IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 29 ta’ April 2015
Il-Familja - Iż-Żwieġ (I)
Għeżież
ħuti, l-għodwa t-tajba!
Ir-riflessjoni tagħna
fuq il-pjan oriġinali ta’ Alla
għall-koppja tar-raġel u l-mara, wara li ħarisna lejn
iż-żewġ rakkonti tal-Ktieb tal-Ġenesi, issa ddur
direttament fuq Ġesù.
Ġwanni l-evanġelista, għall-bidu
tal-Vanġelu tiegħu, jirrakkonta l-episodju tat-tieġ ta’ Kana, li
fih kienu preżenti l-Verġni Marija u Ġesù, flimkien ma’ l-ewwel
dixxipli tiegħu (ara Ġw 2:1-11).
Ġesù mhux biss ħa sehem f’dak it-tieġ, imma “salva
l-festa” bil-miraklu ta’ l-inbid! Mela,
l-ewwel fost is-sinjali ta’ l-għaġeb tiegħu, li bih Hu wera
l-glorja tiegħu, wettqu fil-kuntest ta’ żwieġ, u kien ġest
ta’ simpatija kbira għal dik il-familja għadha qed titwieled,
imħeġġeġ mill-għożża ta’ omm li kellha
Marija. Dan ifakkarna fil-ktieb
tal-Ġenesi, meta Alla jtemm l-opra tal-ħolqien u jagħmel
il-kapulavur tiegħu: il-kapulavur hu r-raġel u l-mara. U hawn Ġesù sewwa sew jibda l-mirakli
tiegħu b’dan il-kapulavur, fi żwieġ, waqt tieġ: raġel
u mara. Hekk Ġesù jgħallimna
li l-kapulavur tas-soċjetà hi l-familja: ir-raġel
u l-mara li jinħabbu! Dan hu
l-kapulavur!
Minn żmien it-tieġ ta’ Kana nbidlu
ħafna ħwejjeġ, imma dak is-“sinjal” ta’ Kristu fih messaġġ
li jibqa’ dejjem validu.
Il-lum jidher li m’hux faċli nitkellmu fuq
iż-żwieġ bħala festa li tiġġedded
maż-żmien, fid-diversi staġuni tal-ħajja sħiħa
tal-miżżewġin. Huwa fatt
li l-persuni li jiżżewġu qegħdin dejjem jonqsu; dan hu
fatt: iż-żgħażagħ ma jridux
jiżżewġu. F’ħafna
pajjiżi, imma, qed jiżdied l-għadd tas-separazzjonijiet, waqt li
qed jonqos l-għadd ta’ l-ulied.
Id-diffikultà li jibqgħu
flimkien – kemm bħala koppja, kemm bħala familja – qed tfarrak
ir-rabtiet ta’ bejn xulxin dejjem iżjed ta’ spiss u b’mod aktar
mgħaġġel, u huma sewwa sew l-ulied l-ewwel li jġorru
l-konsegwenzi ta’ dan. Aħsbu ftit
kif l-ewwel vittmi, l-iktar vittmi importanti, il-vittmi li qed isofru
l-iżjed f’separazzjoni huma l-ulied.
Jekk sa minn meta tkun għadek żgħir tibda dduq
iż-żwieġ bħala rabta “għal ċertu tul ta’
żmien”, inkonxjament għalik hekk ħa jkun. Fil-fatt, ħafna
żgħażagħ tendenzjalment qed jirrifjutaw l-istess
proġett ta’ rabta irrevokabbli u ta’ familja li tibqa’ fit-tul. Nemmen li jeħtieġ nirriflettu b’serjetà akbar fuq ir-raġuni għaliex tant
żgħażagħ “ma jħossux” li għandhom
jiżżewġu. Hemm din
il-kultura tal-proviżorju… kollox sar proviżorju, donnu m’għad
fadal xejn defenittiv.
Din taż-żgħażagħ li ma
jridux jiżżewġu hi waħda mill-preokkupazzjonijiet li
joħorġu l-lum il-ġurnata: Għaliex
iż-żgħażagħ m’humiex jiżżewġu? Għaliex spiss jippreferu li jikkoabitaw,
u ħafna drabi jagħmlu dan b’“responsabbiltà limitata”?
Għaliex ħafna – anki fost l-imgħammdin – ftit jemmnu
fiż-żwieġ u fil-familja?
Importanti nippruvaw nifhmu, jekk irridu li
ż-żgħażagħ isibu t-triq it-tajba li jridu jimxu
fiha. Għaliex ma jemmnux
fil-familja?
Id-diffikultajiet m’humiex biss ta’ bixra
ekonomika, anki jekk dawn huma tabilħaqq serji. Ħafna jżommu li l-bidla li
seħħet f’dawn l-aħħar għexieren ta’ snin ġrat
minħabba l-emanċipazzjoni tal-mara.
Imma lanqas dan l-argument ma jgħodd, hu falz, m’hux minnu! Hu għamla ta’ maskiliżmu dan, li
dejjem irrid jirkeb fuq il-mara.
Nispiċċaw naqtgħu l-figura ħażina li għamel
Adam, meta Alla qallu: “Imma għaliex kilt mill-frott tas-siġra?”, u
hu wieġbu: “Il-mara tatni minnu”. U
t-tort hu tal-mara. Imsejkna mara! Hemm bżonn niddefenduhom lin-nisa! Fir-realtà, kważi l-irġiel u n-nisa kollha
jixtiequ ċertezza affettiva stabbli, żwieġ b’saħħtu u
familja hienja. Il-familja hi
fil-quċċata tal-listi kollha ta’ x’jixtiequ
ż-żgħażagħ; imma, għax jibżgħu li
jiżbaljaw, ħafna lanqas biss iridu jaħsbu fiha; anki jekk huma
Nsara, ma jgħaddilhomx minn moħħhom iż-żwieġ
sagrament, sinjal waħdieni u irripetibbli tal-patt, li jsir xhieda
tal-fidi. Forsi propju dan il-biża’
li jfallu hu l-aktar ħaġa li xxekkilhom milli jilqgħu l-kelma
ta’ Kristu, li jwiegħed il-grazzja tiegħu għall-għaqda ta’
bejn il-miżżewġin u fuq il-familja.
Ix-xhieda l-aktar persważiva tal-barka
taż-żwieġ Nisrani hi l-ħajja tajba
tal-miżżewġin Insara u tal-familja. M’hemmx mod aħjar kif ngħidu kemm
hu sabiħ dan is-sagrament!
Iż-żwieġ ikkonsagrat minn Alla jħares dik ir-rabta
bejn raġel u mara li Alla bierek sa mill-ħolqien tad-dinja u hu
għajn ta’ sliem u ta’ ġid għall-ħajja kollha konjugali u
familjari. Ngħidu aħna,
fl-ewwel żminijiet tal-Kristjaneżmu, din id-dinjità kbira tar-rabta bejn raġel u mara
għelbet abbuż li f’dak iż-żmien kien meqjus għal
kollox normali, jiġifieri d-dritt ta’ l-irġiel
miżżewġa li jkeċċu lin-nisa tagħhom, anki
għall-iżjed raġunijiet bla sens u umiljanti. Il-Vanġelu tal-familja, il-Vanġelu
li jħabbar sewwa sew dan is-Sagrament, rebaħ fuq din il-kultura li
fiha kienet ħaġa komuni li l-mara titkeċċa mir-raġel.
Iż-żerriegħa Nisranija ta’
l-ugwaljanza radikali bejn il-miżżewġin jeħtieġ li
l-lum iġġib frott ġdid.
Ix-xhieda tad-dinjità soċjali taż-żwieġ issir
persważiva propju b’din it-triq, it-triq tax-xhieda li tiġbed lejha,
it-triq tar-reċiproċità bejniethom, tal-kumplimentarjetà bejniethom.
Għalhekk, bħala Nsara,
jeħtieġ insiru iżjed esiġenti f’dan. Ngħidu aħna: inwieżnu
b’determinazzjoni d-dritt ta’ paga ndaqs għall-istess xogħol. Għaliex neħduha ovvja li n-nisa
għandhom jaqilgħu inqas mill-irġiel? Le!
Għandhom l-istess drittijiet.
L-inguwaljanza hi skandlu pur!
Fl-istess waqt, nagħrfu bħala għana li dejjem tibqa’
tiswa l-maternità tan-nisa
u l-paternità ta’ l-irġiel, ħaġa li minnha
qabel xejn igawdu t-tfal. Bl-istess mod,
il-virtù ta’ l-ospitalità tal-familji Nsara
l-lum tilbes mill-ġdid
importanza kruċjali, speċjalment fis-sitwazzjonijiet ta’ faqar, ta’ telqa,
ta’ vjolenza familjari.
Għeżież ħuti, ejjew ma
nibżgħux nistiednu lil Ġesù għall-festa tat-tieġ,
nistednuh id-dar tagħna, biex ikun magħna u jħares il-familja
tagħna. U ma nibżgħux
nistiednu anki lil Ommu Marija!
L-Insara, meta jiżżewġu “fil-Mulej”, jinbidlu f’sinjal
effikaċi ta’ l-imħabba ta’ Alla.
L-Insara ma jiżżewġux biss għalihom infushom:
jiżżewġu fil-Mulej għall-ġid tal-komunità kollha, tas-soċjetà kollha kemm hi.
Dwar din il-vokazzjoni sabiħa
taż-żwieġ Nisrani, nitkellem ukoll fil-katekeżi li jmiss.
miġjuba
mit-Taljan għall-Malti minn Francesco Pio Attard