IL-PAPA FRANĠISKU
UDJENZA ĠENERALI
Awla Pawlu
VI
L-Erbgħa 21 ta’ Diċembru
2016
It-Tama Nisranija – 3.
It-twelid
ta’ Ġesù, għajn ta’ tama
Għeżież ħuti, l-għodwa
t-tajba!
Xi żmien ilu bdejna l-mixja ta’
katekeżi fuq it-tema tat-tama, hekk adatta għal żmien l-Avvent.
Sa issa mexxiena l-Profeta Isaija. Illum, ftit jiem qabel il-Milied, nixtieq
nirrifletti b’mod iżjed speċifiku fuq il-mument li fih, biex
ngħidu hekk, it-tama daħlet
fid-dinja, bl-Inkarnazzjoni tal-Iben ta’ Alla. L-istess Isaija kien
ħabbar sa minn qabel it-twelid tal-Messija f’xi siltiet: “Araw, ix-xebba
titqal u tiled iben, u ssemmih Għimmanu-el” (7:14); u anki: “Għad
toħroġ fergħa miz-zokk ta’ Ġesse, għad tinbet rimja
minn għeruqu” (11:1). Minn dawn is-siltiet toħroġ it-tifsira
tal-Milied: Alla jwettaq il-wegħda billi sar bniedem; ma jitlaqx
lill-poplu tiegħu, jersaq qrib tagħna billi anki jitneżża’
mid-divinità tiegħu. Hekk Alla juri l-fedeltà tiegħu u jniedi Saltna
ġdida, li tagħti tama
ġdida lill-bnedmin. U liema hi din it-tama? Il-ħajja ta’ dejjem.
Meta nitkellmu fuq tama, spiss inkunu nirriferu
għal dak li mhux taħt is-setgħa tal-bniedem u li ma jidhirx.
Fil-fatt, dak li nittamaw fih imur lil hemm mis-saħħa tagħna u
minn dak li għandna l-ħila naraw. Imma t-Twelid ta’ Kristu,
bl-inawgurazzjoni tal-fidwa, ikellimna fuq tama differenti, tama li tista’ torbot
fuqha, li tidher u tinftiehem, għax hi mwaqqfa f’Alla. Hu jidħol
fid-dinja u jagħtina l-qawwa li nimxu miegħu: Alla jimxi magħna
f’Ġesù u jekk nimxu miegħu lejn il-milja tal-ħajja dan jagħtina
l-qawwa li ngħixu b’mod differenti l-preżent, anki jekk mhux nieqes
mit-taħbit. Għalhekk, għan-Nisrani, li jittama jfisser
iċ-ċertezza li nimxu ma’ Kristu lejn il-Missier li qed jistenniena.
It-tama qatt mhi wieqfa, it-tama dejjem miexja u tridna nimxu. Din it-tama, li
tagħtina t-Tarbija ta’ Betlehem, toffri destinazzjoni, destin tajjeb
għall-preżent, is-salvazzjoni lill-bnedmin, l-hena lil min jintelaq
f’idejn Alla ħanin. San Pawl jiġbor dan kollu fl-espressjoni:
“Aħna salvi bit-tama” (Rum 8:24). Jiġifieri, mixjin f’din id-dinja,
bit-tama, aħna salvi. U hawn kull wieħed u waħda minna jista’
jistaqsi lilu nnifsu: Jien miexi bit-tama, jew il-ħajja interjuri
tiegħi hi wieqfa, magħluqa? Qalbi hi kexxun magħluq jew kexxun
miftuħ għat-tama li tmexxini mhux waħdi, imma ma’ Ġesù?
Fid-djar tal-Insara, matul iż-żmien
tal-Avvent, jitħejja l-presepju,
skont it-tradizzjoni li tmur lura sa San Franġisk ta’ Assisi.
Fis-sempliċità tiegħu, il-presepju jittrasmetti t-tama; kull
wieħed mill-persunaġġi hu mgħaddas f’din l-atmosfera ta’
tama.
Qabel xejn ninnutaw il-post li fih jitwieled
Ġesù: Betlehem. Belt
ċkejkna tal-Lhudija fejn elf sena qabel kien twieled David, ir-ragħaj
żagħżugħ maħtur minn Alla bħala sultan ta’
Israel. Betlehem mhix kapitali, u għalhekk hi ppreferuta mill-Providenza
divina, li tħobb taħdem permezz taċ-ċkejkna u l-umli. F’dak
il-post jitwieled “bin David” l-hekk mistenni, Ġesù, li fih jiltaqgħu
t-tama ta’ Alla u t-tama tal-bniedem.
Imbagħad inħarsu lejn Marija, Omm it-tama. Bl-“iva”
tagħha hi fetħet lil Alla l-bieb tad-dinja tagħna: il-qalb żagħżugħa
tagħha kienet mimlija bit-tama, imqanqla kollha kemm hi mill-fidi; u hekk,
Alla għażilha sa minn qabel u hi emmnet il-kelma tiegħu. Dik li
għal disa’ xhur kienet l-arka tal-Patt il-ġdid u li jibqa’ għal
dejjem, fl-għar tikkontempla t-Tarbija u tilmaħ fiha l-imħabba
ta’ Alla, li jiġi biex jifdi lill-poplu tiegħu u lill-bnedmin kollha.
Biswit Marija hemm Ġużeppi,
li ġej min-nisel ta’ Ġesse u ta’ David; anki hu emmen kliem l-anġlu,
u meta jħares lejn Ġesù fil-maxtura, jimmedita kif dik it-Tarbija
ġejja mill-Ispirtu s-Santu, u kif Alla nnifsu amarlu jsejjaħlu hekk,
“Ġesù”. F’dak l-isem hemm it-tama għal kull bniedem, għax
permezz ta’ dak l-iben ta’ mara, Alla sa jifdi lill-bnedmin kollha mill-mewt u
mid-dnub. Għalhekk importanti nħarsu lejn il-presepju!
U fil-presepju hemm ukoll ir-ragħajja, li jirrappreżentaw
lill-umli u l-foqra li kienu jistennew il-Messija, il-“faraġ ta’ Israel”
(Lq 2:25) u l-“fidwa ta’ Ġerusalemm” (Lq 2:38). F’dik it-Tarbija jaraw
it-twettiq tal-wegħdiet u jittamaw li s-salvazzjoni ta’ Alla sa
fl-aħħar tilħaq lil kull wieħed minnhom. Min jorbot fuq
is-sigurtajiet tiegħu nnifsu, fuq kollox dawk materjali, ma jistenniex
is-salvazzjoni ta’ Alla. Ħa ndaħħluha f’rasna: is-sigurtajiet
tagħna mhux sa jsalvawna; l-unika ċertezza li tista’ ssalvana hi dik
tat-tama f’Alla. Issalvana għax hi qawwija u tmexxina bil-ferħ
fil-ħajja, bir-rieda li nagħmlu l-ġid, bir-rieda li nkunu hienja
għal dejjem. Imma ċ-ċkejknin, ir-ragħajja, jafdaw f’Alla,
jittamaw fih u jifirħu meta jagħrfu f’dik it-Tarbija s-sinjal muri
lilhom mill-anġli (ara Lq 2:12).
U sewwa sew il-kor
tal-anġli jħabbar mill-għoli l-pjan kbir li jitwettaq f’dik
it-Tarbija: “Glorja lil Alla fl-għoli tas-smewwiet u paċi fl-art
lill-bnedmin, li huwa jħobb” (Lq 2:14). It-tama Nisranija tesprimi
ruħha fit-tifħir u r-radd il-ħajr lil Alla, li ġabilna
s-Saltna tiegħu ta’ mħabba, ta’ ġustizzja u ta’ paċi.
Għeżież ħuti, f’dawn
il-jiem, aħna u nikkontemplaw il-presepju, ejjew nitħejjew
għall-Milied tal-Mulej. Tkun tabilħaqq festa jekk nilqgħu lil
Ġesù, żerriegħa ta’ tama li Alla jixħet fix-xquq
tal-istorja personali u komunitarja tagħna. Kull “iva” lil Ġesù li
ġej hi żerriegħa ta’ tama. Ħa jkollna fiduċja f’din
it-tama li għad twarrad, f’din l-iva: “Iva, Ġesù, int tista’
ssalvani, int tista’ ssalvani”. Il-Milied it-tajjeb ta’ tama lil kulħadd!
miġjub
mit-Taljan għall-Malti minn Francesco Pio Attard