IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 24 ta’ Ġunju 2015
Il-Familja – 20. Ġrieħi
(I)
Għeżież ħuti, l-għodwa
t-tajba!
Fl-aħħar katekeżi tkellimna dwar
il-familja li ġġarran id-dgħufija tal-qagħda umana,
il-faqar, il-mard, il-mewt. Il-lum sa
nirriflettu fuq il-ġrieħi li jinfetħu sewwa sew fi ħdan
il-konvivenza familjari. Jiġifieri,
meta fil-familja nfisha nweġġgħu lil xulxin. L-ikreh ħaġa!
Nafu sewwa li fl-ebda storja familjari ma jonqsu
l-mumenti fejn l-intimità ta’ l-aktar relazzjonijiet għeżież ta’ mħabba
tisfa’ mweġġgħa
mill-imġiba
tal-membri tagħha. Kliem u
għemejjel (u nuqqas ta’ għemil!) li, flok jesprimu l-imħabba,
joħonquha u, agħar u agħar, ikasbruha. Meta dawn il-ġrieħi, li għadna
nistgħu nfejquhom, nittraskurawhom, imorru għall-agħar: jinbidlu
fi prepotenza, ostilità, disprezz.
U hemm huma jinbidlu f’tiċrit qawwi, li jifred
il-miżżewġin, u jwasslu biex dak li jkun imur ifittex
band’oħra min jifhmu, iwieżnu u jfarrġu. Imma spiss dan it-“tweżin” ma jkollux
għal qalbu l-ġid tal-familja!
It-tbattil ta’ l-imħabba konjugali jġib
ċerta rabja għal xulxin fir-relazzjonijiet. U spiss l-effetti tal-firda “jaqgħu” fuq
it-tfal.
Hekk hu, it-tfal. Nixtieq nieqaf ftit fuq dan il-punt. Minkejja s-sensibbiltà tagħna li minn barra donnha żdiedet,
u l-analiżijiet psikoloġiċi raffinati tagħna, nistaqsi jekk
forsi mewwitniex ukoll ir-rispett lejn il-ġrieħi f’qalb it-tfal. Iktar ma nippruvaw nagħmlu tajjeb
b’rigali u ħelu, aktar nitilfu s-sens tal-ġrieħi – iktar ta’
wġigħ il-qalb u qawwija – tar-ruħ. Spiss nitkellmu fuq disturbi fl-imġiba,
fuq saħħa psikika, fuq il-ġid tat-tifel, fuq l-ansjetà tal-ġenituri u ta’ l-ulied… Imma għadna nafu xi tkun ġerħa
fil-qalb? Qed inħossu t-toqol
tal-muntanja li jgħattan il-qalb ta’ tifel ċkejken, fil-familji fejn
nagħmlu l-ħsara lil xulxin, sa ma ntertqu dik ir-rabta ta’ fedeltà konjugali?
X’piż għandha fuq l-għażliet tagħna –
għażliet żbaljati, ngħidu aħna – il-qalb
tat-tfal? Meta l-adulti jitilfu rashom,
meta kulħadd jibda jaħseb biss għalih innifsu, meta l-omm u
l-missier jagħmlu l-ħsara lil xulxin, il-qalb tat-tfal tbati
ħafna, tħossha trid tiddispra.
U huma ġrieħi li jimmarkaw il-ħajja kollha.
Fil-familja, kollox marbut flimkien: meta
r-ruħ tagħha hi miġruħa xi mkien, l-infezzjoni tmarrad
kollox. U meta raġel u mara, li
impenjaw ruħhom biex ikunu “ġisem wieħed” u jibnu familja,
jaħsbu ossessivament fil-bżonn tagħhom li jkunu ħielsa u
jiggratifikaw ruħhom, dan it-tagħwiġ tal-verità jolqot bil-kbir il-qalb u l-ħajja ta’
wliedhom. Ħafna drabi t-tfal imorru
jistaħbew biex jibku waħidhom…
Dan irridu nifhmuh sewwa.
Raġel u mara huma ġisem wieħed. Imma wliedhom huma laħam minn
laħamhom. Jekk naħsbu kemm
kien iebes Ġesù meta wissa lill-kbar biex ma jagħtux skandlu lit-tfal
iż-żgħar – smajnieha s-silta mill-Vanġelu (ara Mt 18:6) –,
nistgħu nifhmu aħjar ukoll il-kelma tiegħu fuq ir-responsabbiltà għolja li l-bniedem jindokra r-rabta
konjugali li tagħti bidu lill-familja umana (ara Mt 19:6-9). Meta r-raġel u l-mara saru ġisem
wieħed, il-ġrieħi u l-abbandun kollu ta’ l-omm u l-missier iħallu
l-effett tagħhom fuq il-ġisem ħaj ta’ l-ulied.
Hu minnu, mill-banda l-oħra, li hemm
każi fejn is-separazzjoni ma tistax tevitaha. Kull tant tista’ ssir saħanistra
moralment meħtieġa, meta appuntu qed nitkellmu dwar li
nneħħu lill-parti l-iżjed dgħajfa, jew lit-tfal
żgħar, l-iżjed ġrieħi gravi kkawżati
mill-prepotenza u mill-vjolenza, mill-umiljazzjoni u l-abbuż, mill-bruda u
l-indifferenza.
Għall-grazzja ta’ Alla, ma jonqsux dawk li,
imwieżna mill-fidi u mill-imħabba għall-ulied, jagħtu
xhieda tal-fedeltà tagħhom lejn rabta li fiha emmnu, ikun
kemm ikun jidher impossibbli li jagħtuha l-ħajja mill-ġdid. Mhux is-separati kollha, imma, iħossu
din il-vokazzjoni. Mhux kollha
jagħrfu, fis-solitudni, is-sejħa li qed jagħmlilhom
il-Mulej. Madwarna għandna divesi
familji f’sitwazzjonijiet hekk imejħa irregolari – lili ma
togħġobnix din il-kelma – u dawn iġagħluna nagħmlu ħafna
mistoqsijiet. Kif nistgħu
ngħinuhom? Kif nagħmlu biex
nakkumpanjawhom? Kif nakkumpanjawhom
biex uliedhom ma jispiċċawx ostaġġi tal-missier jew ta’
l-omm?
Nitolbu lill-Mulej fidi kbir, biex inħarsu
lejn ir-realtà mill-għajnejn ta’ Alla; u mħabba kbira,
biex nersqu qrib tal-persuni bl-istess qalb ħanina tiegħu.
miġjuba
mit-Taljan għall-Malti minn Francesco Pio Attard