IL-PAPA FRANĠISKU
UDJENZA
ĠENERALI
Pjazza San
Pietru
L-Erbgħa 19 ta’
Ġunju 2013
Għeżież
ħuti, l-għodwa t-tajba!
Il-lum se nieqaf
ftit fuq espressjoni oħra li biha l-Konċilju Vatikan II ifisser
in-natura tal-Knisja: dik tal-ġisem. Il-Konċilju jgħid li
l-Knisja hi l-Ġisem ta’ Kristu (ara Lumen gentium, 7).
Nixtieq nitlaq
minn silta mill-Atti ta’ l-Appostli li nafuha sew: il-konverżjoni ta’
Sawlu, li mbagħad ismu jinbidel għal Pawlu, wieħed mill-akbar
evanġelizzaturi (ara Atti 9:4-5). Sawl hu persekutur ta’ l-Insara,
imma fi triqtu lejn Damasku, f’daqqa waħda jinħakem minn dawl kbir,
jaqa’ fl-art u jisma’ leħen jgħidlu: “Sawl, Sawl, għaliex
qiegħed tippersegwitani?”. U hu jistaqsih: “Min int, Mulej?”, u dan
il-leħen iwieġbu: “Jiena Ġesù, li int qiegħed tippersegwitah” (v. 3-5). Din l-esperjenza ta’ San Pawl
turina kemm hi profonda l-għaqda bejnna l-Insara u Kristu nnifsu.
Meta Ġesù tela’ s-Sema, ma ħalliniex iltiema, imma bid-don ta’
l-Ispirtu s-Santu l-għaqda miegħU saret iżjed intensa.
Il-Konċilju Vatikan II jistqarr li Ġesù, “waqt li kkomunika
l-Ispirtu tiegħu lil ħutu miġmugħa
mill-ġnus kollha, għamilhom b’mod mistiku l-ġisem
tiegħu”
(Kostituzzjoni Dommatika Lumen gentium, 7).
Ix-xbieha
tal-ġisem tgħinna nifhmu din ir-rabta qawwija bejn il-Knisja u
Kristu, li San Pawl żviluppaha b’mod partikulari fl-Ewwel Ittra
lill-Korintin (ara kap. 12). Qabel xejn il-ġisem
jgħajjat realtà ħajja. Il-Knisja m’hix assoċjazzjoni
assistenzjali, kulturali jew politika, imma hi ġisem ħaj, li jimxi u
jaġixxi fl-istorja. U dan il-ġisem għandu ras, Ġesù,
li jmexxih, imantnih u jżommu sħiħ. Dan hu punt li nixtieq
nagħfas aktar fuqu: jekk nifirdu r-ras mill-bqija tal-ġisem,
il-persuna sħiħa ma tistax tgħix. L-istess fil-Knisja:
jeħtieġ nibqgħu marbuta b’mod dejjem iżjed intens ma’
Ġesù. Imma mhux hekk biss: kif ġisem, biex jgħix,
għandu bżonn tad-demm li jagħtih il-ħajja, hekk irridu
nħallu lil Ġesù jaħdem fina, biex il-Kelma tiegħu tmexxina,
biex il-preżenza Ewkaristika tiegħu tmantnina, taħjina, biex
imħabbtu tagħtina l-qawwa biex inħobbu lill-proxxmu. U dan
dejjem! Dejjem, dejjem! Għeżież ħuti,
nibqgħu magħquda ma’ Ġesù, nafdaw ruħna f’idejH, norjentaw
ħajjitna fid-dawl tal-Vanġelu, insostnu ruħna permezz tat-talb
ta’ kuljum, is-smigħ tal-Kelma ta’ Alla, is-sehem fis-Sagramenti.
U hawn niġi
għat-tieni aspett tal-Knisja bħala Ġisem ta’ Kristu. San
Pawl jafferma li kif il-membri tal-ġisem uman, għalkemm ħafna u
differenti minn xulxin, jagħmlu ġisem wieħed, hekk ukoll kollha
kemm aħna ġejna mgħammdin f’ġisem wieħed permezz ta’
Spirtu wieħed (ara 1 Kor 12:12-13). Għalhekk fil-Knisja hemm
varjetà, diversità ta’ ħidmiet u funzjonijiet; m’hemmx uniformità lineari, imma l-għana tad-doni li jqassam l-Ispirtu
s-Santu. Safrattant hemm il-komunjoni u l-għaqda: ilkoll
f’relazzjoni wieħed ma’ l-ieħor u lkoll jitħabtu biex jiffurmaw
ġisem wieħed ħaj, profondament marbut ma’ Kristu. Dan
inżommuh f’moħħna sew: li nkunu parti mill-Knisja jfisser inkunu
magħquda ma’ Kristu u nirċievu minnU l-ħajja divina li
tagħtina li ngħixu ta’ Nsara, ifisser li nibqgħu magħqudin
mal-Papa u ma’ l-Isqfijiet li huma strumenti ta’ għaqda u ta’ komunjoni, u
jfisser ukoll li nitgħallmu kif nirbħu l-personaliżmi u
l-firdiet, biex nifhmu iżjed lil xulxin, biex narmonizzaw il-varjetajiet u
l-għana ta’ kull wieħed u waħda minna; f’kelma waħda, biex
inħobbu iżjed lil Alla u lill-persuni qrib tagħna, fil-familja,
fil-parroċċa, fl-għaqdiet. Il-ġisem u l-membri biex
jgħixu jridu jkunu magħquda ma’ xulxin! L-għaqda hi
superjuri għall-kunflitti, dejjem! Il-kunflitti, jekk ma jissolvewx
tajjeb, joħolqu firda bejnietna, jifirduna minn Alla. Il-kunflitt
jista’ jgħinna nikbru, imma jista’ wkoll jifridna bejnietna. Ejja ma
nimxux fit-triq tal-firdiet, tal-ġlied bejnietna! Ilkoll
magħquda, ilkoll magħquda bid-differenzi li għandna, imma
magħquda, dejjem: din hi t-triq ta’ Ġesù. L-għaqda hi
superjuri għall-kunflitti. L-għaqda hi grazzja li
jeħtieġ nitolbu lill-Mulej biex jeħlisna mit-tentazzjoni
tal-firda, tal-ġlied bejnietna, ta’ l-egoiżmu, tas-seksik. Kemm
ħsara jagħmel is-seksik, kemm ħsara! Qatt m’għandna
nseksku fuq l-oħrajn, qatt! Kemm ħsara jagħmlulha
lill-Knisja l-firdiet bejn l-Insara, il-preġudizzji, l-interessi
personali!
Il-firdiet
bejnietna, imma anki l-firdiet bejn il-komunitajiet: Insara
Evanġeliċi, Insara Ortodossi, Insara Kattoliċi, imma
għaliex aħna mifrudin? Hemm bżonn infittxu li nġibu
l-għaqda. Nirrakkontalkom din: il-lum, qabel ħriġt
mid-dar, qattajt erbgħin minuta, bejn wieħed u ieħor, nofs
siegħa, ma’ Pastor Evanġeliku u tlabna flimkien, u
fittixna l-għaqda. Imma jeħtieġ nitolbu bejnietna
l-Kattoliċi u anki ma’ l-Insara l-oħra, nitolbu biex il-Mulej
jagħtina d-don ta’ l-għaqda, l-għaqda bejnietna. Imma kif
niksbu din l-għaqda bejn l-Insara jekk l-ewwel m’aħniex kapaċi
nsibuha bejnietna l-Kattoliċi? Li nsibuha fil-familja? Kemm
familji miġġielda u mifruda bejniethom! Fittxu l-għaqda,
l-għaqda li tibni l-Knisja. L-għaqda tiġi minn Ġesù
Kristu. Hu jibagħtilna l-Ispirtu s-Santu biex iġibilna
l-għaqda.
Għeżież
ħuti, nitolbuh lil Alla: Għinna nkunu membri tal-Ġisem
tal-Knisja dejjem magħquda b’mod profond ma’ Kristu; għinna biex ma
nġiegħlux il-Ġisem tal-Knisja jbati bil-kunflitti tagħna,
il-firdiet ta’ bejnietna, l-egoiżmi tagħna; għinna nkunu membri
ħajja magħquda ma’ xulxin permezz ta’ qawwa waħda, dik ta’
l-imħabba, li l-Ispirtu s-Santu jsawwab fil-qlub tagħna (ara Rum
5:5).
miġjuba mit-Taljan għall-Malti minn
Francesco Pio Attard