IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 24 ta’ Frar
2016
8.
Ħniena u Poter
Għeżież ħuti, l-għodwa
t-tajba!
Inkomplu bil-katekeżi tagħna dwar il-ħniena
fl-Iskrittura Mqaddsa. F’diversi
partijiet jissemmew is-setgħana, is-slaten, il-bnedmin li qegħdin
“fil-għoli”, u anki l-arroganza tagħhom u l-abbuż
tal-poter. L-għana u l-poter huma
realtajiet li jistgħu jkunu tajbin u siewja għall-ġid komuni,
jekk imqiegħda għas-servizz tal-foqra u ta’ kulħadd,
b’ġustizzja u mħabba. Imma
meta, kif jiġri ta’ spiss, wieħed jgħixhom bħala
privileġġ, b’egoiżmu u prepotenza, jinbidlu f’għodda ta’
korruzzjoni u mewt. Dan hu li jiġri
fl-episodju ta’ l-għalqa tad-dwieli ta’ Nabot, irrakkuntat fl-Ewwel Ktieb
tas-Slaten, fil-kapitlu 21, li fuqu sa nieqfu nirriflettu l-lum.
F’din is-silta naqraw kif is-sultan ta’ Israel,
Aħab, ried jixtri l-għalqa ta’ wieħed jismu Nabot, għax din
l-għalqa kienet tmiss mal-palazz irjali.
Il-proposta tidher leġittima, saħansitra ġeneruża,
imma f’Israel il-propjetà ta’ l-art kienet meqjusa kważi
inaljenabbli. Fil-fatt il-ktieb
tal-Levitiku hekk jistipula: “L-art,
imbagħad, ma għandhiex tinbiegħ għal dejjem, għax l-art hi tiegħi, u intom
qiskom frustieri jew qegħdin miegħi”
(Lev 25:23). L-art hi qaddisa, għax hi don ta’ Alla,
u għalhekk għandha tiġi mħarsa u miżmuma hekk,
bħala sinjal tal-barka divina li tgħaddi minn nisel għal nisel u
garanzija ta’ dinjità għal kulħadd.
Allura wieħed jifhem għaliex Nabot lis-sultan qallu le:
“Iħarisni l-Mulej
milli qatt nagħtik wirt missirijieti”
(1 Slat 21:3).
Għal dan ir-rifjut is-sultan Aħab
irreaġixxa b’diqa u korla.
Ħassu offiż – hu s-sultan, dak li għandu s-setgħa –,
umiljat fl-awtorità tiegħu ta’ sovran, u ffrustrat fil-possibbiltà li
jissodisfa x-xewqa tiegħu li jikseb xi ħaġa. Meta ratu daqshekk ħosbien, martu
Ġeżabel, sultana pagana li kienet kebbset f’Israel il-kulti ta’
idolatrija u qatlet il-profeti tal-Mulej (ara 1 Slat 18:4), – ma kinitx kerha,
kienet kattiva! – iddeċidiet li tidħol hi fin-nofs. Il-kelmiet li bihom iddur fuq is-sultan
għandhom sinifikat qawwi ħafna.
Isimgħu l-ħażen wara din il-mara: “Issa int tridha ta’ sultan fuq
Israel?
Qum,
ħu xi
ħaġa ta’ l-ikel, u tieħu r-ruħ.
Jiena nagħtihielek l-għalqa tad-dwieli ta’ Nabot, il-Ġeżragħeli”
(v. 7). Hi tagħfas fuq il-prestiġju
u fuq is-setgħa tas-sultan, li, skond kif kienet taraha hi, kienu qed
jiġu mhedda mir-rifjut ta’ Nabot.
Poter li min-naħa tagħha hi kienet tqisu assolut, u li
għalih kull xewqa tas-sultan setgħan issir ordni. Il-kbir Sant’Ambroġ kiteb ktejjeb ċkejken
fuq din il-ġrajja. Jismu
“Nabot”. Sew kieku naqrawh f’dan
iż-żmien tar-Randan. Hu
sabiħ ħafna, konkret ħafna.
Ġesù, meta jfakkarna f’dawn
il-ħwejjeġ, jgħidilna: “Tafu intom, fost il-pagani l-kapijiet qegħdin biex jikkmandawhom, u l-kbarat biex iħaddmu
fuqhom is-setgħa.
Fostkom ma għandux ikun hekk; imma
min irid ikun kbir fostkom, għandu
jkun qaddej tagħkom, u min irid ikun l-ewwel
fostkom, għandu jkun l-ilsir tagħkom”
(Mt 20:25-27). Jekk nitilfu d-dimensjoni tal-qadi,
is-setgħa tinbidel f’arroganza u ssir ħakma u abbuż
tal-poter. Dan hu sewwa sew li
jiġri fl-episodju ta’ l-għalqa tad-dwieli ta’ Nabot. Ġeżabel, is-sultana, bla skrupli ta’
xejn, tiddeċiedi li teqred lil Nabot u twettaq il-pjan li ħmiet f’moħħha. Tinqeda bil-qerq ta’ legalità perversa:
tibgħat, f’isem is-sultan, ittri lix-xjuħ u lill-kbarat tal-belt
tordnalhom iqabbdu xhieda foloz li jixlu pubblikament lil Nabot li seħet
lil Alla u lis-sultan, att kriminali li l-kastig għalih kien il-mewt. Hekk, meta Nabot ikun miet, is-sultan ikun
jista’ jieħu f’idejh l-għalqa tad-dwieli tiegħu. U din m’hix xi storja ta’ dari, hi anki
l-istorja tal-lum, tas-setgħana li biex jagħmlu iktar flus lesti li
jabbużaw mill-foqra, jabbużaw min-nies. Hi l-istorja tat-traffikar tal-persuni, tax-xogħol
imjassar, tan-nies foqra li jitħaddmu kontra l-liġi u b’pagi baxxi
biex jimlew il-bwiet ta’ min hu b’saħħtu. Hi l-istorja tal-politiċi korrotti li
jridu iżjed u iżjed u iżjed!
Għalhekk għidtilkom li nagħmlu sew naqraw dak il-ktieb
ta’ Sant’Ambroġ dwar Nabot, għax hu ktieb attwali ħafna.
Sa hawn iwassal it-tħaddim ta’ awtorità bla
rispett għall-ħajja, bla ġustizzja, bla ħniena. Araw naqra fejn iwassal l-għatx
għall-poter: isir kilba li trid taħtaf kollox. F’dan ir-rigward, nistgħu niddawlu partikularment
minn silta mill-profeta Isaija. Fiha,
il-Mulej jiftħilna għajnejna mir-regħba tas-sidien għonja ta’
l-art li dejjem iridu jaħtfu taħt idejhom iżjed djar u
artijiet. U jgħid il-profeta
Isaija:
“Gwaj għal dawk li jżidu dar ma’ dar,
u jgħaqqdu
għalqa ma’ għalqa,
sakemm ma jibqax aktar wisa’
u tibqgħu
tgħammru weħidkom
f’nofs il-pajjiż!” (Is 5:8).
U l-profeta Isaija ma kienx Komunista! Imma Alla hu ogħla mill-ħażen
u mil-logħob maħmuġ tal-bnedmin.
Fil-ħniena tiegħu hu jibgħat lill-profeta Elija biex
jgħin lil Aħab jikkonverti.
Issa naqilbu l-paġna, u kif tkompli l-istorja? Alla jara dan l-att kriminali u jħabbat
ukoll fuq il-qalb ta’ Aħab, u s-sultan, meta jsib ruħu wiċċ
imb’wiċċ mad-dnub tiegħu, jifhem, jiċċekken u jitlob
maħfra. Kemm tkun ħaġa
sabiħa kieku dawk li l-lum qed jabbużaw mis-setgħa tagħhom kellhom
jagħmlu l-istess! Il-Mulej jilqa’
l-indiema tiegħu; madankollu, ġiet maqtula ħajja innoċenti,
u l-ħtija li saret għandha konsegwenzi li wieħed ma jistax
jaħrab minnhom. Il-ħażen li
twettaq fil-fatt iħalli l-marki koroh tiegħu, u l-istorja tal-bnedmin
iġġorr il-ġrieħi tiegħu.
Il-ħniena anki hawn turina t-triq
għalliema li għandna nimxu.
Il-ħniena tista’ tfejjaq il-ġrieħi u tista’ tibdel
l-istorja. Iftaħ qalbek għall-ħniena! Il-Ħniena divina hi aqwa mid-dnub
tal-bnedmin. Hi aktar
b’saħħitha, dan hu l-eżempju li nsibu fl-istorja ta’
Aħab! Aħna nagħrfu
x’qawwa għandha meta niftakru fil-miġja ta’ l-Iben Innoċenti ta’
Alla li sar bniedem biex bil-maħfra tiegħu jeqred il-ħażen. Ġesù Kristu hu s-sultan veru, imma
s-setgħa tiegħu hi għal kollox differenti. It-tron tiegħu hu s-salib. Hu m’huwiex sultan li joqtol, imma
għall-kuntrarju, jagħti l-ħajja.
Hu joħroġ jiltaqa’ ma’ kulħadd, speċjalment ma’
l-iżjed dgħajfa, u b’dan il-mod jegħleb is-solitudni u d-destin
tal-mewt li għalihom iwassal id-dnub.
Ġesù Kristu bil-qrubija u l-ħlewwa tiegħu
jdaħħal lill-midinbin fl-ispazju tal-grazzja u tal-maħfra. U din hi l-ħniena ta’ Alla.
miġjub
mit-Taljan għall-Malti minn Francesco Pio Attard