IL-PAPA
FRANĠISKU
UDJENZA
ĠENERALI
Pjazza
San Pietru
L-Erbgħa
18 ta’ Ottubru
2017
It-Tama
Nisranija – 37.
Henjin dawk li jmutu
fil-Mulej
Għeżież
ħuti, l-għodwa t-tajba!
Illum nixtieq
inqiegħed f’konfront ma’ xulxin it-tama Nisranija u r-realtà tal-mewt,
realtà li ċ-ċiviltà moderna tagħna dejjem iżjed qed
tipprova tħassar. Hekk, meta tasal il-mewt, għal min ikun qrib
tagħna u għalina stess, insibu ruħna m’aħniex
imħejjija, sajma wkoll mill-“alfabett” meħtieġ biex nistgħu
ngħaqqdu kliem li jagħmel sens madwar il-misteru tagħha, li
xorta waħda jibqa’. U safrattant, l-ewwel sinjali ta’ ċivilizzazzjoni
umana għaddew proprju minn din l-enigma. Nistgħu ngħidu li
l-bniedem twieled mal-kult tal-mejtin.
Ċiviltajiet
oħra, qabel din tagħna, kellhom il-kuraġġ li jħarsu
lejha f’wiċċha. Kienet ġrajja rrakkuntata mix-xjuħa
lill-ġenerazzjonijiet ġodda, bħal realtà li ma tistax
taħrabha u li kienet tobbliga lill-bniedem biex jgħix għal xi
ħaġa assoluta. Jgħid is-Salm 90: “Għallimna ngħoddu
jiem ħajjitna, sabiex aħna nimxu bil-għaqal” (v. 12). Jekk
wieħed jitgħallem jgħodd jiem ħajtu, qalbu tikseb
l-għerf! Kliem li jdaħħalna f’realiżmu san, u
jkeċċi minna l-ħsieb li nistgħu kollox. Aħna
x’aħna? Aħna “kważi m’aħna xejn” (ara 89:48); jiemna
jgħaddu ħfief: imqar li kellna ngħixu mitt sena,
fl-aħħar jidhirlna li kollox kien bħal nifs. Ħafna drabi
nisma’ anzjani jgħidu: “Il-ħajja għaddiet bħal nifs…”.
Hekk il-mewt
tneżża’ għarwiena lil ħajjitna. Tgħinna niskopru li
l-għemejjel tagħna ta’ kburija, ta’ qilla u ta’ mibegħda kienu frugħa:
frugħa biss. B’għafsa ta’ qalb nintebħu li ma ħabbejniex
biżżejjed u li ma fittixniex dak li kien essenzjali. U, bil-maqlub,
naraw dak li żrajna tabilħaqq tajjeb: l-imħabba li mħabba
fiha ssagrifikajna ruħna, u li issa taqbdilna jdejna.
Ġesù
xeħet dawl fuq il-misteru tal-mewt tagħna. Bi mġiebtu,
jawtorizzana biex inħossuna mnikkta meta tmut persuna
għażiża għalina. Hu tħawwad “ħafna” quddiem
il-qabar ta’ ħabibu Lazzru, u “beka” (Ġw 11:35). F’din l-imġiba
tiegħu, lil Ġesù nħossuh qrib ħafna, bħal ħuna.
Hu beka għal ħabibu Lazzru.
U għalhekk
Ġesù jitlob lill-Missier, għajn tal-ħajja, u jordna lil Lazzru
joħroġ mill-qabar. U hekk seħħ. It-tama Nisranija tixrob
minn din l-imġiba ta’ Ġesù kontra l-mewt umana: jekk din hi
preżenti fil-ħolqien, xorta hi sfreġju li jisfratta l-pjan ta’
mħabba ta’ Alla, u l-Feddej tagħna jrid ifejjaqna minnha.
Band’oħra
l-Vanġeli jirrakkuntaw dwar missier li kellu lil bintu marida sew, u jdur
b’fidi fuq Ġesù biex isalvaha (ara Mk 5:21-24,35-43). U ma hemmx figura li
tqanqal iżjed minn dik ta’ missier jew ta’ omm b’binhom jew binthom morda.
U minnufih Ġesù jmur ma’ dak ir-raġel, li kien jismu Ġajru.
F’ċertu punt jasal xi ħadd mid-dar ta’ Ġajru u jgħidlu li
t-tifla mititlu, u m’hemmx bżonn idejqu iżjed lill-Imgħallem.
Imma Ġesù jgħid lil Ġajru: “Tibżax, biss inti emmen!” (Mk
5:36). Ġesù jaf li dak ir-raġel hu ttentat jirreaġixxi b’rabja u
qtigħ il-qalb, għax mititlu bintu, u jħeġġu biex
iżomm taqbad il-fjamma ċkejkna li xegħlet fil-qalb tiegħu:
il-fidi. “Tibżax, biss inti emmen!”. “Tibżax, imma ibqa’ żomm
mixgħula dik il-fjamma!”. U mbagħad, meta jaslu d-dar, hu jqajjem
lit-tifla mill-mewt u jroddha ħajja lill-għeżież
tagħha.
Ġesù
jqegħedna fuq dan it-“tarf” tal-fidi. Lil Marta li tibki t-telfa ta’
ħuha Lazzru jaffaċċjaha bid-dawl ta’ domma: “Jien hu l-qawmien u
l-ħajja. Kull min jemmen fija, ukoll jekk imut, jgħix; u kull min
jgħix u jemmen fija, dan ma jmut qatt. Temmnu inti dan?” (Ġw
11:25-26). Dan hu li Ġesù jtenni lil kull wieħed u waħda minna,
kull darba li żżurna l-mewt biex iċċarrat in-nisġa
tal-ħajja u tal-imħabbiet tagħna. Ħajjitna kollha
qiegħda hawn, titliegħeb bejn it-telgħa tal-fidi u
l-preċipizzju tal-biża’. Jgħidilna Ġesù: “Jien m’iniex
il-mewt, jiena l-qawmien u l-ħajja. Temmnu inti dan? Temmnu?”. Aħna,
li llum ninsabu hawn fil-Pjazza, nemmnuh dan?
Aħna lkoll
ċkejkna u bla difiża quddiem il-misteru tal-mewt. Imma, xi grazzja
tkun jekk f’dak il-mument inħarsu fil-qalb tagħna l-fjamma
ċkejkna tal-fidi! Ġesù jaqbdilna jdejna, kif qabad f’id bint
Ġajru, biex itennilna mill-ġdid: “Talità kum”, “Tfajla, qum!” (Mk 5:41).
Se jgħidu
lilna, lil kull wieħed u waħda minna: “Qum, irxoxta!”. Jien issa
nistedinkom tagħlqu għajnejkom u taħsbu f’dak il-mument:
tal-mewt tagħna. Kull wieħed u waħda minna jaħseb fil-mewt
tiegħu, u jistħajjel lilu nnifsu f’dak il-mument li għad
iseħħ, meta Ġesù jaqbdilna jdejna u jgħidilna: “Ejja, ejja
miegħi, qum”. Hemm tintemm it-tama u tkun ir-realtà, ir-realtà
tal-ħajja. Aħsbu sew: Ġesù nnifsu għad jiġi għand
kull wieħed u waħda minna u jaqbdilna jdejna, bil-ħlewwa
tiegħu, bit-tjieba tiegħu, bl-imħabba tiegħu. U kull
wieħed ħa jtenni fil-qalb tiegħu l-kelma ta’ Ġesù: “Qum,
ejja. Qum, ejja. Qum, irxoxta!”.
Din hi t-tama
tagħna quddiem il-mewt. Għal min jemmen, hi bieb li jinfetaħ
kollu beraħ; għal min jiddubita hi bħal xaqq ta’ dawl li
jgħaddi minn fuq l-għatba tal-bieb għax il-bieb ma jkunx
magħluq għalkollox. Imma għalina lkoll sa tkun grazzja, meta dan
id-dawl, tal-laqgħa tagħna ma’ Ġesù, idawwalna.
miġjub mit-Taljan għall-Malti minn
Francesco Pio Attard