’ rikonċiljazzjoni.
Tant persuni jixtiequ jirrikonċiljaw ruħhom ma’ Alla imma ma jafux
x’jaqbdu jagħmlu, jew ma jħossuhomx denji, u ma jridux jammettu
lanqas magħhom infushom. Il-komunità Nisranija tista’ u għandha
tgħin biex dawn li jħossu n-nostalġija ta’ Alla jistgħu jirritornaw
lejh b’mod sinċier. Fuq kollox, dawk li jwettqu “il-ministeru ta’ din
il-ħbiberija” huma msejħa jkunu għodda doċli f’idejn
l-Ispirtu s-Santu biex hemm fejn kotor id-dnub tista’ toktor fuq li toktor
il-ħniena ta’ Alla (ara Rum 5:20). Ħadd m’għandu jibqa’
mbiegħed minn Alla minħabba fix-xkiel li jagħmlulu l-bnedmin! U
dan jgħodd ukoll – u nisħaq fuq dan – għall-konfessuri –
jgħodd għalihom –: nitlobkom, la tfixklux lil dawk il-persuni li
jridu jerġgħu jitħabbu ma’ Alla! Il-konfessur għandu jkun
missier! Qiegħed hemm f’isem Alla l-Missier! Il-konfessur għandu
jilqa’ lill-persuni li jiġu għandu biex jirrikonċiljaw
ruħhom ma’ Alla u jgħinhom fil-mixja ta’ din ir-rikonċiljazzjoni
li qed jagħmlu. Hu ministeru hekk sabiħ: m’huwiex xi kamra
tat-tortura, lanqas interrogatorju, le, hu l-Missier li jilqa’ għandu lil
din il-persuna u jaħfrilha. Ejjew inħallu lil Alla jħabbibna
miegħu! Ilkoll kemm aħna! Ħa tkun din is-Sena Mqaddsa
ż-żmien it-tajjeb biex niskopru mill-ġdid il-bżonn
tal-ħlewwa u tal-qrubija tal-Missier ħalli nerġgħu lura
għandu b’qalbna kollha.
Meta nagħmlu esperjenza
tar-rikonċiljazzjoni ta’ Alla nkunu nistgħu niskopru
l-ħtieġa ta’ xejriet oħra ta’ rikonċiljazzjoni:
fil-familji, fir-relazzjonijiet bejn il-persuni, fil-komunitajiet
ekkleżjali, kif ukoll fir-relazzjonijiet soċjali u internazzjonali.
Xi ħadd fl-aħħar jiem qalli li fid-dinja hawn iżjed
għedewwa milli ħbieb, u naħseb li kellu raġun. Imma le,
ejjew nibnu pontijiet ta’ rikonċiljazzjoni anki bejnietna, ibda
mill-istess familja. Kemm aħwa tlewmu u tbiegħdu minn xulxin
sempliċement minħabba xi wirt. Dan m’hux sew! Din is-sena hi s-sena
tar-rikonċiljazzjoni, ma’ Alla u bejnietna! Ir-rikonċiljazzjoni
fil-fatt hi wkoll servizz lill-paċi, lill-għarfien tad-drittijiet
fundamentali tal-persuni, lis-solidarjetà u biex nilqgħu lil kulħadd.
Mela ejjew nilqgħu l-istedina u nħallu
lil Alla jħabbibna miegħu, biex insiru ħolqien ġdid u nkunu
nistgħu niddu bil-ħniena tiegħu fost ħutna, qalb in-nies.
Insellem lil dawk li qed jieħdu sehem
fil-Ġublew tal-Forzi Armati u tal-Pulizija. Nilqa’ bil-ferħ
lir-rappreżentanti tal-forzi armati u tal-pulizija, miġbura hawn minn
tant partijiet tad-dinja, li ġew f’pellegrinaġġ Ruma
fl-okkażjoni tal-Ġublew straordinarju tal-Ħniena. Il-forzi ta’
l-ordni – militari u pulizija – għandhom bħala missjoni tagħhom
li jiggarantixxu ambjent fiż-żgur, biex kull ċittadin jista’
jgħix fis-sliem u s-serenità. Fil-familji tagħkom, fid-diversi
ambjenti fejn taħdmu, kunu strumenti ta’ rikonċiljazzjoni, bennejja
ta’ pontijiet li tiżirgħu l-paċi. Fil-fatt intom imsejħa
mhux biss biex tipprevenu, tissorveljaw, jew iġġibu fi tmiemhom
il-kunflitti, imma anki biex tagħtu sehemkom għall-bini ta’ ordni
msejjes fuq il-verità, fuq il-ġustizzja, fuq l-imħabba u fuq
il-libertà, skond id-defenizzjoni ta’ paċi li jagħti San Ġwanni
XXIII fl-Enċiklika Pacem in terris
(nn. 18 ss).
Li nżommu l-paċi m’hix xi
biċċa xogħol ħafifa, fuq kollox minħabba l-gwerra, li
tnixxef lil qlubna u tkattar il-vjolenza u l-mibegħda.
Inħeġġiġkom biex ma taqtgħux qalbkom. Ibqgħu
mexjin fil-fidi u iftħu qlubkom għal Alla l-Missier kollu ħniena
li ma jegħja qatt jaħfrilna. Quddiem l-isfidi ta’ kuljum, ħallu
tilma t-tama Nisranija tagħkom, li hi ċertezza tar-rebħa ta’
l-imħabba fuq il-mibegħda u tal-paċi fuq il-gwerra.
miġjuba
mit-Taljan għall-Malti minn Francesco Pio Attard