IL-PAPA FRANĠISKU
UDJENZA
ĠENERALI
Pjazza San Pietru
L-Erbgħa 23 ta’ Ottubru 2013
Għeżież ħuti, l-għodwa t-tajba!
Inkomplu bil-katekeżi fuq il-Knisja, u l-lum nixtieq
inħares lejn Marija bħala xbieha u mudell tal-Knisja. Biex nagħmel dan nixtieq naqbad
espressjoni tal-Konċilju Vatikan II.
Tgħidilna l-Kostituzzjoni Lumen
gentium: “Omm Alla, kif diġà għallem San Ambroġ, hija xbieha tal-Knisja fl-ordni tal-fidi, tal-karità u ta’ l-għaqda perfetta ma’ Kristu” (nru 63).
1. Nitilqu mill-ewwel aspett, Marija bħala mudell tal-fidi.
F’liema sens Marija tirrappreżenta mudell għall-fidi
tal-Knisja? Naħsbu ftit f’min
kienet il-Verġni Marija: tfajla Lhudija, li kienet tistenna b’qalbha kollha
l-fidwa tal-poplu tagħha. Imma
f’dik il-qalb ta’ bint żagħżugħa ta’ Israel kien hemm
moħbi sigriet li hi stess kienet għadha ma tafx bih: fil-pjan ta’
mħabba ta’ Alla kienet iddestinata biex issir l-Omm tal-Feddej. Fit-Tħabbira, il-Mesaġġier ta’
Alla jsejħilha “mimlija bil-grazzja” u juriha liema hu dan il-pjan. Marija twieġeb “iva” u minn dak il-waqt
il-fidi ta’ Marija tilqa’ fiha dawl ġdid: tikkonċentra fuq Ġesù,
l-Iben ta’ Alla li minnha ħa l-ġisem u li fih jitwettqu
l-wegħdiet ta’ l-istorja kollha tas-salvazzjoni. Il-fidi ta’ Marija hi t-twettiq tal-fidi ta’
Israel, sewwa sew fiha tinġabar il-mixja kollha, it-triq kollha ta’ dak
il-poplu li kien qed jistenna l-fidwa, u f’dan is-sens hi l-mudell tal-fidi
tal-Knisja, li għandha bħala ċ-ċentru tagħha lil
Kristu, inkarnazzjoni ta’ l-imħabba infinita ta’ Alla.
Kif għexitha Marija din il-fidi? Għexitha fis-sempliċità ta’ l-elf ħsieb
u preokkupazzjoni li ta’ kuljum ikollha kull omm, fuq kif ħa tħejji l-ikel, il-ħwejjeġ, u tieħu ħsieb
id-dar… Kienet propju din
l-eżistenza normali tal-Madonna l-art li fuqha kibret relazzjoni singulari
u djalogu profond bejnha u bejn Alla, bejnha u bejn Binha. L-“iva” ta’ Marija, diġà perfetta fil-bidu, issoktat tikber sas-siegħa
tas-Salib. Hemm il-maternità tagħha twessgħet biex ħaddnet magħha
lil kull wieħed u waħda minna, il-ħajja tagħna, biex
twassalna għal għand Binha.
Marija għexet dejjem mgħaddsa fil-misteru ta’ Alla
magħmul bniedem, bħala l-ewwel dixxiplu perfett tiegħu,
taħseb fuq kull ħaġa bejnha u bejn ruħha fid-dawl ta’
l-Ispirtu s-Santu, biex tista’ tifhem ir-rieda ta’ Alla u tqegħidha kollha
fil-prattika.
Nistgħu nistaqsu lilna nfusna: Qed inħallu
ddawwalna l-fidi ta’ Marija, li hi l-Omm tagħna? Jew nistħajluha ’l bogħod minna,
wisq differenti minna? Fil-mumenti ta’
diffikultà, ta’ prova, ta’ dalma, qed inħarsu lejha bħala mudell ta’
fiduċja f’Alla, li trid dejjem u biss il-ġid tagħna? Naħsbu fuq dan, forsi jiswielna li
nerġgħu nsibu f’Marija mudell u figura tal-Knisja f’din il-fidi li hi
kellha!
2. Niġu għat-tieni aspett: Marija mudell ta’ karità.
B’liema mod Marija hi għall-Knisja eżempju dejjem ħaj ta’
mħabba? Naħsbu ftit fuq
id-disponibbiltà tagħha fil-konfront ta’ qaribtha Eliżabetta. Meta marret iżżurha, il-Verġni
Marija ma ħaditilhiex biss għajnuna materjali, dan ukoll, imma
wasslitilha lil Ġesù, li diġà kien jinsab f’ġufha. Li ħadet lil Ġesù f’dik id-dar kien
ifisser li ħadet il-ferħ, il-ferħ sħiħ. Eliżabetta u Żakkarija kienu
ferħana b’dik it-tqala li kienet tidher impossibbli għall-età
tagħhom, imma hi x-xbejba Marija li twasslilhom il-ferħ
sħiħ, dak li jiġi minn Ġesù u mill-Ispirtu s-Santu u
jesprimi ruħu f’li nagħmlu karità bla ma nistennew ħlas, f’li
naqsmu ma’ l-oħrajn, f’li ngħinu lil xulxin, f’li nifhmu lil xulxin.
Anki lilna l-Madonna trid iġġibilna, lilna
lkoll, id-don kbir li hu Ġesù; u miegħU twasslilna l-imħabba
tiegħu, il-paċi tiegħu, il-ferħ tiegħu. Hekk il-Knisja hi bħal Marija: il-Knisja
m’hix negozju, m’hix xi aġenzija umanitarja, il-Knisja m’hix NGO,
il-Knisja hi mibgħuta biex twassal lil Kristu u l-Vanġelu tiegħu
għand kulħadd; ma twassalx lilha nfisha – sew jekk żgħira,
sew jekk kbira, sew jekk b’saħħitha, sew jekk dgħajfa, il-Knisja
twassal lil Ġesù u trid tkun bħal Marija meta marret iżżur
lil Eliżabetta. X’ħaditilha
magħha Marija? Lil Ġesù. Il-Knisja ġġorr lil Ġesù: din
hi l-qalba tal-Knisja, li twassal lil Ġesù! Nagħmlu mod xi darba jiġri li
l-Knisja ma twassalx lil Ġesù, dik tkun Knisja mejta! Il-Knisja trid twassal il-karità ta’ Ġesù,
l-imħabba ta’ Ġesù, il-karità ta’ Ġesù.
Tkellimna dwar Marija, dwar Ġesù. U aħna?
Aħna li aħna l-Knisja?
Liema mħabba qed inwasslu lill-oħrajn? Hi l-imħabba ta’ Ġesù, li taqsam
ma’ l-oħrajn, li taħfer, li takkumpanja, jew hi mħabba miżjuda
bl-ilma, kif jispiċċa l-inbid li jidher qisu ilma? Hi mħabba qawwija, jew dgħajfa tant
li timxi mas-simpatiji, li tfittex x’ħa tikseb lura, imħabba
interessata? Mistoqsija oħra: Lil
Ġesù togħġbu l-imħabba interessata? Le, ma togħġbux, għax
l-imħabba trid tkun gratuwita, bħal tiegħu. Kif qed ikunu r-relazzjonijiet fil-parroċċi
tagħna, fil-komunitajiet tagħna?
Qed nittrattaw lil xulxin ta’ aħwa?
Jew niġġudikaw lil xulxin, nitkellmu ħażin fuq
xulxin; nagħtu kas tal-“ġnien ċkejken” tagħna, jew
nagħtu kas ta’ xulxin? Huma
mistoqsijiet ta’ karità!
3. U l-aħħar aspett fil-qosor: Marija mudell ta’ għaqda ma’ Kristu. Il-ħajja tal-Verġni Mqaddsa kienet
ħajja ta’ mara tal-poplu tagħha: Marija kienet titlob, taħdem,
tmur is-sinagoga… Imma kull għemil tagħha
kienet twettqu dejjem f’għaqda perfetta ma’ Ġesù. Din l-għaqda tilħaq il-qofol
tagħha fuq il-Kalvarju: hawn Marija tingħaqad ma’ Binha fil-martirju
tal-qalb u fl-offerta ta’ ħajtu lill-Missier għall-fidwa
tal-bnedmin. Il-Madonna daqet propju
mill-uġigħ ta’ Binha u miegħU laqgħet ir-rieda tal-Missier,
b’dik l-ubbidjenza li tagħti l-frott, li ġġib ir-rebħa vera
fuq il-ħażen u fuq il-mewt.
Kemm hi sabiħa din ir-realtà li tgħallimna
Marija: li nkunu dejjem magħqudin ma’ Ġesù! Nistgħu nistaqsu lilna nfusna: Niftakru
f’Ġesù biss meta tmur xi ħaġa żmerċ jew niġu
bżonn xi ħaġa, jew għandna miegħu relazzjoni kontinwa,
ħbiberija profonda, anki meta dan ifisser li nimxu warajh fit-triq
tas-salib?
Nitolbu lill-Mulej jagħtina l-grazzja tiegħu,
il-qawwa tiegħu, biex ħajjitna u l-ħajja ta’ kull komunità
ekkleżjali jirriflettu l-mudell ta’ Marija, Omm il-Knisja. Hekk ikun!
miġjuba mit-Taljan
għall-Malti minn Francesco Pio Attard