IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 30 ta’ Marzu
2016
12.
Il-Ħniena tħassar id-dnub
Għeżież ħuti, l-għodwa
t-tajba!
Il-lum nagħlqu l-katekeżi fuq
il-ħniena fit-Testment il-Qadim, u dan nagħmluh billi nimmeditaw
is-Salm 51, magħruf bħala l-Miserere. F’din it-talba penitenzjali, qabel tintalab
il-maħfra, tiġi l-istqarrija tal-ħtija, u min qed jitlob, huwa u
jħalli l-imħabba ta’ Alla ssaffih, isir ħlejqa ġdida, li kapaċi
jobdi, hu mimli bi spirtu qawwi u jrid ifaħħar lil Alla mill-qalb.
It-“titlu” li t-tradizzjoni antika Lhudija tat
lil dan is-Salm jirriferi għas-sultan David u għad-dnub tiegħu
ma’ Betsabea, mart Urija l-Ħitti.
Nafuha l-istorja. Is-sultan
David, imsejjaħ minn Alla biex jirgħa lill-poplu tiegħu u
jmexxih fit-triq ta’ l-ubbidjenza għal-Liġi divina, jittradixxi
l-missjoni tiegħu u, wara li jagħmel adulterju ma’ Betsabea,
jibgħat lil żewġha għall-mewt. Xi dnub ikrah! Il-profeta Natan jikxiflu dnubu u jgħinu
jagħraf il-ħtija tiegħu.
Hawn isseħħ ir-rikonċiljazzjoni ma’ Alla, fl-istqarrija
ta’ dnubu. U hawn David kien umli, kien
kbir!
Min jitlob b’dan is-Salm hu mistieden
jagħmel tiegħu l-istess sentimenti ta’ ndiema u ta’ fiduċja
f’Alla li kellu David meta ntebaħ bid-dnub tiegħu u nidem u, anki
jekk kien sultan, iċċekken bla ma beża’ jistqarr ħtijietu u
jistqarr il-miżerja tiegħu quddiem il-Mulej, imma konvint
miċ-ċertezza tal-ħniena tiegħu. U ma kienx xi dnub żgħir, xi gidba
ċkejkna, dak li kien għamel: kien għamel adulterju u qtil!
Is-Salm jiftaħ b’dan il-kliem ta’ supplika:
“Ikollok ħniena minni, o Alla, fi tjubitek;
fil-kobor tal-ħniena tiegħek
ħassar ħtijieti.
Aħsilni kollni mill-ħtija tiegħi;
naddafni mid-dnub tiegħi” (vv. 3-4).
L-invokazzjoni hi indirizzata lejn Alla
tal-ħniena biex, imqanqal minn imħabba kbira bħal dik ta’
missier u ta’ omm, ikollu ħniena, jiġifieri jagħti l-grazzja,
juri r-riżq tiegħu bi tjieba u komprensjoni. Hi karba ħierġa mill-qalb lil Alla,
li hu biss jista’ jeħles mid-dnub.
Jintużaw xbihat ‘plastiċi’ ħafna: ħassar,
aħsilni, saffini. F’din it-talba
jidher il-bżonn veru tal-bniedem: l-unika ħaġa li tassew
għandna bżonn f’ħajjitna hi dik li niġu maħfura,
meħlusa mill-ħażen u mill-konsegwenzi tiegħu li jġibu
l-mewt. B’xorti ħażina,
il-ħajja spiss iddewwaqna dawn is-sitwazzjonijiet; u qabel xejn huwa
f’dawn il-mumenti li rridu nafdaw fil-ħniena. Alla hu ikbar mid-dnub tagħna. Ma
ninsewhx dan: Alla hu aqwa mid-dnub tagħna! “Dun, ma nafx kif ħa naqbad ngħidlek,
dnibt ħafna, dnibt bil-kbir!”. Alla
hu akbar mid-dnubiet kollha li nistgħu nagħmlu aħna. Alla hu ikbar mid-dnub tagħna. Ngħiduha flimkien? Ilkoll flimkien: “Alla hu akbar mid-dnub tagħna!”. Għal darb’oħra: “Alla hu akbar
mid-dnub tagħna!”. Darb’oħra:
“Alla hu akbar mid-dnub tagħna!”. U
l-imħabba tiegħu hi oċean li fih nistgħu nintefgħu bla
ebda biża’ li negħrqu: il-maħfra għal Alla tfisser li
jagħtina ċ-ċertezza li Hu qatt m’hu ħa jitlaqna
waħidna. Tkun xi tkun il-ħtija
tagħna li l-kuxjenza ċċanfarna biha, Hu xorta waħda hu
dejjem akbar minn kollox (ara 1 Ġw 3:20), għax Alla hu akbar mid-dnub
tagħna.
F’dan is-sens, min jitlob b’dan is-Salm ikun
ifittex il-maħfra, jistqarr ħtijietu, imma meta jagħraf din
il-ħtija, ikun jiċċelebra l-ġustizzja u l-qdusija ta’
Alla. U mbagħad jitlob mill-ġdid
il-grazzja u l-ħniena. Is-Salmista
jafda ruħu f’idejn it-tjieba ta’ Alla, jaf li l-maħfra divina
għandha qawwa ikbar minn kull ħaġa oħra, għax
toħloq dak li tgħid. Ma
taħbix id-dnub, imma teqirdu u tħassru; imma tħassru propju
mill-għeruq tiegħu, mhux kif jagħmlu l-ħassiela meta neħdulhom
xi libsa u jneħħu t-tebgħa.
Le! Alla jħassar dnubna
propju minn għeruqu, kollox!
Għalhekk il-penitent jerġa’ jsir safi, kull tebgħa
titħassar u issa hu iżjed abjad mill-borra nadifa. Aħna lkoll midinbin. Minnu dan?
Jekk hemm xi ħadd fostkom li ma jħossux midneb, ħa
jgħolli idu… Ħadd! Kollha midinbin.
Aħna midinbin, imma bil-maħfra nsiru
ħolqien ġdid, imfawra bl-Ispirtu u mimlija bil-hena. Issa tibda realtà ġdida għalina:
qalb ġdida, ruħ ġdida, ħajja ġdida. Iva, midinba maħfura, li lqajna
l-grazzja divina, u nistgħu saħansitra ngħallmu lill-oħrajn
kif ma jidinbux iżjed. “Imma Dun,
jiena dgħajjef, naqa’, nerġa’ naqa’”.
“Imma int jekk taqa’, erġa’ qum!
Qum!”. Meta tfajjel ċkejken
jaqa’, x’jagħmel? Jgħolli jdejh
lejn ommu, lejn missieru biex jerfgħuh.
Ejja nagħmlu l-istess! Jekk
int taqa’ fid-dnub minħabba d-dgħufija tiegħek, għolli
jdejk: il-Mulej jeħodhom f’tiegħu u jgħinek tqum. Din hi d-dinjità tal-maħfra ta’
Alla! Id-dinjità li tagħtina
l-maħfra ta’ Alla hi dik li nqumu, nieqfu dejjem fuq riġlejna,
għax Hu ħalaq lir-raġel u lill-mara biex jibqgħu fuq
riġlejhom.
Jgħid is-Salmista:
“Oħloq fija qalb safja, o Alla,
u spirtu qawwi ġedded fija.
[…]
Lill-midinbin ngħallem triqatek,
u l-ħatjin lejk jerġgħu lura” (vv. 12.15).
Għeżież ħuti, li
għandna bżonn ilkoll kemm aħna hi din il-maħfra ta’ Alla,
għax hi l-ikbar sinjal tal-ħniena tiegħu. Don li kull midneb maħfur hu msejjaħ
jaqsam ma’ kull wieħed u waħda mill-aħwa li magħhom
jiltaqa’. Dawk kollha li l-Mulej
qegħdilna qrib tagħna, il-familja, il-ħbieb, il-kollegi,
il-parruċċani… kollha huma, bħalna, tallâba tal-ħniena ta’
Alla. Kemm hi ħaġa sabiħa
li tħossok maħfur, imma anki int, jekk trid tkun maħfur, int
ukoll trid taħfer. Aħfer! Ħa jagħtina l-Mulej il-grazzja li,
bl-interċessjoni ta’ Marija, Omm il-ħniena, inkunu xhieda
tal-maħfra tiegħu, li ssaffi l-qalb u tibdel il-ħajja. Grazzi.
miġjuba
mit-Taljan għall-Malti minn Francesco Pio Attard