IL-PAPA FRANĠISKU
UDJENZA ĠENERALI
Pjazza
San Pietru
L-Erbgħa
25 ta’ Mejju
2016
20. It-talb
għajn ta’ Ħniena (ara Lq 18:1-8)
Għeżież
ħuti, l-għodwa t-tajba!
Il-parabbola
li għadna kemm smajna mill-Vanġelu (ara Lq 18:1-8) fiha tagħlima
importanti: “Għandhom dejjem jitolbu bla ma jaqtgħu” (v. 1). Mela qed
nitkellmu mhux fuq li nitolbu darba, meta jfettlilna. Le, Ġesù qed jgħidilna
li għandna “nitolbu dejjem, bla ma naqtgħu”. U jġibilna
l-eżempju ta’ l-armla u l-imħallef.
L-imħallef
hu persuna b’saħħitha, imsejħa biex taqta’ sentenzi skond
il-Liġi ta’ Mosè. Għalhekk it-tradizzjoni Biblika kienet tirrikkmanda
li l-imħallfin ikunu persuni li għandhom il-biża’ ta’ Alla,
denji tal-fidi, imparzjali u li ma jikkorrompux ruħhom (ara Eż
18:21). Għall-kuntrarju, dan l-imħallef “la kien jibża’ minn
Alla u lanqas iħabbel rasu minn ħadd” (v. 2). Kien imħallef
inġust, bla skrupli, li ma kienx jagħti kas tal-Liġi imma kien
jagħmel dak li jrid, skond l-interessi tiegħu. Għandu tmur
waħda armla biex jagħmlilha ħaqq. Ir-romol, flimkien ma’
l-iltiema u l-barranin, kienu l-iktar kategoriji dgħajfa tas-soċjetà.
Il-jeddijiet li kienet tiżguralhom il-Liġi setgħu jiġu
mżebilħa faċilment għax, billi kienu persuni waħidhom
u li ma kellhom lil ħadd jiddefendihom, diffiċilment kellhom siwi
f’għajnejn xi ħadd: armla, hemm, waħidha, bla m’għandha
ħadd min jaqbeż għaliha, setgħu ma jagħtux kasha, u
lanqas jagħmlulha ħaqq. Hekk ukoll l-iltim, hekk ukoll il-barrani,
l-immigrant: f’dak iż-żmien din il-problematika kienet
b’saħħitha ħafna. Quddiem l-indifferenza ta’ l-imħallef,
l-armla ddur għall-arma waħdanija li għandha: li b’insistenza
kbira tkompli ddejqu, billi tressaqlu t-talba tagħha biex jagħmlilha
ħaqq. U propju b’din il-perseveranza tilħaq l-iskop tagħha.
Fil-fatt, l-imħallef, f’ċertu punt jisma’ talbha, mhux għax hu
mqanqal mill-ħniena, lanqas għax il-kuxjenza timponilu dan;
sempliċement jammetti: “Għax din l-armla dejqitni, ħa
nagħmlilha ħaqq, biex ma tibqax ġejja u sejra sa ma tifnini” (v.
5).
Minn
din il-parabbola Ġesù joħroġ b’konklużjoni doppja: jekk
l-armla bit-talbiet insistenti tagħha rnexxielha tikkonvinċi
lill-imħallef diżonest, forsi Alla, li hu Missier tajjeb u ġust,
iżjed u iżjed “lill-magħżulin tiegħu li jgħajtulu
lejl u nhar, sejjer ma jagħmlilhomx ħaqq”; u barra minn hekk “se
joqgħod itawwal magħhom”, flok jaġixxi “malajr” (vv. 7-8).
Għalhekk
Ġesù jsejħilna biex nitolbu “bla ma naqtgħu”. Kollha
ngħaddu minn mumenti ta’ għeja u ta’ qtigħ il-qalb, fuq kollox
meta t-talba tagħna donnha m’hix tħalli frott. Imma Ġesù
jiżgurana: b’differenza mill-imħallef diżonest, Alla malajr
jisma’ lil uliedu, anki jekk dan ma jfissirx li jagħmlu skond
iż-żminijiet u bil-manjiera li rridu aħna. It-talb m’hux xi
bakketta maġika! Hu jgħinna nżommu sħiħa l-fidi
tagħna f’Alla, biex nafdaw Fih imqar meta ma nifhmux ir-rieda tiegħu.
F’dan, Ġesù nnifsu – li tant kien jitlob! – hu ta’ eżempju
għalina. L-Ittra lil-Lhud tfakkarna li “meta kien jgħix fuq din
l-art, Kristu offra talb u suppliki b’leħen għoli u bid-dmugħ
lil dak li seta’ jsalvah mill-mewt. U kien mismugħ minħabba fil-qima
tiegħu lejn Alla” (5:7). Ma’ l-ewwel daqqa t’għajn din
l-affermazzjoni ma tantx tidher possibbli, għax Ġesù miet fuq
is-salib. Imma l-Ittra lil-Lhud m’hix tiżbalja: Alla tassew salva lil
Ġesù mill-mewt u tah rebħa sħiħa fuqha, imma t-triq li mexa
biex kiseb din ir-rebħa kellha tgħaddi mill-mewt infisha!
Ir-riferiment għas-supplika li Alla sema’ jfakkarna fit-talba ta’
Ġesù fil-Ġetsemani. Mifni mill-ħsieb tat-tbatija li kienet
ġejja fuqu, Ġesù jitlob lill-Missier jeħilsu mill-kalċi
morr tal-passjoni, imma t-talba tiegħu hi mimlija fiduċja
fil-Missier, dik il-fiduċja għamja fir-rieda tiegħu: “Imma”,
jgħid Ġesù, “mhux kif irrid jien, iżda kif trid int” (Mt 26:39).
L-oġġett tat-talb jaqa’ fit-tieni post; dak li jiswa qabel kollox hu
r-relazzjoni mal-Missier. Araw x’jagħmel it-talb: jittrasforma x-xewqa u
jsawwarha skond ir-rieda ta’ Alla, hi x’inhi din ir-rieda, għax min jitlob
jixxennaq qabel xejn għall-għaqda tiegħu ma’ Alla, li hu Mħabba
ħanina.
Il-parabbola
tagħlaq b’mistoqsija: “Imma taħsbu intom li Bin il-bniedem se jsib
il-fidi fuq l-art meta jiġi?” (v. 8). U b’din il-mistoqsija kollha qed
niġu mwissijin: m’għandniex naqtgħu qalbna nitolbu, anki jekk ma
nsibux tweġiba. Hu t-talb li jżomm il-fidi ħajja, mingħajru
l-fidi togħtor! Nitolbu lill-Mulej fidi li ssir talba bla waqfien,
perseveranti, bħal dik ta’ l-armla tal-parabbola, fidi li tixrob qawwietha
mix-xewqa għall-miġja tiegħu. U fit-talb induqu l-mogħdrija
ta’ Alla, li bħala Missier jiġi jiltaqa’ ma’ wliedu kollu mħabba
ħanina għalihom.
miġjub
mit-Taljan għall-Malti minn Francesco Pio Attard