IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 18 ta’ April 2018
Katekeżi fuq il-Magħmudija.
Għeżież ħuti,
l-għodwa t-tajba!
Inkomplu, f’dan iż-Żmien
tal-Għid, bil-katekeżi tagħna fuq il-Magħmudija. It-tifsira
tal-Magħmudija toħroġ b’mod ċar miċ-ċelebrazzjoni
tagħha, għalhekk ejjew nixħtu l-attenzjoni tagħna fuqha.
Jekk inqisu l-ġesti u l-kelmiet tal-liturġija nistgħu nifhmu
l-grazzja u l-impenn ta’ dan is-Sagrament, li dejjem fadlilna x’niskopru fih.
Niftakru fih fit-traxxix bl-ilma mbierek li jista’ jsir il-Ħadd fil-bidu
tal-Quddiesa, kif ukoll fit-tiġdid tal-wegħdiet tal-Magħmudija
fil-Velja tal-Għid. Fil-fatt, dak li jseħħ
fiċ-ċelebrazzjoni tal-Magħmudija jqanqal dinamika spiritwali li
tibqa’ fil-ħajja kollha tal-imgħammdin; hu l-bidu ta’ proċess li
jgħinna ngħixu magħqudin ma’ Kristu fil-Knisja. Għalhekk,
meta nerġgħu lura għall-għajn tal-ħajja Nisranija, dan
iwassalna biex nifhmu aħjar id-don li rċivejna nhar
il-Magħmudija tagħna u nġeddu l-impenn li nħaddnuh
fil-qagħda li fiha ninsabu llum. Inġeddu l-impenn, nifhmu aħjar
dan id-don, li hu l-Magħmudija, u nfakkru l-jum tal-Magħmudija
tagħna. L-Erbgħa li għaddiet bgħattkom tagħmlu
x-xogħol id-dar, kull wieħed u waħda minna kellu jiftakar il-jum
tal-Magħmudija, f’liema jum ġie mgħammed. Jien naf li hemm
fostkom min jaf, oħrajn, le; dawk li ma jafux, ħa jistaqsu
lill-ġenituri, jew lil dawk il-persuni, il-parrini… jistaqsuhom: “Meta
tgħammidt jiena?”. Għax il-Magħmudija hi twelid mill-ġdid,
hi bħal għeluq is-snin ieħor. Fhimtu? Nagħmlu din
il-biċċa xogħol id-dar, nistaqsu: “Liema hi d-data
tal-Magħmudija tiegħi?”.
Qabelxejn, fir-rit tal-merħba, jiġi
mistoqsi l-isem tal-kandidat, għax l-isem juri l-identità
tal-persuna. Meta nippreżentaw ruħna, dritt ngħidu isimna: “Jien
jisimni”, biex hekk noħorġu mill-anonimat, l-anonimu hu dak li
m’għandux isem. Biex noħorġu mill-anonimat dritt ngħidu
x’jisimna. Bla isem nibqgħu xi ħadd li ma jafna ħadd, bla
drittijiet u bla dmirijiet. Alla jsejjaħ lil kulħadd b’ismu, iħobbna
b’mod individwali, fil-konkretezza tal-istorja tagħna. Il-Magħmudija
tkebbes il-vokazzjoni personali biex ngħixu ta’ Nsara, li
mbagħad tiżviluppa tul il-ħajja kollha. U timplika tweġiba personali
u mhux mislufa, “ikkupja u waħħal”. Fil-fatt, il-ħajja Nisranija
hi minsuġa minn serje ta’ sejħat u ta’ tweġibiet: Alla jissokta
jlissen isimna matul is-snin, biex fih tidwi b’elf mod is-sejħa
tiegħu biex insiru ħaġa waħda ma’ Ibnu Ġesù. Mela
l-isem hu importanti! Hu importanti ħafna! Il-ġenituri jaħsbu
x’isem se jagħtu lil binhom diġà minn qabel it-twelid: anki dan
jagħmel parti mill-istennija ta’ iben li, fl-isem tiegħu, sa jkollu
identità oriġinali, anki għall-ħajja Nisranija marbuta ma’ Alla.
Bla dubju, li nsiru Nsara hu don li jiġi
mill-għoli (ara Ġw 3:3-8). Il-fidi ma tistax tixtriha, imma titlobha
iva, u tirċeviha bħala don iva. “Mulej, agħtini d-don tal-fidi”,
hi talba sabiħa! “Li jkolli l-fidi”, hi talba sabiħa. Nitolbuha
b’don, imma ma nistgħux nixtruha, nitolbuha. Fil-fatt, “il-Magħmudija
hi s-sagrament ta’ dik il-fidi, li biha l-bnedmin, imdawla mill-grazzja
tal-Ispirtu s-Santu, iwieġbu għall-Vanġelu ta’ Kristu” (Rit
tal-Magħmudija tat-Trabi, Introduzzjoni ġenerali, n. 3). Biex
iqanqlu u jqajmu mill-ġdid fidi sinċiera bħala tweġiba
għall-Vanġelu, hemm il-formazzjoni tal-katekumeni u t-tħejjija
tal-ġenituri, kif ukoll is-smigħ tal-Kelma ta’ Alla fl-istess
ċelebrazzjoni tal-Magħmudija.
Jekk il-katekumeni adulti juru huma stess dak
li jixtiequ jirċievu bħala don mill-Knisja, it-trabi huma
ppreżentati mill-ġenituri, mal-parrini. Id-djalogu magħhom
jgħin lilhom biex jesprimu r-rieda tagħhom li ċ-ċkejknin
jirċievu l-Magħmudija u lill-Knisja l-fehma li tiċċelebrah.
“Espressjoni ta’ dan kollu hu s-sinjal tas-salib, li
ċ-ċelebrant u l-ġenituri jimmarkaw fuq ġbin it-trabi” (Rit
tal-Magħmudija tat-Trabi, Introduzzjoni, n. 16). “Is-sinjal tas-salib
hu l-marka ta’ Kristu fuq dak li se jkun tiegħu u jfisser il-grazzja
tal-fidwa li Kristu kisbilna permezz tas-salib” (Katekiżmu tal-Knisja
Kattolika, 1235). Fiċ-ċerimonja nagħmlu s-sinjal tas-salib
fuq it-trabi. Imma rrid nerġa’ lura għal argument li ġieli
kellimtkom fuqu. It-tfal tagħna jafu jagħmluh tajjeb is-sinjal
tas-salib? Kemm drabi rajt tfal li ma jafux iroddu s-salib. U intom,
missirijiet, ommijiet, nanniet, parrini, għandkom tgħallmuhom irroddu
s-salib sewwa għax hekk tkunu ttennu dak li sar fil-Magħmudija. Fhimtu?
Ngħallmu lit-tfal jagħmlu tajjeb is-sinjal tas-salib. Jekk
jitgħallmuh meta jkunu għadhom tfal, imbagħad wara jagħmluh
tajjeb, meta jikbru.
Is-salib hu d-distintiv li juri min
aħna: kif nitkellmu, naħsbu, inħarsu, naġixxu qiegħed
taħt is-sinjal tas-salib, jew aħjar, taħt is-sinjal
tal-imħabba ta’ Ġesù sal-aħħar. It-tfal huma mmarkati fuq
il-ġbin tagħhom. Il-katekumeni adulti huma mmarkati anki fuq
is-sensi, b’dawn il-kelmiet: “Ilqgħu s-sinjal tas-salib fuq widnejkom,
biex tisimgħu leħen il-Mulej”; “fuq għajnejkom, biex taraw
il-ġmiel tal-wiċċ ta’ Alla”; “fuq fommkom, biex twieġbu
għall-kelma ta’ Alla”; “fuq sidirkom, biex Kristu permezz tal-fidi
jgħammar fi qlubkom”; “fuq spallejkom, biex terfgħu l-madmad ħelu
ta’ Kristu” (Rit tal-inizjazzjoni Nisranija tal-adulti, n. 85). Insiru
Nsara skont kemm is-salib isir parti minna bħal siġill
“tal-Għid” (ara Apok 14:1; 22:4), u hekk jagħmel viżibbli, anki
minn barra, il-mod Nisrani kif naffrontaw il-ħajja. Meta nagħmlu
s-sinjal tas-salib malli nqumu, qabel l-ikel, quddiem xi periklu,
b’ħarsien mid-deni, filgħaxija qabel norqdu, ifisser li qed
ngħidu lilna nfusna u lill-oħrajn ta’ min aħna, min irridu
nkunu. Għalhekk hu tant importanti ngħallmu lit-tfal jagħmlu
tajjeb is-sinjal tas-salib. U, kif nagħmlu aħna u deħlin
il-knisja, nistgħu nagħmlu d-dar ukoll, billi nżommu bieqja
ċkejkna tajba għal ftit ilma mbierek – xi familji jagħmluh dan:
hekk, kull darba li nidħlu jew noħorġu, xħin nagħmlu
s-sinjal tas-salib b’dak l-ilma, niftakru li aħna mgħammdin.
Tinsewx, nirrepeti: għallmu lil uliedkom iroddu s-salib.
miġjuba mit-Taljan għall-Malti
minn Francesco Pio Attard