IL-PAPA
FRANĠISKU
UDJENZA ĠENERALI
Pjazza
San Pietru
L-Erbgħa
25 ta’ Settembru 2013
Għeżież
ħuti, l-għodwa t-tajba!
Fil-Kredu aħna ngħidu “Nemmen fi
Knisja waħda”, jiġifieri nistqarru li l-Knisja hi unika u li din
il-Knisja hi għaqda waħda fiha nfisha. Imma jekk inħarsu lejn il-Knisja
Kattolika fid-dinja niskopru li hi tiġbor fiha kważi 3,000
djoċesi mxerrda mal-kontinenti kollha: tant ilsna, tant kulturi! Hawn insibu Isqfijiet ġejjin minn tant
kulturi differenti, minn tant pajjiżi.
Hawn l-Isqof tas-Sri Lanka, l-Isqof ta’ l-Afrika ta’ Isfel, Isqof
mill-Indja, hawn ħafna hawnhekk… Isqfijiet mill-Amerika Latina. Il-Knisja hi mxerrda mad-dinja kollha! U safrattant l-eluf ta’ komunitajiet
Kattoliċi jiffurmaw għaqda waħda. Kif jista’ jseħħ dan?
1. Tweġiba li
tiġbor kollox fiha nsibuha fil-Kompendju
tal-Katekiżmu tal-Knisja Kattolika, li jafferma: il-Knisja Kattolika
mxerrda mad-dinja “għandha fidi waħda, ħajja sagramentali
waħda, suċċessjoni Appostolika waħda, tama waħda,
karità waħda” (n. 161). Hi definizzjoni
sabiħa din, ċara, torjentana tajjeb.
Għaqda fil-fidi, fit-tama, fl-imħabba, għaqda
fis-Sagramenti, fil-Ministeru: huma bħal pilastri li jwieżnu u
jżommu magħquda l-binja kbira waħdanija tal-Knisja. Kull fejn immorru, anki fl-iżjed
parroċċa żgħira, fl-iktar rokna minsija ta’ din l-art, hemm
il-Knisja waħda; aħna nħossuna d-dar, fil-familja, qalb
ħutna. U dan hu don kbir ta’
Alla! Il-Knisja hi waħda għal
kulħadd. M’hemmx Knisja
għall-Ewropej, oħra għall-Afrikani, oħra
għall-Amerikani, oħra għall-Asjatiċi, oħra għal
min jgħix fl-Oċeanja, le, hi l-istess waħda kull fejn tmur. Dan bħal f’familja: nistgħu nkunu
mbiegħda, imxerrda mad-dinja, imma r-rabtiet profondi li jgħaqqdu
flimkien il-membri kollha tal-familja jibqgħu sodi, tkun xi tkun id-distanza. Tiġini f’moħħi, ngħidu
aħna, l-esperjenza tal-Jum Dinji taż-Żgħażagħ
f’Rio de Janeiro: f’dik il-folla immensa ta’ żgħażagħ fuq
ix-xatt ta’ Copacabana stajt tisma’ mitkellma bosta lingwi, stajt tilmaħ
bixriet ta’ wiċċ ħafna differenti minn xulxin, iltaqgħu
flimkien kulturi differenti, u safrattant kien hemm għaqda profonda, għax
jiffurmaw Knisja waħda, kollha kienu f’għaqda waħda u dan stajt
tħossu. Ejjew nistaqsu lkoll lilna
nfusna: Jiena bħala Kattoliku nħossha din l-għaqda? Jien bħala Kattolika qed ngħix din
l-għaqda tal-Knisja? Jew ma
tinteressanix, għax magħluq fil-grupp ċkejken tiegħi jew fija
nnifsi? Forsi jien fost dawk li
“jipprivatizzaw” il-Knisja għall-grupp tagħhom, għal
pajjiżhom, għal ħbiebhom?
Hu ta’ swied il-qalb tara Knisja “privatizzata” minħabba f’dan
l-egoiżmu u dan in-nuqqas ta’ fidi.
Ta’ swied il-qalb! Meta nara lil
tant Insara fid-dinja jbatu, nibqa’ indifferenti jew inħoss li qed ibati
wieħed minn tal-familja? Meta
naħseb jew nismagħhom jgħidu li tant Insara qed jiġu ppersegwitati
u qed jagħtu saħansitra ħajjithom għall-fidi tagħhom,
dan imissli qalbi jew lanqas jasal għandi?
Qed ninfetaħ għal dak ħija jew dik oħti fil-familja
li qed tagħti ħajjitha għal Ġesù Kristu? Qed nitolbu għal xulxin? Nagħmlilkom mistoqsija, imma tweġbux
b’vuċi għolja, imma biss fil-qalb tagħkom: Kemm minnkom jitolbu
għall-Insara li huma ppersegwitati?
Kemm? Kull wieħed u
waħda jwieġeb fil-qalb tiegħu.
Jien qed nitlob għal dak ħija, għal dik oħti li
qiegħda f’diffikultà, biex tistqarr u tħares il-fidi
tagħha? Importanti li nħarsu
’l barra miċ-ċint tagħna, li nħossuna Knisja, familja
waħda ta’ Alla!
2. Immiddu
pass ieħor
u nistaqsu lilna nfusna: Din l-għaqda għandha xi ġrieħi? Nistgħu nferuha din l-għaqda? Sfortunatament naraw li fil-mixja ta’ l-istorja,
anki l-lum, mhux dejjem qed ngħixu din l-għaqda. Xi kultant jixref in-nuqqas ta’ ftehim,
il-kunflitt, it-tensjoni, il-firdiet, li jferuha, u allura l-Knisja ma
jkollhiex il-wiċċ li nixtiequ li jkollha, ma tirriflettix
l-imħabba, dak li jrid Alla minnha.
Aħna stess li noħolqu dan it-tiċrit fil-laħam! U jekk inħarsu lejn il-firdiet li
għadhom jeżistu bejn l-Insara, Kattoliċi, Ortodossi,
Protestanti… inħossu kemm m’hix faċli li din l-għaqda ssir
viżibbli b’mod sħiħ. Alla
jagħtina l-għaqda, imma aħna spiss inbatu biex
ngħixuha. Jeħtieġ
infittxu, nibnu l-komunjoni, nedukaw għall-komunjoni, biex nissuperaw kull
nuqqas ta’ ftehim u firdiet, ibda mill-familja, mir-realtajiet ekkleżjali,
fid-djalogu ekumeniku wkoll. Id-dinja
tagħna għandha bżonn ta’ l-għaqda, din hi epoka li fiha
lkoll għandna bżonn ta’ l-għaqda, għandna bżonn
tar-rikonċiljazzjoni, tal-komunjoni, u l-Knisja hi Dar tal-komunjoni. San Pawl lill-Insara ta’ Efesu qalilhom: “Inħeġġiġkom jien, il-priġunier
tal-Mulej, biex timxu sewwa skond is-sejħa li biha kontu msejħin;
billi bl-umiltà kollha, bil-ħlewwa u bis-sabar, taħmlu u tħobbu
’l xulxin. Ħabirku biex
iżżommu spirtu wieħed bir-rabta tas-sliem” (4:1-3). Umiltà, ħlewwa, ġenerożità,
imħabba biex inżommu sħiħa l-għaqda! Dawn, dawn huma t-toroq, it-toroq veri
tal-Knisja. Ejjew kull darba
nħossuhom ftit iżjed. Umiltà
kontra l-vanità, kontra s-suppervja, umiltà, ħlewwa, ġenerożità,
imħabba biex inżommu l-għaqda.
U jkompli San Pawl: ġisem wieħed, dak ta’ Kristu li
nirċievu fl-Ewkaristija; Spirtu wieħed, l-Ispirtu s-Santu li
jagħti l-ħajja u l-ħin kollu joħloq mill-ġdid
lill-Knisja; tama waħda, il-ħajja ta’ dejjem; fidi waħda,
Magħmudija waħda, Alla wieħed, Missier ta’ kulħadd (ara vv.
4-6). L-għana ta’ dak li
jgħaqqadna! U dan hu l-għana
tassew: dak li jgħaqqadna, mhux dak li jifridna. Dan hu l-għana tal-Knisja! Kull wieħed u waħda l-lum jistaqsi
lilu nnifsu: Qed ngħin biex toktor l-għaqda fil-familja,
fil-parroċċa, fil-komunità, jew moħħi biex
inpaċpaċ fuq dak u fuq l-oħra.
Jien qed inkun kawża ta’ firda, ta’ skumdità? Imma intom ma tafux xi ħsara
jagħmel it-tqassis lill-Knisja, lill-parroċċa,
lill-komunitajiet! Jagħmlilhom il-ħsara! It-tqassis jiftaħ il-feriti. In-Nisrani qabel ipaċpaċ irid
jigdem ilsienu! Iva jew le? Jigdem ilsienu: dan jagħmlilna tajjeb,
għax imbagħad ilsienna jintefaħ u ma jkunx jista’ jitkellem u ma
jkunx jista’ jqassas. Għandi
l-umiltà li bis-sabar kollu, bis-sagrifiċċju nħit mill-ġdid
il-ġrieħi ħalli nwassal għall-komunjoni?
3. Fit-tmiem hemm
l-aħħar pass iktar fil-fond. U
din hi mistoqsija sabiħa: Min hu l-mutur ta’ din l-għaqda
fil-Knisja? Hu l-Ispirtu s-Santu li
lkoll kemm aħna rċivejna fil-Magħmudija u anki fis-Sagrament
tal-Griżma. Hu l-Ispirtu
s-Santu. L-għaqda ta’ bejnietna
qabel xejn m’hix frott tal-kunsens tagħna, jew tad-demokrazija fil-Knisja,
jew ta’ l-isforz li nagħmlu biex naqblu ma’ xulxin, imma ġejja minnU
li kapaċi joħloq l-għaqda fid-diversità, għax l-Ispirtu
s-Santu hu armonija, dejjem iġib l-armonija fil-Knisja. Hi għaqda armonjuża f’tant
diversità ta’ kulturi, ta’ ilsna u ta’ ħsieb. Hu l-Ispirtu s-Santu l-mutur. Għalhekk hu importanti t-talb, li hu
r-ruħ ta’ l-impenn tagħna bħala rġiel u nisa ta’ komunjoni,
ta’ għaqda. It-talb lill-Ispirtu
s-Santu, biex jiġi u joħloq l-għaqda fil-Knisja.
Nitolbuh
lill-Mulej: Mulej, agħtina li nkunu dejjem iżjed magħquda, li ma
nkunu qatt strumenti ta’ firda; agħmel li nħabirku, kif tgħid
talba sabiħa Franġiskana, biex fejn hemm il-mibegħda
nħeġġu l-imħabba, fejn hemm il-ħtija nferrxu
l-maħfra, fejn hemm il-firda nġibu l-għaqda. Hekk ikun.
miġjuba mit-Taljan
għall-Malti minn Francesco Pio Attard