IL-PAPA FRANĠISKU
UDJENZA ĠENERALI
L-Erbgħa 18 ta’ Mejju 2016
19.
Faqar u Ħniena
(ara Lq
16:19-31)
Għeżież ħuti, l-għodwa
t-tajba!
Il-lum nixtieq nieqaf magħkom fuq
il-parabbola ta’ l-għani u l-fqajjar Lazzru. Il-ħajja ta’ dawn
iż-żewġ persuni donnha miexja fuq żewġ binarji
paralleli: il-kundizzjonijiet ta’ ħajjithom huma opposti għal xulxin
u fl-ebda komunikazzjoni bejniethom. Il-bieb tad-dar ta’ l-għani dejjem
magħluq għall-fqir, li jinxteħet hemm barra, ifittex x’jiekol
miż-żejjed li jaqa’ minn fuq il-mejda ta’ l-għani. Dan ixidd
ilbies fin, waqt li Lazzru mimli ġrieħi ma’ ġismu kollu;
l-għani ta’ kuljum jagħmel ikla mill-aqwa, waqt li Lazzru qed imut
bil-ġuħ. Il-klieb biss li jieħdu ħsieb tiegħu, u
jiġu jilagħqu l-ġrieħi tiegħu. Din ix-xena tfakkarna
fiċ-ċanfira qalila ta’ Bin il-bniedem fil-Ġudizzju finali: “Kont
bil-ġuħ u ma tmajtunix, kont bil-għatx u ma sqejtunix, kont
[…] għeri
u ma libbistunix” (Mt 25:42-43). Lazzru
jirrappreżenta tajjeb il-karba siekta tal-foqra ta’
kull żmien u l-kontradizzjonijiet ta’ dinja fejn l-għana u
riżorsi kbar huma f’idejn il-ftit.
Ġesù jgħid li jum wieħed dak
l-għani miet: il-foqra u l-għonja t-tnejn imutu, l-istess destin
għandhom, bħalna lkoll, m’hemmx eċċezzjonijiet għal
dan. U allura dan ir-raġel jersaq f’riġlejn Abraham jitolbu billi
jsejjaħlu “missier” (vv. 24, 27). Għalhekk jippretendi li hu ibnu,
parti mill-poplu ta’ Alla. Imma dan f’ħajtu ma ta ebda kas ta’ Alla, anzi
għamel minnu nnifsu ċ-ċentru ta’ kollox, magħluq kif kien
fid-dinja tiegħu ta’ lussu u ta’ ħela. Meta warrab lil Lazzru, ma ta
l-ebda kas la ta’ Alla, lanqas tal-liġi tiegħu. Li tinjora lill-fqir
ifisser tistmerr lil Alla! Dan jeħtieġ nitgħallmuh waħda u
sew: meta tinjora lill-fqir tkun qed iżżeblaħ lil Alla. Hemm
dettall fil-parabbola li ta’ min jinnotah: l-għani hu bla isem, jingħata
biss l-aġġettiv: “l-għani”; waqt li isem dak il-fqajjar hu
mtenni ħames darbiet, u “Lazzru” ifisser “Alla jgħin”. Lazzru,
mixħut quddiem il-bieb, lill-għani qed ifakkru l-ħin kollu li
għandu jiftakar f’Alla, imma l-għani ma jilqax din it-tfakkira.
Għalhekk jiġi kkundannat mhux għall-għana tiegħu, imma
għax ma kellux il-ħila jitħassar lil Lazzru u jgħinu.
Fit-tieni parti tal-parabbola, nerġgħu
niltaqgħu ma’ Lazzru u l-għani wara mewthom (vv. 22-31). Fid-dinja
l-oħra s-sitwazzjoni tinqaleb bil-kontra: il-fqajjar Lazzru jittieħed
mill-anġli fi ħdan Abraham fis-Sema, waqt li l-għani
jispiċċa qalb tbatijiet l-aktar ħorox. Hawn l-għani “rafa’
ħarstu, u mill-bogħod lemaħ lil Abraham, b’Lazzru fi
ħdanu”. Donnu kien qed jara lil Lazzru għall-ewwel darba, imma kliemu
jittradih: “Missier Abraham”, jgħidlu, “ikollok ħniena minni u
ibgħat lil Lazzru jbill tarf sebgħu fl-ilma ħa jtaffili n-nixfa
li għandi fi lsieni, għax qiegħed ninħaqar wisq f’dan
in-nar”. Issa l-għani jagħrfu lil Lazzru u jitolbu l-għajnuna,
meta f’ħajtu għamel ta’ bir-ruħu ma kienx qed jarah. – Kemm
drabi ssib min jagħmel ta’ bir-ruħu m’hux jarahom lill-foqra!
Għal dawn in-nies, il-foqra ma jeżistux. – L-ewwel kien
iċaħħdu mqar miż-żejjed li jaqa’ mill-mejda
tiegħu, u issa jrid li jeħodlu x’jixrob! Għadu jaħseb li jista’
jmissu mid-drittijiet li kellu mħabba l-qagħda soċjali
tiegħu. Abraham stqarrlu li kien imposibbli jaqla’ dak li talbu, u fi
kliemu jagħtina l-muftieħ biex naqraw ir-rakkont kollu: hu jfisser
x’kienu l-ħwejjeġ tajbin u ħżiena li tqassmu biex
jagħmlu tajjeb għall-inġustizzja fuq din l-art, u l-bieb li
fil-ħajja kien jifred lill-għani mill-fqir, issa nbidel f’“vojt bla
qies”. Sakemm Lazzru kien għadu taħt l-għatba ta’ daru, għall-għani
kien għad hemm il-possibbiltà ta’ salvazzjoni, li jiftaħ il-bieb
beraħ u jgħin lil Lazzru, imma issa li t-tnejn li huma mietu,
is-sitwazzjoni ma tistax titranġa. Fl-istorja qatt ma jissemma Alla
bħala l-kawża ta’ dan kollu, imma l-parabbola tgħidha ċara:
il-ħniena ta’ Alla lejna hi marbuta mal-ħniena tagħna lejn
il-proxxmu tagħna; meta tonqos waħda, lanqas l-oħra ma ssib
wisa’ fil-qalb magħluqa tagħna, ma ssibx mnejn tidħol. Jekk jien
ma niftaħx il-bieb ta’ qalbi għall-fqir, dak il-bieb jibqa’ magħluq.
Anki għal Alla. U din hi ħaġa terribbli.
Hawn l-għani jibda jaħseb f’ħutu,
li qed jirriskjaw li jispiċċaw l-istess, u jitlob li Lazzru
jerġa’ lura fid-dinja biex iwissihom. Imma Abraham itennilu:
“Għandhom lil Mosè u l-Profeti; jisimgħu lilhom”. Biex nikkonvertu,
m’hemmx għalfejn noqogħdu nistennew iseħħu xi ġrajjiet
kbar, imma biżżejjed niftħu qalbna għall-Kelma ta’ Alla, li
ssejħilna biex inħobbu lil Alla u l-proxxmu tagħna. Il-Kelma ta’
Alla tista’ tgħajjex mill-ġdid lill-qalb niexfa tagħna u tfejjaqha
mill-għama tagħha. L-għani kien jafha l-Kelma ta’ Alla, imma ma
ħallihiex tidħol f’qalbu, ma semagħhiex, għalhekk ma kienx
kapaċi jiftaħ għajnejh u jħenn għall-fqir. L-ebda
messaġġier u l-ebda messaġġ ma jistgħu jieħdu
post il-foqra li magħhom niltaqgħu fit-triq tagħna, għax
fihom jiġi jiltaqa’ magħna Ġesù nnifsu: “Kull ma għamiltu
ma’ wieħed mill-iżgħar fost dawn ħuti, għamiltuh
miegħi” (Mt 25:40), kif jgħidilna Ġesù. Hekk fix-xorti li
nqalbet, kif tiddeskrivilna l-parabbola, hemm moħbi l-misteru tas-salvazzjoni
tagħna, fejn Kristu jgħaqqad flimkien il-faqar u l-ħniena.
Għeżież ħuti, meta nisimgħu dan il-Vanġelu,
ilkoll kemm aħna, flimkien mal-foqra ta’ din l-art, nistgħu
ngħannu ma’ Marija: “Niżżel is-setgħana minn fuq it-tron
tagħhom, u għolla ċ-ċkejknin. Mela b’kull ġid lil min
hu bil-ġuħ, u l-għonja bagħathom ’il barra b’xejn” (Lq
1:52-53).
miġjub
mit-Taljan għall-Malti minn Francesco Pio Attard