IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 18 ta’
Frar 2015
Il-Familja – 5. L-Aħwa
Għeżież ħuti, l-għodwa
t-tajba.
Fil-mixja tal-katekeżi tagħna fuq
il-familja, wara li rajna x’inhu r-rwol ta’ l-omm, tal-missier, ta’ l-ulied,
il-lum imiss lill-aħwa. “Ħija” u “oħti” huma kelmiet li
l-Kristjaneżmu jħobb ħafna.
U, grazzi għall-esperjenza tal-familja, huma kelmiet li l-kulturi u
ż-żminijiet kollha jifhmuhom.
Ir-rabta bejn l-aħwa għandha post
speċjali fl-istorja tal-poplu ta’
Alla, li jirċievi r-rivelazzjoni tiegħu fil-qalba ta’
l-esperjenza umana. Is-Salmista
jgħanni l-ġmiel tar-rabta bejn l-aħwa: “Kemm hi ħaġa
sabiħa u ħelwa li
l-aħwa jgħammru flimkien!” (Salm 133:1). U
dan hu minnu, hi ħaġa sabiħa li ngħixu ta’ aħwa! Ġesù Kristu ġab fil-milja
tagħha anki din l-esperjenza umana li nkunu aħwa ta’ xulxin, u
assumieha fl-imħabba Trinitarja waqt li saħħaħha biex
setgħet tmur lil hemm mir-rabtiet ta’ parentela u tegħleb kull
ħajt ta’ dak li hu barrani.
Nafu li meta
titfarrak ir-relazzjoni bejn l-aħwa, meta titkisser din ir-relazzjoni
bejn l-aħwa, tinfetaħ it-triq għal esperjenzi ta’
wġigħ il-qalb ta’ kunflitt, ta’ tradiment, ta’ mibegħda. Ir-rakkont Bibliku ta’ Kajjin u Abel hu l-eżempju ta’ dan ir-riżultat
negattiv. Wara l-qtil ta’ Abel, Alla
jistaqsi lil Kajjin: “Fejn hu ħuk Abel?” (Ġen 4:9a). Hi mistoqsija li l-Mulej jissokta jtenni
f’kull nisel. U b’xorti
ħażina, f’kull nisel, ma tieqaf qatt lanqas tiġi mtennija
t-tweġiba drammatika ta’ Kajjin: “Ma nafx.
Jaqaw jien għassies ta’ ħija?” (Ġen 4:9b). It-tifrik tar-rabta bejn l-aħwa hi
ħaġa kerha u ħażina għall-umanità. Anki fil-familja, kemm aħwa jillatikaw
bejniethom minħabba fi ħwejjeġ żgħar, jew
għall-wirt, u mbagħad ma jitkellmux iżjed, ma jsellmux aktar lil
xulxin. Din hi ħaġa kerha! L-imħabba bejn l-aħwa hi
ħaġa kbira, meta wieħed jaħseb li l-aħwa kollha
għexu fil-ġuf ta’ l-istess omm għal disa’ xhur, ħarġu
minn laħam l-istess omm! U ma
tistax tkissirha din ir-rabta ta’ l-aħwa.
Naħsbu ftit: kollha nafu familji li għandhom l-aħwa
mifruda bejniethom, li huma miġġeldin; nitolbu lill-Mulej għal
dawn il-familji – forsi fl-istess familja tagħna hemm xi każi – biex
jgħinhom jerġgħu jgħaqqdu l-aħwa bejniethom, jibnu
mill-ġdid il-familja. Ir-rabta ta’
l-aħwa m’għandha qatt tiġi mxellfa, u meta tixxellef,
iseħħ dak li seħħ lil Kajjin u Abel. Meta l-Mulej jistaqsi lil Kajjin fejn kien
ħuh, hu jwieġeb: “Jien ma nafx.
X’jimpurtani minn ħija!”.
Kemm hi ħaġa kerha din, hi ħaġa li toħloq
uġigħ kbir ta’ qalb.
Fit-talbiet tagħna ejjew nitolbu dejjem għall-aħwa
mifruda bejniethom.
Ir-rabta ta’ fraternità
li tissawwar
fil-familja bejn l-ulied, jekk isseħħ fi
klima ta’ edukazzjoni għall-ftuħ lejn l-oħrajn, issir l-iskola
kbira tal-libertà u l-paċi.
Fil-familja, l-aħwa jitgħallmu kif il-bnedmin jgħixu
flimkien, kif wieħed għandu jgħix f’soċjetà. Forsi mhux dejjem aħna konxji, imma hi
propju l-familja li tintroduċi l-imħabba ta’ l-aħwa
fid-dinja! Ibda minn din l-ewwel
esperjenza ta’ bejn l-aħwa, li tixrob mill-imħabba u l-edukazzjoni
fil-familja, l-istil ta’ fraternità jiddi bħala wegħda għas-soċjetà
kollha u għar-relazzjonijiet bejn il-popli.
Il-barka li Alla, f’Ġesù Kristu, isawwab fuq din ir-rabta ta’ bejn l-aħwa tkabbarha b’mod immaġinabbli, u
tagħmilha kapaċi tmur lil hemm minn kull differenza ta’ nazzjon, ta’
lsien, ta’ kultura u saħansitra ta’ reliġjon.
Aħsbu ftit kemm tista’ tikber ir-rabta bejn
il-bnedmin, anki differenti għal kollox bejniethom, meta jistgħu
jgħidu wieħed lill-ieħor: “Dan verament qisu ħija, din
tassew qisha oħti għalija”!
Kemm hi ħaġa sabiħa din!
Mill-bqija, l-istorja wrietna biżżejjed li anki l-libertà u
l-ugwaljanza, mingħajr il-fraternità, jistgħu jimtlew
b’individwaliżmu u konformiżmu, anki b’interess personali.
Ir-rabta ta’ l-aħwa fil-familja tilma b’mod speċjali
meta naraw b’liema għożża, b’liema sabar, u mħabba huma
mdawra l-aħwa l-iktar dgħajfa,
morda, jew li jġorru xi diżabbiltà.
L-aħwa li jagħmlu dan huma ħafna, fid-dinja kollha, u
forsi ma napprezzawx biżżejjed il-ġenerożità tagħhom. U meta l-aħwa huma ħafna
fil-familja – il-lum sellimt familja li għandha disat ulied! – l-ikbar
wieħed, jew l-akbar waħda, tgħin lill-missier, lill-omm, biex jieħdu
ħsieb iż-żgħar. Kemm
hi ħaġa sabiħa din il-ħidma ta’ għajnuna bejn
l-aħwa!
Li jkollok ħuk, oħtok li jħobbuk hi
esperjenza qawwija, li ma tixtrihiex bil-flus, ma jeħdilha postha
xejn. Bl-istess mod nistgħu
nitkellmu dwar il-fraternità Nisranija. L-iżgħar, l-aktar dgħajfa,
l-aktar foqra għandhom imissulna qalbna: għandhom “dritt” li jirbħulna
ruħna u qalbna. Iva, huma
ħutna u għandna nħobbuhom u nittrattawhom bħala tali. Meta jseħħ dan, meta l-foqra huma
qishom ta’ ġewwa, l-istess fraternità Nisranija tagħna terġa’
tieħu l-ħajja. L-Insara,
fil-fatt, jersqu jgħinu lill-foqra u d-dgħajfa mhux biex jobdu xi
programm ideoloġiku, imma għax il-kelma u l-eżempju tal-Mulej
jgħidilna li lkoll aħna aħwa.
Dan hu l-prinċipju ta’ l-imħabba ta’ Alla u ta’ kull
ġustizzja bejn il-bnedmin.
Nissuġġerilkom ħaġa: qabel nispiċċaw,
fadalli ftit biss linji, kull wieħed minna fis-skiet, ejjew naħsbu
f’ħutna, u fis-skiet ta’ qalbna nitolbu għalihom. Mument ta’ skiet.
Hekk hu, b’din it-talba ġibniehom kollha,
ħutna rġiel u nisa, bil-ħsieb, bil-qalb, hawn fil-pjazza biex
jirċievu l-barka.
Il-lum iżjed minn qatt qabel jeħtieġ
inqiegħdu l-imħabba ta’ l-aħwa fiċ-ċentru
tas-soċjetà teknokratika u burokratika tagħna: allura anki l-libertà
u l-ugwaljanza jiksbu l-intonazzjoni t-tajba.
Għalhekk, ejjew ma nċaħħdux għalxejn il-familji
tagħna, minħabba suġġezzjoni jew biża’,
mill-ġmiel ta’ esperjenza wiesgħa ta’ fraternità bejn l-ulied. U ma nitilfux il-fiduċja tagħna
fil-kobor tax-xefaq li l-fidi, imdawla mill-barka ta’ Alla, għandha
l-ħila tislet minn din l-esperjenza.
miġjub
mit-Taljan għall-Malti minn Francesco Pio Attard