IL-PAPA FRANĠISKU
UDJENZA
ĠENERALI
Pjazza San
Pietru
L-Erbgħa 26 ta’
Ġunju 2013
Għeżież ħuti, l-għodwa
t-tajba!
Il-lum nixtieq nirriferi fil-qosor għal xbieha
oħra li tgħinna biex infissru l-misteru tal-Knisja: dik tat-Tempju
(ara Konċilju Ekumeniku Vatikan II, Kostituzzjoni Dommatika Lumen
gentium, 6).
Fiex tfakkarna l-kelma tempju? Tfakkarna
f’binja. B’mod partikulari l-ħsieb ta’ ħafna minna jmur lejn
l-istorja tal-poplu ta’ Israel irrakkuntata fit-Testment il-Qadim.
F’Ġerusalemm, it-Tempju l-kbir ta’ Salamun kien il-post tal-laqgħa
ma’ Alla fit-talb; fit-Tempju kien hemm l-Arka tal-Patt, sinjal
tal-preżenza ta’ Alla qalb il-poplu; u fl-Arka kien hemm it-Twavel
tal-Liġi, il-manna u l-ħatar ta’ Aron: biex ifakkru li Alla sa minn
dejjem kien fl-istorja tal-poplu tiegħu, kien sieħbu fil-mixja
tiegħu, mexxa l-passi tiegħu. It-tempju jfakkarna f’din
l-istorja: anki aħna, meta mmorru fit-tempju, jeħtieġ niftakru
f’din l-istorja, kull wieħed u waħda minna fl-istorja tiegħu jew
tagħha, kif Ġesù ltaqa’ miegħi, kif Ġesù mexa miegħi,
kif Ġesù jħobbni u jberikni.
Araw kif dak li ġie mħabbar sa minn qabel
fit-Tempju l-antik, issa, bil-qawwa ta’ l-Ispirtu s-Santu, jitwettaq
fil-Knisja: il-Knisja hi d-“dar ta’ Alla”, il-post tal-preżenza
tiegħu, fejn nistgħu nsibu lill-Mulej u niltaqgħu miegħu;
il-Knisja hi t-Tempju fejn jgħammar l-Ispirtu s-Santu li jagħtiha
l-ħajja, imexxiha u jżommha wieqfa. Jekk nistaqsu: Fejn
nistgħu niltaqgħu ma’ Alla? Fejn nistgħu nidħlu
f’komunjoni miegħU permezz ta’ Kristu? Fejn nistgħu nsibu
d-dawl ta’ l-Ispirtu s-Santu li jdawwal lil ħajjitna?
It-tweġiba hi: Fil-poplu ta’ Alla, fina u fostna, li aħna
Knisja. Hawn niltaqgħu ma’ Ġesù, l-Ispirtu s-Santu u l-Missier.
It-Tempju l-antik kien mibni minn idejn il-bnedmin:
riedu “jibnu dar” lil Alla, biex ikollhom sinjal li jidher tal-preżenza
tiegħu qalb il-poplu. Bl-Inkarnazzjoni ta’ l-Iben ta’ Alla titwettaq
il-profezija ta’ Natan lis-Sultan David (ara 2 Sam 7:1-29): m’huwiex is-sultan,
mhux aħna li sa “nagħtu dar lil Alla”, imma hu Alla nnifsu li “jibni
d-dar tiegħu” biex jiġi u joqgħod magħna, kif jikteb San
Ġwann fil-Vanġelu tiegħu (ara 1:14). Kristu hu t-Tempju
ħaj tal-Missier, u Kristu nnifsu jibnu d-“dar spiritwali” tiegħu,
il-Knisja, magħmula mhux minn ġebel materjali, imma minn “ġebel
ħaj”, li huwa aħna. L-Appostlu Pawlu jgħidilhom hekk
lill-Insara ta’ Efesu: Intom ġejtu “mibnija lkoll fuq is-sisien ta’ l-Appostli u tal-Profeti, fejn Kristu hu
l-ġebla tax-xewka.
Fih il-bini kollu jintrabat sewwa, jitla’ f’tempju
qaddis fil-Mulej; fih, intom ukoll
fl-Ispirtu, tinbnew flimkien f’dar fejn jgħammar Alla” (Efes 2:20-22). Din ħaġa tassew sabiħa! Aħna l-ġebel ħaj tad-dar ta’ Alla, magħquda
profondament ma’ Kristu, li
hu l-ġebla tax-xewka, u jżomm wieqfa anki lilna
lkoll bejnietna. Dan
xi jfisser? Ifisser
li t-Tempju huwa aħna, aħna l-Knisja ħajja, it-tempju ħaj, u meta nkunu magħquda
flimkien bejnietna jkun hemm ukoll
l-Ispirtu s-Santu, li jgħinna biex nikbru bħala Knisja. Aħna m’aħniex iżolati, imma aħna poplu ta’ Alla: din hi l-Knisja!
U huwa l-Ispirtu s-Santu, bid-doni tiegħu, li
jfassal il-varjetà. Dan importanti: Xi
jwettaq fostna
l-Ispirtu s-Santu? Hu jfassal il-varjetà li hi għana
fil-Knisja u tiġbor flimkien kollox u lil kulħadd, hekk li tibni tempju
spiritwali, li fiha aħna ma noffrux sagrifiċċji materjali, imma lilna nfusna,
ħajjitna (ara 1 Piet
2:4-5). Il-Knisja m’hix
nisġa ta’ affarijiet u
interessi differenti, imma hi t-Tempju ta’ l-Ispirtu s-Santu, it-Tempju li fih Alla
jaħdem, it-Tempju li fih kull wieħed
u waħda minna bir-rigal tal-Magħmudija jsir ġebla ħajja. Dan ifisser li m’hemm ħadd fil-Knisja li ma jiswa għal xejn, u jekk xi ħadd xi darba jgħid lill-ieħor: “Mur id-dar, għax għal xejn ma tiswa”, dan m’hux minnu,
għax m’hemm ħadd li ma jiswa għal xejn fil-Knisja, kollha aħna meħtieġa biex jinbena dan
it-Tempju! Ħadd m’hu sekondarju. M’hemm ħadd fil-Knisja li hu l-iżjed importanti, kollha aħna ndaqs f’għajnejn Alla. Xi ħadd minnkom jaf jgħidli:
“Isma’, Sur Papa, int m’intix ugwali għalina”. Iva, jien bħal kull wieħed u waħda minnkom, kollha aħna bħal xulxin, aħna aħwa! Ħadd m’hu anonimu: ilkoll
niffurmaw u nibnu l-Knisja. Dan jistedinna nirriflettu wkoll fuq il-fatt li jekk tonqos imqar
ġebla ċkejkna
mill-ħajja Nisranija tagħna, hemm xi ħaġa nieqsa mill-ġmiel tal-Knisja. Xi wħud jgħidu: “Jien mal-Knisja ma rridx li jkolli x’naqsam”, imma hekk tkun naqset
ġebla ta’ ħajja waħda minn
dan it-Tempju sabiħ. Ħadd m’għandu jwarrab, ilkoll jeħtieġ li nagħtu lill-Knisja l-ħajja tagħna, qalbna, imħabbitna, ħsiebna, ħidmietna: ilkoll flimkien.
Allura nixtieq li nistaqsu lilna nfusna: Kif qed
ngħixu l-fatt li aħna Knisja? Aħna ġebel ħaj
jew, biex ngħidu hekk, ġebliet għajjiena, imxebbgħa,
indifferenti? Rajtu kemm hu ikrah tara Nisrani għajjien, imdejjaq,
indifferenti? M’hux sew li jkollna Nisrani hekk; in-Nisrani jrid ikun
ħaj, ferħan li hu Nisrani; jeħtieġ jgħix dan
il-ġmiel li jagħmel parti mill-poplu ta’ Alla li hu l-Knisja.
Aħna qegħdin ninfetħu għall-ħidma ta’ l-Ispirtu
s-Santu biex inkunu parti attiva mill-komunitajiet tagħna, jew qed
ningħalqu fina nfusna u ngħidu: “Għandi wisq x’nagħmel, dan
m’hux xogħli”?
Il-Mulej jagħtina lkoll il-grazzja
tiegħu, il-qawwa tiegħu, biex nistgħu nkunu magħquda
profondament ma’ Kristu, li hu l-ġebla tax-xewka, il-pedament sod,
il-ġebla li fuqha jistrieħ il-bini kollu ta’ ħajjitna u
tal-ħajja kollha tal-Knisja. Nitolbu biex, imdawlin mill-Ispirtu
tiegħu, inkunu dejjem ġebel ħaj tal-Knisja tiegħu.
miġjuba mit-Taljan għall-Malti minn
Francesco Pio Attard