IL-PAPA FRANĠISKU
UDJENZA ĠENERALI
L-Erbgħa 16 ta’ Diċembru
2015
2.
Is-Sinjali tal-Ġublew
Għeżież ħuti, l-għodwa
t-tajba!
Il-Ħadd li għadda nfetaħ il-Bieb
Imqaddes fil-Katidral ta’ Ruma, il-Bażilika ta’ San Ġwann Lateran, u
nfetaħ il-Bieb tal-Ħniena
fil-Katidral ta’ kull djoċesi tad-dinja, anki fis-santwarji u fil-knejjes
indikati mill-isqfijiet. Il-Ġublew
hu fid-dinja kollha, mhux biss f’Ruma.
Xtaqt li dan is-sinjal tal-Bieb Imqaddes ikun preżenti f’kull
Knisja partikulari, biex il-Ġublew tal-Ħniena jista’ jsir esperjenza
li kull persuna tista’ tgħix.
Is-Sena Mqaddsa, b’dan il-mod, qed tiġi ċċelebrata
fil-Knisja kollha u f’kull djoċesi bħalma qed isir f’Ruma. Barra dan, l-ewwel Bieb Imqaddes infetaħ
sewwa sew fil-qalba ta’ l-Afrika. U
Ruma, hekk hu, hi s-sinjal viżibbli tal-komunjoni universali. Jalla din il-komunjoni ekkleżjali ssir
dejjem iżjed intensa, biex il-Knisja tkun fid-dinja s-sinjal ħaj ta’
l-imħabba u tal-ħniena tal-Missier.
Anki d-data tat-8 ta’ Diċembru riedet
tisħaq fuq din l-esiġenza, għax rabtet, ħamsin sena wara,
il-bidu tal-Ġublew ma’ l-għeluq tal-Konċilju Ekumeniku Vatikan
II. Fil-fatt, il-Konċilju wettaq u
ppreżenta lill-Knisja fid-dawl tal-misteru tal-komunjoni. Imxerrda mad-dinja kollha u artikulata f’tant
Knejjes partikulari, imma xorta hi dejjem u biss il-Knisja waħda ta’
Ġesù Kristu, dik li Hu ried u li għaliha offra lilU nnifsu. Il-Knisja “waħda” li tgħix
bl-istess xirka tagħha ma’ Alla.
Dan il-misteru ta’ komunjoni, li lill-Knisja
jagħmilha sinjal ta’ l-imħabba tal-Missier, jikber u jimmatura
fil-qalb tagħna, meta l-imħabba, li nagħrfu fis-Salib ta’ Kristu
u li magħha nitwaħħdu, twassalna biex inħobbu kif aħna
stess aħna maħbuba minnU. Din
hi Mħabba bla tarf, li għandha l-wiċċ tal-maħfra u
tal-ħniena.
Imma l-ħniena u l-maħfra
m’għandhomx jibqgħu biss kelmiet sbieħ, imma għandhom
jitwettqu fil-ħajja ta’ kuljum. L-imħabba u l-maħfra huma s-sinjal
konkret u viżibbli li l-fidi tkun bidlet lil qalbna u jħalluna
nesprimu fina l-istess ħajja ta’ Alla.
Inħobbu u naħfru kif iħobb u jaħfer Alla. Dan hu programm ta’ ħajja li ma jistax
jieqaf jew ikollu eċċezzjonijiet, imma jimbuttana biex dejjem immorru
pass lil hemm bla qatt negħjew, għax ċerti li aħna
mwieżna mill-preżenza paterna ta’ Alla.
Dan is-sinjal kbir tal-ħajja Nisranija
mbagħad jinbidel f’ħafna sinjali oħra li huma karatteristiċi
tal-Ġublew. Qed jiġini
f’moħħi kemm nies se jgħaddu minn xi wieħed mill-Bibien
Imqaddsa, li f’din is-Sena huma veri Bibien tal-Ħniena. Il-Bieb juri lil Ġesù nnifsu li qal: “Jiena hu l-bieb; jekk xi ħadd
jidħol ġewwa permezz tiegħi jsalva, u jidħol u joħroġ u jsib fejn jirgħa” (Ġw
10:9). Li ngħaddu mill-Bieb Imqaddes hu s-sinjal tal-fiduċja
tagħna fil-Mulej Ġesù li ma ġiex biex jagħmel ħaqq
minna, imma biex isalvana (ara Ġw 12:47).
Attenti li ma jkunx hemm xi ħadd xi ftit imqajjem u moħħu
jilħaqlu żżejjed li jgħidilkom li tridu tħallsu:
le! Is-salvazzjoni ma tħallasx
għaliha. Is-salvazzjoni ma tixtrihiex. Il-Bieb hu Ġesù, u Ġesù hu b’xejn! Hu stess jitkellem fuq dawk li jridu
jdaħħlu n-nies ġewwa mhux kif suppost, u sempliċement
jgħid li huma ħallelin u briganti.
Nerġa’ ngħidilkom, attenti: is-salvazzjoni tingħata
b’xejn. Meta ngħaddu mill-Bieb
Imqaddes, dan hu sinjal ta’ konverżjoni vera tal-qalb tagħna. Meta ngħaddu minn dak il-Bieb, tajjeb
niftakru li rridu nżommu miftuħ beraħ il-bieb tal-qalb
tagħna. Jien qiegħed quddiem
il-Bieb Imqaddes u nitolbu: “Mulej, għinni niftaħ beraħ il-bieb
tal-qalb tiegħi!”. Ma tantx tkun
ħalliet frott is-Sena Mqaddsa jekk il-bieb tal-qalb tagħna ma
jħallix lil Kristu jgħaddi, li qed jimbuttana biex noħorġu
niltaqgħu ma’ l-oħrajn, biex inwasslulhom lilU u l-imħabba
tiegħu. Mela, kif il-Bieb Imqaddes
sa jibqa’ miftuħ, għax hu s-sinjal ta’ kif jilqa’ Alla lilna, hekk
ukoll il-bieb tagħna, dak tal-qalb tagħna, għandu dejjem ikun
miftuħ beraħ biex ma jeskludi lil ħadd. Lanqas lil dak jew lil dik li qed
tagħtini fastidju: lil ħadd.
Sinjal ieħor importanti tal-Ġublew hu l-Qrar.
Li nersqu lejn is-Sagrament li bih niġu rrikonċiljati ma’ Alla
jfisser li nagħmlu esperjenza diretta tal-ħniena tiegħu. Ifisser li nsibu lill-Missier li jaħfer:
Alla kollox jaħfer. Alla jifhimna
anki fil-limiti tagħna, jifhimna anki fil-kontradizzjonijiet
tagħna. Mhux biss, bi mħabbtu
Hu jgħidilna li propju meta nagħrfu d-dnubiet tagħna hu l-iktar
qrib tagħna u jixprunana biex inħarsu ’l quddiem. Iktar minn hekk, jgħidilna li meta
nagħrfu dnubietna u nitolbuh maħfra, fis-Sema ssir festa. Ġesù jagħmel festa: din hi
l-ħniena tiegħU: ejjew ma naqtgħux qalbna. Nimxu ’l quddiem, b’dan nimxu ’l quddiem!
Kemm drabi ġie min qalli: “Dun, m’hux
jirnexxieli naħfer lill-ġar tiegħi, lil sieħbi fuq
ix-xogħol, lill-ġâra, lill-kunjata, lill-mara ta’ ħija”. Kollha smajnieha din: “M’hux jirnexxieli
naħfer”. Imma kif nistgħu
nitolbu lil Alla jaħfrilna, jekk imbagħad aħna m’aħniex
kapaċi naħfru? U li
taħfer hi ħaġa kbira, imma xorta m’hix ħafifa, li
naħfru, għax il-qalb tagħna hi fqira u bis-saħħa tagħha
biss ma tistax taħfer. Imma jekk
ninfetħu biex nilqgħu l-ħniena ta’ Alla għalina,
imbagħad aħna wkoll insiru kapaċi naħfru. Ħafna drabi smajt lil min jgħid:
“Għax lil dik il-persuna jien ma kontx nista’ naraha, ma kontx
naħmilha: kont nobgħodha. Imma
darba rsaqt f’riġlejn il-Mulej u tlabtU maħfra ta’ dnubieti, u
ħfirt ukoll lil dik il-persuna”.
Dawn ħwejjeġ ta’ kuljum.
U għandna din il-possibbiltà qrib tagħna.
Mela, kuraġġ! Ejjew ngħixu l-Ġublew u nibdew
b’dawn is-sinjali li jimplikaw qawwa kbira ta’ mħabba. Il-Mulej jimxi magħna biex iwassalna
ħalli ngħixu sinjali oħra importanti għal
ħajjitna. Kuraġġ u ejja nimxu!
miġjuba
mit-Taljan għall-Malti minn Francesco Pio Attard