IL-PAPA FRANĠISKU
UDJENZA ĠENERALI
Awla Pawlu
VI
L-Erbgħa 17 ta’ Awwissu
2016
26.
Il-Ħniena għodda ta’ Komunjoni (ara
Mt 14:13-21)
Għeżież ħuti, l-għodwa
t-tajba!
Illum nixtieq li nirriflettu fuq il-miraklu tat-tkattir
tal-ħobż. Fil-bidu tar-rakkont li jagħtina Mattew (ara
14:13-210, Ġesù kien għadu kemm ħa l-aħbar tal-mewt ta’
Ġwanni l-Battista, u jaqsam l-għadira bid-dgħajsa jfittex “post
imwarrab” (v. 13) biex ikun waħdu. Imma n-nies tinduna u tmur qablu
bil-mixi hekk li “xħin niżel l-art mid-dgħajsa ra kotra kbira
ta’ nies u tħassarhom, u fejqilhom il-morda tagħhom” (v. 14). Hekk
kien Ġesù: dejjem jitħassar in-nies, dejjem jaħseb
fl-oħrajn. Timpressjonana d-determinazzjoni tan-nies, li tibża’
tibqa’ waħidha, bħal mitluqa. Imut Ġwanni l-Battista, profeta
kariżmatiku, u tafda ruħha f’idejn Ġesù, li dwaru l-istess
Ġwanni kien qal: “Min ġej warajja hu aqwa minni” (Mt 3:11). Hekk
il-folla timxi warajh kull fejn imur, biex tisimgħu u biex teħodlu
l-morda tagħha. U meta jara dan, Ġesù tiġih ħasra minnhom.
Ġesù ma jibqax indifferenti, ma għandux qalb bierda. Ġesù
kapaċi jitqanqal. Minn naħa, hu jħossu qalbu marbuta ma’ din
il-folla u ma jridhiex titlaq; min-naħa l-oħra, iħoss
il-bżonn ta’ mumenti waħdu, fit-talb, mal-Missier. Ħafna drabi
jqatta’ l-lejl jitlob lil Missieru.
Mela anki dakinhar l-Imgħallem iddedikah
għan-nies. Il-ħniena tiegħu mhix xi sentiment vojt; imma tikxef ir-rieda
qawwija tiegħu li jkun qrib tagħna u jifdina. Kemm iħobbna
Ġesù! U kemm jixtieq ikun qrib tagħna!
Meta sar filgħaxija, Ġesù ried
jagħti x’jieklu lil dawk in-nies kollha, għajjenin u
mġewħin, u jieħu ħsieb ta’ dawk li kienu mexjin warajh. U
f’dan jara kif idaħħal lid-dixxipli tiegħu. Fil-fatt
jgħidilhom: “Agħtuhom intom
x’jieklu” (v. 16). U wriehom kif il-ftit ħobżiet u ħutiet li
kellhom, bil-qawwa tal-fidi u tat-talb, setgħu jinqasmu ma’ dawn in-nies
kollha. Ġesù jagħmel miraklu, imma dan hu l-miraklu tal-fidi,
tat-talb, imqanqal mill-ħniena u mill-imħabba. Hekk Ġesù “qasam il-ħobżiet u tahom
lid-dixxipli, u d-dixxipli newluhom lin-nies” (v. 19). Il-Mulej ifittex
x’għandu bżonn il-bniedem, imma jrid li kull wieħed u waħda
minna jkollu sehem konkret fil-ħniena tiegħu.
Nieqfu issa fuq il-ġest tal-barka ta’
Ġesù. Hu “ħa l-ħames
ħobżiet u ż-żewġ ħutiet, rafa’ għajnejh lejn
is-sema, bierek, qasam il-ħobżiet u tahom” (v. 19). Kif
nistgħu naraw, dawn huma l-istess sinjali li Ġesù għamel
fl-Aħħar Ċena; u huma wkoll l-istess li kull saċerdot
iwettaq meta jiċċelebra l-Ewkaristija Mqaddsa. Il-komunità Nisranija
titwieled u terġa’ titwieled kontinwament minn din il-komunjoni
Ewkaristika. Għalhekk li ngħixu f’komunjoni ma’ Kristu jfisser
ħafna iżjed milli nibqgħu passivi u barranin
għall-ħajja ta’ kuljum, anzi, bil-maqlub, idaħħalna dejjem
iżjed f’relazzjoni mal-bnedmin ta’ żmienna, biex noffrulhom is-sinjal
konkret tal-ħniena u tal-attenzjoni ta’ Kristu. Waqt li titmagħna bi
Kristu, l-Ewkaristija li niċċelebraw ftit ftit tibdel lilna wkoll
fil-ġisem ta’ Kristu u f’ikel spiritwali għall-aħwa. Ġesù
jrid jilħaq lil kulħadd, biex lil kulħadd iwassal l-imħabba
ta’ Alla. Għalhekk jagħmel minn kull min jemmen qaddej
tal-ħniena. Ġesù lemaħ il-folla, tħassarha u kattar il-ħobż;
l-istess jagħmel bl-Ewkaristija. U aħna li nemmnu u nirċievu dan
il-ħobż Ewkaristiku, aħna mħeġġa minn Ġesù
biex inwasslu dan il-qadi lill-oħrajn, bl-istess ħniena tiegħu.
Din hi l-mixja li rridu nagħmlu.
Ir-rakkont tat-tkattir tal-ħobż u
l-ħut jagħlaq billi jgħid li lkoll xebgħu u nġabar
il-ħobż li kien fadal (ara v. 20). Meta Ġesù fil-ħniena u
l-imħabba tiegħu jagħtina grazzja, jaħfrilna dnubietna,
jgħannaqna, iħobbna, ma jagħmilx l-affarijiet b’nofs kedda, imma
b’mod sħiħ. Kif ġara hawn: kulħadd xeba’. Ġesù jimla
l-qalb u l-ħajja tagħna bi mħabbtu, bil-maħfra tiegħu,
bil-ħniena tiegħu. Hekk Ġesù ppermetta lid-dixxipli tiegħu
jwettqu l-kmand tiegħu. B’dan il-mod huma jafu xi triq għandhom
jaqbdu: jitimgħu lill-poplu u jżommuh magħqud; jiġifieri
jkunu għall-qadi tal-ħajja u
tal-komunjoni. Mela ejjew nitolbu lill-Mulej biex lill-Knisja tiegħu
jagħmilha dejjem iżjed kapaċi twettaq dan is-servizz imqaddes, u
li kull wieħed u waħda minna jista’ jkun strument ta’ komunjoni
fil-familja tagħna, fuq ix-xogħol, fil-parroċċa u
fil-gruppi tagħna, sinjal viżibbli tal-ħniena ta’ Alla li ma
trid tħalli lil ħadd waħdu fis-solitudni u fil-bżonn, biex
iseħħu l-komunjoni u l-paċi bejn il-bnedmin u l-komunjoni
tal-bmedmin ma’ Alla, għax din il-komunjoni hi ħajja għal
kulħadd.
miġjub
mit-Taljan għall-Malti minn Francesco Pio Attard