IL-PAPA FRANĠISKU
UDJENZA ĠENERALI
L-Erbgħa
22 ta’ Ġunju
2016
24. Il-Ħniena
tnaddaf il-qalb (ara Lq 5:12-16)
Għeżież
ħuti, l-għodwa t-tajba!
“Mulej, jekk trid,
tista’ tnaddafni!” (Lq 5:12): din hi t-talba li għadna kemm smajna ssir
lil Ġesù minn wieħed imġiddem. Dan ir-raġel mhux biss qed
jitlob li jiġi mfejjaq, imma li jiġi “mnaddaf”, jiġifieri
mogħti lura s-saħħa sħiħa, fil-ġisem u fil-qalb.
Fil-fatt, il-ġdiem kien meqjus għamla ta’ saħta minn Alla,
tinġis qawwi minn ġewwa. L-imġiddem kellu jżomm bogħod
minn kulħadd; ma setax jidħol fit-Tempju u fl-ebda servizz divin.
Imbiegħed minn Alla u mbiegħed mill-bnedmin. X’ħajja ta’ dwejjaq
kienu jgħixu dawn in-nies!
Madankollu, dak
l-imġiddem ma jirrassenjax ruħu għall-mard u lanqas għal
dawn ir-regolamenti li kienu jagħmlu minnu bniedem eskluż. Biex
jilħaq lil Ġesù, ma beżax jikser il-liġi u qabad u
daħal fil-belt – ħaġa li ma kellux jagħmel, dan kien
ipprojbit –, u meta sabu, “mar u nxteħet
wiċċu fl-art quddiemu jitolbu u jgħidlu: ‘Mulej, jekk
trid, tista’ tfejjaqni’”
(v. 12). Dak kollu li jagħmel u jgħid dan il-bniedem, meqjus impur, hu
espressjoni tal-fidi tiegħu! Jagħraf il-qawwa ta’ Ġesù: hu
żgur li għandu s-setgħa li jfejqu u jaf li kollox jiddipendi fuq
ir-rieda tiegħu. Din il-fidi li tatu l-qawwa jikser kull norma u jfittex
li jiltaqa’ ma’ Ġesù u, għarkubbtejh quddiemu, isejjaħlu
“Mulej”. It-talba ta’ l-imġiddem turi li meta nersqu għand Ġesù
m’hemmx bżonn nagħmlu diskorsi twal. Biżżejjed ftit kliem,
basta msieħba mill-fiduċja sħiħa fil-qawwa tiegħu bla
tarf u fit-tjieba tiegħu. Fil-fatt, li nafdaw ruħna fir-rieda ta’
Alla jfisser li nintelqu f’idejn il-ħniena bla tarf tiegħu. Anki jien
ħa naqsam magħkom xi ħaġa personali. Fil-għaxija,
qabel nidħol fis-sodda, jien nagħmel din it-talba qasira: “Mulej,
jekk trid, tista’ tfejjaqni!”. U nitlob għal ħames darbiet
il-Missierna, waħda għal kull pjaga ta’ Ġesù, għax
Ġesù saffiena bil-pjagi tiegħu. U jekk dan nagħmlu jien,
tistgħu tagħmluh intom ukoll, id-dar, u tgħidu: “Mulej, jekk
trid, tista’ tfejjaqni!” u ġġibu f’moħħkom il-pjagi ta’
Ġesù u tgħidu Missierna f’ġieħ kull waħda minnhom. U
Ġesù dejjem jismagħna.
Ġesù
jħossu profondament milqut minn dan il-bniedem. Il-Vanġelu ta’ Mark
josserva li, “imqanqal mill-ħniena, Ġesù medd idu fuqu,
messu u qallu: ‘Irrid,
kun imnaddaf’”
(1:41). Il-ġest ta’ Ġesù jmur id f’id ma’ kliemu u jagħmel
tagħlimu iżjed espliċitu. Kontra dak li kienet tamar
il-Liġi ta’ Mosè, li kienet tipprojbixxi li xi ħadd jersaq lejn
wieħed imġiddem (ara Lev 13:45-46), Ġesù jnewwillu idu u
saħansitra jmissu. Kemm drabi niltaqgħu ma’ xi fqir li jiġi
jiltaqa’ magħna! Kapaċi nkunu wkoll ġenerużi, tista’
tiġina ħniena, imma s-soltu ma mmissuhx. Noffrulu xi munita,
nixħtuhielu hemm, imma nevitaw li mmissu ma’ jdejh. U ninsew li dak hu l-ġisem
ta’ Kristu! Ġesù jgħallimna ma nibżgħux immissu lill-fqir u
lill-imwarrab, għax hu jinsab fihom. Jekk immissu lill-fqir, dan jista’
jnaddafna mill-wiċċ b’ieħor u jġagħalna ninkwetaw
għall-qagħda tiegħu. Immissu lill-imwarrbin. Il-lum għandi
miegħi lil dawn iż-żgħażagħ. Ħafna
jaħsbu li aħjar kieku baqgħu f’arthom, imma hemm kienu qed ibatu
wisq. Dawn huma r-rifuġjati tagħna, imma ħafna jżommuhom b’esklużi.
Nitlobkom, dawn huma ħutna! In-Nisrani ma jista’ jħalli lil ħadd
barra, għandu post għal kulħadd, iħalli lil kulħadd
jidħol.
Wara li fejjaq
lill-imġiddem, Ġesù ordnalu ma jitkellem ma’ ħadd, imma
jgħidlu: “Mur uri ruħek lill-qassis, u agħmel offerta għall-fejqan tiegħek, kif ordna Mosè,
biex hekk tagħtihom xhieda li inti fiqt” (v.
14). Dan li ried Ġesù jurina ta’ l-inqas tliet affarijiet. L-ewwel:
il-grazzja li taġixxi fina ma tfittixx is-sensazzjonaliżmu. Hi
mdorrija tiċċaqlaq b’diskrezzjoni u bla ħafna storbju. Biex
tfejjaq il-ġrieħi tagħna u tmexxina fit-triq tal-qdusija hi
taħdem billi ssawwar bis-sabar il-qalb tagħna fuq il-Qalb ta’
Ġesù, biex hekk nagħmlu dejjem iżjed tagħna
l-ħsibijiet u s-sentimenti tiegħu. It-tieni: bil-verifika
uffiċjali tal-fejqan li seħħ fuqu quddiem il-qassisin u
ċ-ċelebrazzjoni tas-sagrifiċċju ta’ tpattija,
l-imġiddem jerġa’ jiġi milqugħ fil-komunità ta’ dawk li
jemmnu u fil-ħajja soċjali. Jerġa’ jiġi integrat b’mod
sħiħ u dan iwettaq għal kollox il-fejqan. Kif kien talab hu
stess, issa hu mnaddaf għal kollox! Fl-aħħar, meta
jippreżenta ruħu quddiem il-qassisin, l-imġiddem jagħtihom
xhieda ta’ Ġesù u ta’ l-awtorità messjanika tiegħu. Il-qawwa
tal-kompassjoni li biha Ġesù fejjaq lill-imġiddem wasslet il-fidi ta’
dan il-bniedem biex tinfetaħ għall-missjoni. Hu kien imwarrab, issa
hu wieħed minna.
Ejjew naħsbu
fina, fil-miżerji tagħna… Kull wieħed u waħda minna
għandu tiegħu. Naħsbu b’sinċerità. Kemm drabi
ngħattuhom bil-wiċċ b’ieħor tal-“manjieri tajba”. U sewwa
sew hemm jeħtieġ li noqogħdu waħidna, ninżlu
għarkubbtejna quddiem Alla u nitolbu: “Mulej, jekk trid, tista’ tfejjaqni!”.
U agħmluha, agħmluha qabel tidħlu torqdu, kull fil-għaxija.
U issa ejja llissnu flimkien din it-talba sabiħa: “Mulej, jekk trid,
tista’ tfejjaqni!”.
miġjub mit-Taljan għall-Malti minn
Francesco Pio Attard