IL-PAPA
FRANĠISKU
UDJENZA ĠENERALI
Pjazza San Pietru - L-Erbgħa 29 ta’ Jannar 2014
Għeżież
ħuti, l-għodwa t-tajba,
F’din it-tielet
katekeżi dwar is-Sagramenti, sa nieqfu nitkellmu fuq il-Konfirmazzjoni jew
Griżma ta’ l-Isqof, li għandna nħarsu lejha f’kontinwità
mal-Magħmudija, li magħha hi marbuta b’mod inseparabbli. Dawn
iż-żewġ Sagramenti, flimkien ma’ l-Ewkaristija, jiffurmaw
ġrajja waħda salvifika, li tissejjaħ l-“inizjazzjoni Kristjana”,
li fiha aħna niġu inseriti f’Ġesù Kristu li miet u rxoxta u nsiru
ħlejjaq ġodda u membri tal-Knisja. Hu għalhekk li
għall-bidu dawn it-tliet Sagramenti kienu jiġu ċċelebrati
f’mument wieħed, fi tmiem il-mixja katekumenali, normalment fil-Velja ta’
l-Għid. Hekk kienet tiġi ssiġillata l-mixja ta’
formazzjoni u ta’ dħul gradwali fil-komunità Nisranija li setgħet
ittul anki għal xi snin. Kien isir pass wara l-ieħor biex
wieħed jasal għall-Magħmudija, imbagħad
għall-Griżma u mbagħad għall-Ewkaristija.
Normalment
nirriferu għal dan is-sagrament bħala l-“Griżma”, kelma li
tfisser “dilka”. U fil-fatt, permezz taż-żejt imsejjaħ
“Griżma mqaddsa”, bil-qawwa ta’ l-Ispirtu s-Santu, insiru ħaġa
waħda ma’ Ġesù Kristu, li hu l-“midluk” waħdieni u veru,
il-“Messija”, il-Qaddis ta’ Alla. It-terminu “Konfirmazzjoni”
imbagħad ifakkarna li dan is-Sagrament ikabbar fina l-grazzja
tal-Magħmudija: jgħaqqadna b’qawwa ikbar ma’ Kristu; iwettaq ir-rabta
tagħna mal-Knisja; jagħtina l-qawwa speċjali ta’ l-Ispirtu
s-Santu biex nistgħu nxerrdu l-fidi u nħarsuha, biex nistqarru l-isem
ta’ Kristu u biex qatt ma nistħu mis-salib tiegħu (ara Katekiżmu
tal-Knisja Kattolika, nru 1303).
Għalhekk hu
importanti nieħdu ħsieb li t-tfal tagħna, l-adolexxenti
tagħna, jirċievu dan is-Sagrament. Ilkoll naraw li jiġu
mgħammda u din hi ħaġa tajba, imma forsi ma tantx nagħtu
kas li jirċievu l-Griżma. Hekk jibqgħu f’nofs il-mixja
tagħhom u ma jirċevux l-Ispirtu s-Santu, li hu tant importanti
fil-ħajja Nisranija, għax jagħtina l-qawwa biex nibqgħu
mexjin. Ejjew naħsbu ftit, kull wieħed u waħda minna: Veru
li qed nieħdu ħsieb li t-tfal tagħna, l-adolexxenti tagħna
jirċievu l-Griżma? Importanti dan, importanti! U jekk
intom, id-dar tagħkom, għandkom tfal, subien u bniet, li għadhom
ma rċivewhiex u għandhom biżżejjed età biex jirċevuha,
agħmlu kull ma hu possibbli biex iwasslu fi tmiemha l-inizjazzjoni
Kristjana u jirċievu l-qawwa ta’ l-Ispirtu s-Santu. Importanti!
Naturalment
importanti noffru tħejjija tajba lil dawk li ħa jirċievu
l-Griżma, li trid twassalhom biex jilqgħu b’mod personali l-fidi fi
Kristu u terġa’ tqajjem fihom is-sens ta’ appartenenza għall-Knisja.
Il-Konfirmazzjoni,
bħal kull Sagrament ieħor, m’hix opra ta’ jdejn il-bnedmin, imma ta’
Alla, li jieħu ħsieb ta’ ħajjitna hekk li jagħġinna
fix-xbieha ta’ Ibnu, biex jagħmilna kapaċi nħobbu
bħalU. Dan jagħmlu billi jsawwab fina l-Ispirtu s-Santu
tiegħu, li l-azzjoni tiegħu tixtered fil-persuna u l-ħajja
kollha, kif tidher ukoll fis-seba’ doni li t-Tradizzjoni, fid-dawl ta’
l-Iskrittura Mqaddsa, dejjem għafset fuqhom. Dawn is-seba’ doni:
Jien ma rridx nistaqsi lilkom jekk tiftakruhomx is-seba’ doni. Forsi
tafuhom kollha… Imma sa ngħidhom f’isimkom. Liema huma s-seba’
doni? L-Għerf, il-Fehma, il-Kunsill, il-Qawwa, ix-Xjenza, il-Pjetà u
l-Biża’ ta’ Alla. U dawn id-doni jingħatawlna propju bl-Ispirtu
s-Santu fis-sagrament tal-Konfirmazzjoni. Għandi f’moħħi
mbagħad li l-katekeżijiet li nagħmel wara dawk fuq is-Sagramenti
niddedikahom lil dawn id-doni.
Meta nilqgħu
lill-Ispirtu s-Santu f’qalbna u nħalluh jaħdem, Kristu stess
jiġi fina u jissawwar f’ħajjitna; permezz tagħna, ikun Hu,
l-istess Kristu, li jitlob, li jaħfer, li jxerred it-tama u l-faraġ,
li jaqdi lill-aħwa, li joqgħod qrib min hu fil-bżonn u min
iħossu mwarrab, li joħloq il-komunjoni, li jiżra’
l-paċi. Aħbsu ftit fuq kemm hu importanti dan: permezz ta’
l-Ispirtu s-Santu, Kristu stess jiġi jagħmel dan kollu fostna u
għalina. Għalhekk hu importanti li t-tfal u l-adolexxenti
jirċievu s-Sagrament tal-Griżma.
Għeżież
ħuti, niftakru li aħna rċivejna l-Konfirmazzjoni! Ilkoll
kemm aħna! Niftakruh qabel xejn biex irroddu ħajr lill-Mulej
ta’ dan id-don, u mbagħad biex nitolbuh jgħinna ngħixu ta’ veri
Nsara, biex nimxu dejjem bil-ferħ skond l-Ispirtu s-Santu li ġie
mogħti lilna.
miġjuba mit-Taljan għall-Malti minn
Francesco Pio Attard