IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 27 ta’ Jannar
2016
5.
Alla jisma’ l-karba u jagħmel patt
Għeżież ħuti, l-għodwa
t-tajba!
Fl-Iskrittura Mqaddsa, il-ħniena ta’ Alla
hi preżenti tul l-istorja kollha tal-poplu ta’ Israel.
Bil-ħniena tiegħu, il-Mulej
isieħeb il-mixja tal-Patrijarki, jibgħatilhom l-ulied għad li ma
jistax ikollhom tfal, imexxihom tul mogħdijiet ta’ grazzja u ta’
rikonċiljazzjoni, kif turi l-istorja ta’ Ġużeppi u ħutu
(ara Ġen 37-50). U hawn naħseb
f’tant aħwa fl-istess familja li tbiegħdu minn xulxin u ma
jitkellmux. Imma din is-Sena
tal-Ħniena hi okkażjoni tajba biex jerġgħu jsibu lil
xulxin, jitgħannqu u jaħfru lil xulxin u jinsew il-ħwejjeġ
koroh. Imma, kif nafu, fl-Eġittu
l-ħajja għall-poplu ssir iebsa.
U hu propju meta l-Israeliti jkunu waslu fit-tarf, li l-Mulej
jindaħal u jġib is-salvazzjoni.
Naqraw fil-Ktieb ta’ l-Eżodu: “Għadda ż-żmien u miet is-sultan ta’ l-Eġittu; u wlied
Israel bdew jitniehdu taħt il-jasar u jgħajtu.
L-għajat tagħhom mill-jasar wasal sa
għand Alla.
U Alla
sama’ l-krib tagħhom u ftakar fil-patt tiegħu ma’ Abraham, ma’ Iżakk u ma’
Ġakobb.
Alla xeħet
ħarstu fuq ulied Israel u ra f’liema stat kienu”
(2:23-25). Il-ħniena ma tistax
tibqa’ indifferenti quddiem it-tbatija tal-maħqurin, quddiem il-karba ta’
min hu mgħaffeġ mill-vjolenza, imjassar, ikkundannat
għall-mewt. Hi realtà ta’ swied
il-qalb li tolqot lil kull epoka, inkluża din tagħna, u li spiss
iġġagħalna nħossuna bla saħħa, ittentati li
nwebbsu qalbna u naħsbu fi ħwejjeġ oħra. Imma Alla “m’hux indifferenti” (Messaġġ għall-Jum Dinji
tal-Paċi 2016, 1), qatt ma jwarrab ħarstu minn fuq it-tbatija
tal-bniedem. Alla tal-ħniena
jwieġeb u jieħu ħsieb tal-foqra, ta’ dawk li qed jokorbu
bid-disperazzjoni. Alla jisma’ u
jindaħal biex isalva, u jibgħat nies kapaċi jisimgħu l-krib
tat-tbatija u jaħdmu b’risq il-maħqurin.
U hekk tibda l-istorja ta’ Mosè bħala
medjatur ta’ ħelsien għall-poplu.
Hu jaffronta lill-Fargħun biex jikkonvinċih iħalli lil
Israel jitlaq; u mbagħad imexxi lill-poplu, jgħaddih mill-Baħar
l-Aħmar u d-deżert, lejn il-ħelsien. Mosè, li meta kien għadu tarbija
tat-twelid il-ħniena divina ħelsitu minn ħalq il-mewt
fl-ilmijiet tan-Nil, isir medjatur ta’ dik l-istess ħniena, u hekk
jagħti lill-poplu l-possibbiltà li jitwieled għall-ħelsien, mifdi
minn qalb l-ilmijiet tal-Baħar l-Aħmar. U anki aħna f’din is-Sena
tal-Ħniena nistgħu nwettqu din il-ħidma li nkunu medjaturi ta’
ħniena bl-opri tal-ħniena biex nersqu eqreb ta’ l-oħrajn,
noffrulhom serħan, biex inġibu l-għaqda. Hemm tant ħwejjeġ tajba
x’nistgħu nagħmlu.
Il-ħniena ta’ Alla taġixxi dejjem biex
tifdi. Kollox bil-kontra ta’ l-opra ta’
dawk li jaġixxu dejjem biex joqtlu: ngħidu aħna, dawk li
jagħmlu l-gwerer. Il-Mulej, permezz
tal-qaddej tiegħu Mosè, imexxi lil Israel fid-deżert qisu kien ibnu,
jedukah fil-fidi u jagħmel patt miegħu, u hekk joħloq rabta ta’
mħabba l-aktar qawwija, bħal dak tal-missier ma’ ibnu u
tar-raġel ma’ martu.
Il-ħniena divina tilħaq lil
kulħadd. Alla jipproponi relazzjoni
ta’ mħabba partikulari, esklussiva, ipprivileġġjata. Meta jagħti istruzzjonijiet lil Mosè
dwar il-patt, jgħidlu: “Issa, jekk tisimgħu leħni u żżommu
l-patt tiegħi, intom
tkunu l-wirt tiegħi minn fost il-popli kollha,
għax l-art kollha
tiegħi.
Intom tkunu għalija saltna ta’ qassisin u
ġens qaddis”
(Eż 19:5-6).
Daż-żgur, l-art diġà hi kollha
kemm hi ta’ Alla, għax hu ħalaqha; imma l-poplu jsir għaliH
pussess differenti, speċjali: ir-“riserva ta’ deheb u fidda” personali
tiegħu, bħal dik li s-Sultan David sostna li kien ta għall-bini
tat-Tempju.
Mela hekk insiru aħna għal Alla meta
nilqgħu l-patt tiegħu u nħalluH isalvana. Il-ħniena tal-Mulej tagħmel
lill-bniedem prezzjuż, bħal għana u ġid personali li hu
Tiegħu, li Hu jieħu ħsieb u bih jitgħaxxaq.
Dawn huma l-għeġubijiet tal-ħniena
divina, li tilħaq il-milja tagħha fil-Mulej Ġesù, f’dak il-“patt
il-ġdid li jibqa’ għal dejjem” ikkunsmat fid-demm tiegħu, li
bil-maħfra jeqred id-dnub tagħna u jagħmilna darba għal
dejjem ulied Alla (ara 1 Ġw 3:1), ġawhar prezzjuż f’idejn il-Missier
twajjeb u ħanin. U jekk aħna
wlied Alla u dan il-wirt jista’ jkun tagħna – dak tat-tjieba u
tal-ħniena – f’konfront ma’ l-oħrajn, nitolbu lill-Mulej li f’din
is-Sena tal-Ħniena anki aħna nwettqu ħwejjeġ ta’
ħniena; niftħu qalbna biex naslu għand kulħadd bl-opri
tal-ħniena, il-wirt ħanin li Alla l-Missier wera magħna.
miġjuba
mit-Taljan għall-Malti minn Francesco Pio Attard