IL-PAPA FRANĠISKU
UDJENZA ĠENERALI
Awla
Pawlu VI
L-Erbgħa
19 ta’ Awwissu 2015
Il-Familja
– 23. Xogħol
Għeżież
ħuti, l-għodwa t-tajba!
Wara li
rriflettejna fuq il-valur tal-festa fil-ħajja tal-familja, il-lum nieqfu
ftit fuq l-aspett kumplimentari, li hu dak tax-xogħol. It-tnejn
jagħmlu parti mill-pjan ħallieq ta’ Alla, il-festa u x-xogħol.
Ix-xogħol,
jingħad spiss, neħtiġuh biex immantnu l-familja, biex irrabbu
l-ulied, biex niżguraw ħajja dinjituża
għall-għeżież tagħna.
Dwar persuna serja, onesta, l-isbaħ ħaġa li tista’
tgħid hi: “Dan jaħdem”, dan wieħed li jaħdem, dan
wieħed li fil-komunità
ma jgħixx minn fuq dahar ħaddieħor. Hawn ħafna Arġentini l-lum, kif qed
nara, u sa ngħidha kif ngħiduha aħna: “No vive de arriba”.
U fil-fatt
ix-xogħol, fil-kemm-il bixra tiegħu, ibda minn dak ta’ mara tad-dar,
jagħti kas ukoll tal-ġid komuni.
U fejn nitgħallmuh dan l-istil ta’ ħajja ħawtiel? Qabel xejn kollox nitgħallmu
fil-familja. Il-familja teduka għax-xogħool bl-eżempju
tal-ġenituri: il-missier u l-omm li jaħdmu għall-ġid
tal-familja u tas-soċjetà.
Fil-Vanġelu,
il-Familja Mqaddsa ta’ Nazareth tidher bħala familja ta’ ħaddiema, u
Ġesù nnifsu hu msejjaħ “bin il-mastrudaxxa” (Mt 13:55) u saħansitra
“il-mastrudaxxa” (Mk 6:3). U San Pawl ma
jonqosx li jwissi lill-Insara: “Jekk
xi ħadd ma jridx jaħdem, dan anqas ma għandu jiekol”( 2 Tess
3:10). –
Din riċetta tajba biex nirqaqu: ma taħdimx, ma tikolx! –
L-Appostlu qed jirriferi espliċitament
għall-ispiritwaliżmu falz ta’ xi wħud li, fil-fatt, ipappuha tajjeb
minn fuq dar ħuthom billi “jinħlew fix-xejn” (2 Tess 3:11). It-taħbit tax-xogħol u l-ħajja
ta’ l-ispirtu, fil-ħsieb Nisrani, xejn ma jmorru kontra xulxin. Importanti nifhmuh tajjeb dan! Talb u xogħol jistgħu u
għandhom joqogħdu flimkien f’armonija, kif jgħallem San
Benedittu. In-nuqqas ta’ xogħol
jagħmel ħsara wkoll lill-ispirtu, kif in-nuqqas ta’ talb jagħmel
ħsara wkoll lill-ħidma prattika.
Ix-xogħol –
intenni, fl-elf bixra tiegħu – hu ħaġa tal-bniedem. Jesprimi d-dinjità tiegħu li
ġie maħluq fuq is-sura u x-xbieha ta’ Alla. Għalhekk jingħad li x-xogħol
hu qaddis. U għalhekk
l-opportunitajiet ta’ xogħol huma responsabbiltà kbira umana u
soċjali, li ma tistax titħalla f’idejn il-ftit jew tintreħa f’idejn
“suq” divinizzat. Min jikkawża
t-telfien ta’ postijiet ta’ xogħol ikun jikkawża ħsara
soċjali kbira. Nitnikket nara nies
bla xogħol, li ma jistgħux isibu xogħol u m’għandhomx
id-dinjità
li jistgħu jieħdu d-dar magħhom il-ħobż
għall-għixien. U nifraħ
ħafna meta nara lil dawk li jiggvernaw jagħmlu daqshekk sforzi biex
isibu postijiet tax-xogħol u biex jaraw li kulħadd ikollu
xogħol. Ix-xogħol hu qaddis,
ix-xogħol jagħti dinjità
lil familja. Jeħtieġ nitolbu
biex fil-familja ma jonqosx ix-xogħol.
Mela, anki
x-xogħol, bħall-festa, jagħmel parti mill-pjan ta’ Alla
Ħallieq. Fil-ktieb tal-Ġenesi,
it-tema ta’ l-art bħala dar-ġnien, fdata f’idejn il-bniedem biex
jieħu ħsiebha u jaħdimha (2:8,15), hi antiċipata minn
passaġġ sabiħ wisq: “Meta Alla ħalaq l-art u s-sema; meta
kien għad ma hemm ebda xitla
tar-raba’ fuq l-art; meta ebda ħaxix tar-raba’ ma kien għadu
nibet – għax il-Mulej
Alla kien għadu
ma bagħatx xita
fuq l-art, u bniedem ma kienx hemm biex
jaħdem l-art, minkejja l-ilma tiela’ mill-art li sata’ jsaqqi l-wiċċ kollu
ta’ l-art” (2:4b-6a). Dan m’hux romantiċiżmu, hu
r-rivelazzjoni ta’ Alla; u aħna għandna r-responsabbiltà li nifhmuh u nixtarruh sew. L-Enċiklika Laudato sì,
li tipproponi ekoloġija integrali, fiha wkoll dan il-messaġġ:
il-ġmiel ta’ l-art u d-dinjità tax-xogħol huma magħmula biex imorru ma’
xulxin. Imorru t-tnejn flimkien: l-art
tisbieħ meta hi maħduma mill-bniedem.
Meta x-xogħol jinfired mill-patt ta’ Alla mar-raġel u l-mara,
meta jinfired mill-kwalitajiet spiritwali tagħhom, meta jispiċċa
ostaġġ tal-loġika tal-profitt waħdu u jiddisprezza
r-relazzjonijiet affettivi tal-ħajja, l-umiljazzjoni tar-ruħ kollox
tħammeġ: anki l-arja, l-ilma, il-ħaxix, l-ikel… Il-ħajja ċivili ssir korrotta u
l-ħabitat jitfarrak. U
l-konsegwenzi jolqtu fuq kollox lil dawk li huma l-iżjed foqra u l-familji
l-iżjed foqra. Fl-organizzazzjoni
moderna tax-xogħol xi drabi tidher tendenza perikuluża li tqis
lill-familja bħala imbarazz, toqol, element passiv għall-produttività tax-xogħol.
Imma hawn nistaqsu: Xi produttività? U għal
min? L-hekk imsejħa “belt
intelliġenti” [smart city] hi bla dubju ta’ xejn għanja fis-servizzi u
l-organizzazzjoni tagħha; imma, ngħidu aħna, spiss hi ostili
lejn it-tfal u l-anzjani.
Xi kultant min
jipproġetta hu interessat f’kif jikkontrolla s-saħħa
tax-xogħol individwali, kif jiġbor jew jarmi skond
il-ħtieġa ekonomika. Il-famlja
hu bank kbir ta’ prova. Meta
l-organizzazzjoni tax-xogħol iżżommha ostaġġ tagħha,
jew saħansitra xxekkel il-mixja tagħha, allura nistgħu
nibqgħu żguri li s-soċjetà umana bdiet taħdem kontra tagħha nfisha!
Il-familji Nsara
jsibu f’din ir-realtà
sfida għolja u missjoni kbira. Huma
jressqu għall-attenzjoni l-aspetti fundamentali tal-ħolqien ta’ Alla:
l-identità u
r-rabta bejn ir-raġel u l-mara, it-tnissil ta’ l-ulied, ix-xogħol li jimmansa
l-art u jagħmel id-dinja post li tista’ tgħix fih. Jekk nitilfu dawn l-aspetti fundamentali, din
tkun ħaġa serja ħafna, u fid-dar komuni għandna diġà biżżejjed xquq! Xogħolna m’hux wieħed
ħafif. Xi drabi jaf jidher li
l-għaqdiet tal-familji qishom David quddiem Gulija… imma nafu kif
spiċċat din l-isfida!
Neħtieġu fidi u għaqal.
Jagħtina Alla li nilqgħu bil-ferħ u t-tama s-sejħa
tiegħu, f’dan il-waqt iebes ta’ l-istorja tagħna, is-sejħa
għax-xogħol biex jagħti dinjità lilna u lill-familja tagħna.
miġjuba mit-Taljan għall-Malti minn
Francesco Pio Attard