IL-PAPA
FRANĠISKU
UDJENZA ĠENERALI
Pjazza San Pietru -
L-Erbgħa 19 ta’ Marzu 2014
San
Ġużepp edukatur li jsieħeb lil Ġesù biex jikber
fl-għerf, fis-snin u fil-grazzja.
Għeżież ħuti, l-għodwa t-tajba!
Il-lum, 19 ta’ Marzu, niċċelebraw il-festa solenni ta’ San Ġużepp, Għarus ta’ Marija u Patrun tal-Knisja universali. Mela din il-katekeżi ejjew niddedikawha lilu, li jixirqulu r-rikonoxximent u d-devozzjoni kollha tagħna għal kemm għaraf iħares lill-Verġni Mbierka u lil Binhom Ġesù. Hi l-karatteristika ta’ Ġużeppi li jkun ħarries: hi l-missjoni kbira tiegħu, dik ta’ ħarries.
Il-lum nixtieq nerġa’ lura fuq it-tema tal-ħarsien minn perspettiva partikulari: il-perspettiva edukattiva. Inħarsu lejn Ġużeppi bħala l-mudell ta’ l-edukatur, li jħares u jsieħeb lil Ġesù fil-mixja tiegħu li fiha jikber “fl-għerf, fis-snin u fil-grazzja”, kif jgħid il-Vanġelu. Hu ma kienx missier Ġesù: missier Ġesù kien Alla, imma hu kien jagħmilha ta’ missier Ġesù, kien jagħmilha ta’ missieru biex jgħinu jikber. U kif għenu jikber? Fl-għerf, fis-snin u fil-grazzja.
Nitilqu mis-snin, l-età, li hi d-dimensjoni l-aktar naturali, għax wieħed hawn jikber fiżikament u psikoloġikament. Ġużeppi, flimkien ma’ Marija, ħa ħsieb ta’ Ġesù qabel xejn minn dan il-lat, jiġifieri “rabbieh”, u ħa ħsieb li ma jkunx jonqsu dak li kien meħtieġ biex seta’ jiżviluppa b’mod san. Ma ninsewx li l-ħarsien premuruż tal-ħajja tat-Tarbija ġab miegħu wkoll il-ħarba lejn l-Eġittu, l-esperjenza iebsa li jgħixu bħala rifuġjati – Ġużeppi għex ta’ rifuġjat, ma’ Marija u Ġesù – biex jaħarbu mit-theddida ta’ Erodi. Imbagħad, meta reġgħu lura f’pajjiżhom u bdew joqogħdu Nazareth, hemm il-perjodu twil tal-ħajja ta’ Ġesù fil-familja tiegħu. F’dawn is-snin Ġużeppi għallem lil Ġesù anki l-mistier tiegħu, u Ġesù tgħallem jaħdem ta’ mastrudaxxa ma’ djul missieru Ġużeppi. Hekk rabbieh Ġużeppi lil Ġesù.
Ngħaddu għat-tieni dimensjoni ta’ l-edukazzjoni, dik tal-“għerf”. Ġużeppi kien għal Ġesù mudell u mgħallem ta’ dan l-għerf, li għandu bħala ikel tiegħu l-Kelma ta’ Alla. Nistgħu naħsbu kif Ġużeppi eduka liċ-ċkejken Ġesù kif jisma’ l-Iskrittura Mqaddsa, fuq kollox billi s-Sibt kien jieħdu miegħu s-sinagoga ta’ Nazareth. U Ġużeppi kien isieħeb lil Ġesù fis-smigħ tal-Kelma ta’ Alla fis-sinagoga.
U fl-aħħar nett, id-dimensjoni tal-“grazzja”. Dejjem San Luqa jgħidilna hekk għal Ġesù: “U l-grazzja ta’ Alla kienet fuqu” (2:40). Hawn bla dubju sehem San Ġużepp hu iżjed limitat meta mqabbel ma’ l-oqsma ta’ l-età u ta’ l-għerf. Imma nkunu niżbaljaw bil-kbir jekk naħsbu li missier u omm ma jistgħu jagħmlu xejn biex jedukaw lil uliedhom kif jikbru fil-grazzja ta’ Alla. Għenu jikber fis-snin, jikber fl-għerf, jikber fil-grazzja: dan hu x-xogħol li għamel San Ġużepp ma’ Ġesù, li għenu jikber f’dawn it-tliet aspetti, għenu jikber.
Għeżież ħuti, il-missjoni ta’ San Ġużepp ċertament hi unika u irripetibbli, għax Ġesù hu assolutament uniku. Madankollu, hu u jħares lil Ġesù, u jedukah biex jikber fis-snin, fl-għerf u fil-grazzja, huwa wkoll mudell għal kull edukatur, b’mod partikulari għal kull missier. San Ġużepp hu l-mudell tal-edukatur u tal-missier. Għalhekk nafda f’idejn il-ħarsien tiegħu lill-ġenituri kollha, is-saċerdoti – li huma missirijiet –, u lil dawk li għandhom il-missjoni li jedukaw fil-Knisja u fis-soċjetà. B’mod speċjali, il-lum, Jum il-Missier, nixtieq insellem lill-ġenituri kollha, lill-missirijiet kollha: mill-qalb insellmilkom! Ħa nara: hawn xi ftit missirijiet fil-pjazza? Erfgħu jdejkom, il-missirijiet! U kemm hawn missirijiet! Awguri, awguri fil-jum iddedikat lilkom! Għalikom nitlob il-grazzja li tkunu dejjem qrib ħafna ta’ wliedkom, ħalluhom jikbru, imma kunu dejjem qrib tagħhom! Huma għandhom bżonnkom, bżonn il-preżenza tagħkom, bżonn li tkunu qrib tagħhom, li tħobbuhom. Kunu għalihom bħal San Ġużepp: ħarriesa tagħhom huma u jikbru fis-snin, fl-għerf u fil-grazzja. Ħarriesa tal-mixja tagħhom; edukaturi, u imxu magħhom. U jekk tkunu qrib tagħhom, tkunu edukaturi tassew. Grazzi għal dak kollu li qed tagħmlu għal uliedkom: grazzi. Nawguralkom ħafna, u l-festa t-tajba f’Jum il-Missier lill-missirijiet kollha li hawn hawnhekk, lill-missirijiet kollha. San Ġużepp iberikkom u jimxi magħkom. U xi wħud minna lil missierhom tilfuh, telaq, il-Mulej sejjaħlu għandu; fil-pjazza hawn bosta li m’għandhomx missier. Nistgħu nitolbu għall-missirijiet kollha tad-dinja, għal dawk ħajjin u anki għal dawk li ħallewna u għal dawk tagħna, u din il-ħaġa nistgħu nagħmluha flimkien, billi kull wieħed u waħda jiftakar f’missieru jew missierha, kemm jekk ħaj u kemm jekk mejjet. U nitolbu lill-Missier il-kbir tagħna lkoll, il-Missier. “Missierna” għal missirijietna: Missierna…
U awguri lill-missirijiet!
miġjuba mit-Taljan għall-Malti minn Francesco Pio Attard