IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 28 ta’ Ġunju
2017
It-Tama Nisranija
– 28.
It-Tama,
qawwa tal-martri
Għeżież ħuti, l-għodwa
t-tajba!
Illum nirriflettu fuq it-tama Nisranija bħala qawwa tal-martri. Meta,
fil-Vanġelu, Ġesù jibgħat lid-dixxipli f’missjoni, ma
joqgħodx jimlielhom moħħhom b’kastelli fl-arja ta’
suċċess faċli; bil-maqlub, iwisshom ċar li t-tħabbira
tas-Saltna ta’ Alla dejjem sa jkun hemm min hu kontriha. U juża anki
espressjoni qawwija: “U lilkom kulħadd isir jobgħodkom –
jobgħodkom – minħabba f’ismi” (Mt 10:22). L-Insara jħobbu, imma
mhux dejjem huma maħbuba. Ġesù mill-ewwel ipoġġina quddiem
din ir-realtà: xi ftit jew wisq, l-istqarrija tal-fidi tiġi fi klima ta’
ostilità.
Għalhekk l-Insara huma rġiel u nisa
“kontra l-kurrent”. Dan normali: ladarba d-dinja hi mċappsa mid-dnub, li
jidher f’bosta xejriet ta’ egoiżmu u ta’ inġustizzja, min jimxi wara
Kristu miexi f’direzzjoni kuntrarja. Mhux bi spirtu ta’ polemika, imma
b’fedeltà għal-loġika tas-Saltna ta’ Alla, li hi loġika ta’ tama, u tissarraf fl-istil ta’ ħajja msejjes
fuq dak li jurina Ġesù.
U l-ewwel indikazzjoni hi l-faqar. Meta Ġesù jibgħat lil tiegħu f’missjoni,
donnu iktar moħħu kif ħa “jneżżagħhom” milli kif
ħa “jlibbishom”! Fil-fatt, Nisrani li mhuwiex umli u fqir, maqtugħ
mill-għana u mill-poter u fuq kollox maqtugħ minnu nnifsu, ma jixbahx
lil Ġesù. In-Nisrani jimxi fit-triq tiegħu f’din id-dinja b’dak li hu
essenzjali għall-mixja, imma b’qalbu mimlija mħabba. Il-vera telfa
għalih jew għaliha hu meta jaqa’ fit-tentazzjoni tal-vendetta u
tal-vjolenza, li jwieġeb għall-ħażen b’ħażen.
Ġesù jgħidilna: “Qed nibgħatkom bħal ħrief qalb
l-ilpup” (Mt 10:16). Jiġifieri bla snien, bla munizzjon, bla armi.
In-Nisrani pjuttost għandu jkun prudenti, xi drabi anki moħħu
jilħaqlu: dawn huma virtujiet aċċettati mil-loġika
tal-Vanġelu. Imma l-vjolenza qatt. Biex negħlbu l-ħażen, ma
nistgħux ninqdew bl-istess metodi tal-ħażen.
L-unika qawwa tan-Nisrani hi l-Vanġelu.
Fiż-żminijiet ta’ diffikultà, irridu nemmnu li Ġesù jinsab
quddiemna, u ma jiqafx jimxi mad-dixxipli tiegħu. Il-persekuzzjoni mhix
kontradizzjoni għall-Vanġelu, imma tagħmel parti minnu: jekk
ippersegwitaw lill-Imgħallem tagħna, kif nistgħu nittamaw li aħna
nevitaw it-taqbida? Imma, qalb it-tiġrib kollu, in-Nisrani m’għandux
jitlef it-tama tiegħu, jew jaħseb li ġie abbandunat. Ġesù
jiżgura lid-dixxipli tiegħu billi jgħidilhom: “Sa x-xagħar
ta’ raskom kollu hu magħdud” (Mt 10:30). Biex qisu jgħid li l-ebda
tbatija tal-bniedem, l-anqas l-iċken waħda u l-aktar moħbija, ma
hi inviżibbli f’għajnejn Alla. Alla jara, u żgur
jipproteġi; u se jagħti l-fidwa tiegħu. Fil-fatt fostna hemm Xi
Ħadd li hu aqwa mill-ħażen, iktar b’saħħtu mill-mafja,
mill-komplotti mudlama, minn min jaqlagħha tajjeb minn fuq dahar dawk ta’
qalbhom maqtugħa, minn min jgħaffeġ lill-oħrajn bi
prepotenza… Xi ħadd li minn dejjem sema’ l-vuċi ta’ demm Abel li qed
tgħajjat mill-art.
Għalhekk l-Insara għandhom ikunu
dejjem fuq “in-naħa l-oħra” tad-dinja, dik magħżula minn
Alla: mhux persekuturi, imma ppresegwitati; mhux arroganti, imma umli; mhux
bejjiegħa tad-duħħan, imma sottomessi għall-verità; mhux
imposturi, imma onesti.
Din il-fedeltà fl-istil ta’ Ġesù – li hu
stil ta’ tama – sal-mewt, l-ewwel Insara sejħulha b’isem sabiħ
ħafna: “martirju”, li jfisser “xhieda”. Kien hemm ħafna
possibbiltajiet oħra, li joffri l-vokabularju: setgħet tissejjaħ
eroiżmu, ċaħda tal-jien, sagrifiċċju tagħhom
infushom. Imma l-Insara tal-ewwel siegħa sejħulha b’isem li
jfewwaħ bid-dixxipulat. Il-martri ma jgħixux għalihom infushom,
ma jitqabdux biex jaffermaw l-ideat tagħhom, u jaċċettaw il-mewt
biss b’fedeltà għall-Vanġelu. Il-martirju lanqas mhu l-ogħla
ideal tal-ħajja Nisranija, għax ’il fuq minnu hemm il-karità,
jiġifieri l-imħabba lejn Alla u lejn il-proxxmu. Dan jgħidu
tajjeb ħafna l-Appostlu Pawlu fl-innu lill-imħabba: “U kieku kelli
nqassam ġidi kollu fil-karità u nagħti ġismi
għall-ħruq bla ma jkolli mħabba, xejn ma jkun jiswieli ta’
ġid” (1 Kor 13:3). Hi diżgustanti għall-Insara l-idea li dawk li
jagħmlu l-attentati suwiċida jistgħu b’xi mod jissejħu
“martri”: m’hemm xejn fl-iskopijiet tagħhom li jista’ mqar joqrob lejn
l-atteġġjament ta’ wlied Alla.
Xi drabi, aħna u naqraw l-istejjer ta’ tant
martri tal-bieraħ u tal-lum – li huma ħafna iktar fl-għadd
mill-martri tal-ewwel żminijiet –, nibqgħu mistagħġbin
quddiem il-qawwa li biha affrontaw il-prova. Din il-qawwa hi sinjal tat-tama kbira li kienet tmexxihom: it-tama
żgura li xejn u ħadd ma seta’ qatt jifridhom mill-imħabba ta’
Alla mogħtija lilna f’Ġesù Kristu (ara Rum 8:38-39).
Ħa jagħtina Alla dejjem il-qawwa li
nkunu xhieda tiegħu. Jagħtina li ngħixu t-tama Nisranija fuq
kollox fil-martirju moħbi li nwettqu tajjeb u bi mħabba d-dmirijiet
tagħna ta’ kuljum. Grazzi.
miġjub
mit-Taljan għall-Malti minn Francesco Pio Attard