ĠUBLEW STRAORDINARJU TAL-ĦNIENA
IL-PAPA FRANĠISKU
UDJENZA ĠUBILARI
Is-Sibt 18 ta’ Ġunju 2016
Ħniena u konverżjoni (ara Lq 24:45-48)
Għeżież ħuti, l-għodwa
t-tajba!
Wara l-qawmien mill-mewt, Ġesù deher kemm-il
darba lid-dixxipli tiegħu, qabel tela’ fil-glorja tal-Missier. Is-silta
tal-Vanġelu li għadna kemm smajna (Lq 24:45-48) tirrakkonta
waħda minn dawn id-dehriet, fejn il-Mulej juri x’għandu jkun
il-kontenut fundamentali tal-predikazzjoni li l-Appostli għandhom joffru
lid-dinja. Fil-qosor nistgħu niġbruh f’żewġ kelmiet:
“konverżjoni” u “maħfra tad-dnubiet”. Huma żewġ aspetti li
jikkwalifikaw il-ħniena ta’ Alla li, bi mħabba, jieħu
ħsiebna. Il-lum ejjew inħarsu ftit lejn il-konverżjoni.
X’inhi l-konverżjoni? Hi preżenti tul
il-Bibbja kollha, u b’mod partikulari fil-predikazzjoni tal-profeti, li
kontinwament jistiednu lill-poplu “jerġa’ lura għand il-Mulej” biex
jitolbu maħfra u jibdel l-istil ta’ ħajtu. Li nikkonvertu, skond
il-profeti, ifisser li nibdlu d-direzzjoni li nkunu mexjin fiha u nduru
għal għand il-Mulej, bil-konvinzjoni li hu jħobbna u
mħabbtu hi dejjem fidila. Nerġgħu nduru għal għand
il-Mulej.
Ġesù għamel mill-konverżjoni l-ewwel
kelma tal-predikazzjoni tiegħu: “Indmu u emmnu fil-Bxara t-tajba” (Mk
1:15). Hu b’din it-taħbira li hu jidher quddiem il-poplu, isejjaħlu
biex jilqa’ l-kelma tiegħu bħala l-aħħar kelma defenittiva
li l-Missier ilissen lill-bnedmin (ara Mk 12:1-11). Meta nqabbluh
mal-predikazzjoni tal-profeti, Ġesù jinsisti wisq aktar fuq id-dimensjoni
interjuri tal-konverżjoni. Fil-fatt, fiha hemm il-persuna sħiħa
involuta, b’qalbha u ruħha kollha, biex issir ħolqien ġdid,
persuna ġdida. Tibdel il-qalb, u dak li jkun, jiġġedded.
Meta Ġesù jsejjaħ għall-indiema ma
jridx jidher bħala mħallef tal-persuni, imma jagħmel dan billi
jibda joqgħod jkun qrib tagħhom, jaqsam fil-qagħda tagħhom
ta’ bnedmin, u allura tat-triq, tad-dar, tal-mejda… Il-ħniena lejn dawk li
kellhom bżonn jibdlu ħajjithom dehret fil-preżenza tiegħu
kollha mħabba, biex kulħadd iħossu jagħmel parti
mill-istorja tiegħu ta’ salvazzjoni. Ġesù kien jipperswadi lin-nies
bl-imħabba, u b’din l-imġiba tiegħu Ġesù kien imiss
il-qiegħ nett tal-qalb tal-persuni u huma kienu jħossuhom
miġbuda mill-imħabba ta’ Alla u ħerqana li jibdlu
ħajjithom. Ngħidu aħna, il-konverżjonijiet ta’ Mattew (ara
Mt 9:9-13) u ta’ Żakkew (ara Lq 19:1-10) seħħu propju hekk,
għax ħassew lil Ġesù jħobbhom u, permezz tiegħu,
ħassewhom maħbuba mill-Missier. Il-konverżjoni vera
sseħħ meta nilqgħu d-don tal-grazzja; u sinjal ċar ta’
l-awtentiċità tagħha hu li nintebħu bil-ħtiġijiet ta’
ħutna u nkunu lesti li nersqu lejhom.
Għeżież ħuti, kemm drabi
aħna wkoll inħossu l-bżonn ta’ bidla li tinvolvi l-persuna
sħiħa tagħna! Kemm drabi ngħidu lilna nfusna: “Hemm
bżonn ninbidel, ma nistax nibqa’ sejjer hekk… Ħajti, f’din it-triq,
m’hix se tagħti frott, sa tkun ħajja bla siwi u jien mhux sa nkun
kuntent”. Kemm drabi jiġuna dawn il-ħsibijiet, kemm drabi!… U
Ġesù, maġenbna, b’dirgħajh miftuħa għalina, qed
jgħidilna: “Ejja, ejja għandi. Ix-xogħol ħalli lili
nagħmlu: jien nibdillek qalbek, jien nibdillek ħajtek, jien
nagħmlek ferħan”. Imma aħna, dan nemmnu fih jew le? Nemmnu jew
le? Intom x’taħsbu: dan temmnu fih jew le? Inqas ċapċip u iktar
leħinkom: temmnu jew ma temmnux? [in-nies: “Iva!”] Hekk hu. Ġesù li jinsab magħna qed
jistedinna nibdlu ħajjitna. Huwa hu li, bl-Ispirtu s-Santu, jiżra’
fina dan it-tħassib serju biex nibdlu ħajjitna u nkunu xi ftit
aħjar. Mela ejjew nisimgħu l-istedina tal-Mulej u ma nagħmlulux
reżistenza, għax huwa biss jekk ninfetħu għall-ħniena
tiegħu li aħna nsibu l-ħajja vera u l-ferħ veru.
Jeħtieġ biss niftħu beraħ il-bieb, u nħallu lilu
jagħmel il-bqija. Hu kollox jagħmel, imma aħna rridu nkunu li
niftħu beraħ il-qalb tagħna biex hu jista’ jfejjaqna u jmexxina
’l quddiem. Niżgurakom li nkunu ħafna iżjed ferħanin.
Grazzi.
miġjuba mit-Taljan għall-Malti minn
Francesco Pio Attard