IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 16 ta’ Ottubru 2013
Għeżież ħuti, l-għodwa t-tajba!
Meta nistqarru l-Kredu ngħidu: “Nemmen fi Knisja waħda, qaddisa,
kattolika u appostolika”. Ma nafx qattx irriflettejtu
fuq it-tifsira li għandha l-espressjoni “il-Knisja hi appostolika”. Forsi xi darba, waqt xi żjara f’Ruma,
ħsibtu fuq l-importanza ta’ l-Appostli Pietru u Pawlu li hawn taw
ħajjithom biex iwasslu u jagħtu xhieda tal-Vanġelu.
Imma hi iktar minn hekk. Meta
nistqarru li l-Knisja hi appostolika nkunu qed nagħfsu fuq ir-rabta
kostituttiva li hi għandha ma’ l-Appostli, ma’ dak il-grupp ċkejken
ta’ tnax-il raġel li Ġesù darba sejjaħ għal warajh,
sejħilhom b’isimhom, biex jibqgħu miegħU u biex jibgħathom
jippriedkaw (ara Mk 3:13-19).
“Appostlu”, fil-fatt, hi kelma Griega li tfisser “mibgħut”. Appostlu hu persuna li tiġi
mibgħuta biex tagħmel xi ħaġa, u l-Appostli ġew magħżula,
imsejħa u mibgħuta minn Ġesù, biex jissoktaw l-opra tiegħu,
jiġifieri biex jitolbu – din hi l-ewwel ħidma ta’ kull appostlu – u,
it-tieni, biex iħabbru l-Vanġelu.
Dan hu importanti, għax meta naħsbu fl-Appostli nistgħu
naħsbu li marru biss biex iħabbru l-Vanġelu, biex jagħmlu
ħafna ħwejjeġ. Imma
fl-ewwel żminijiet tal-Knisja kien hemm problema, għax l-Appostli
kellhom ħafna taħbit, u għalhekk waqqfu d-djakni, biex
l-Appostli jkollhom iktar ħin biex jistgħu jitolbu u jxandru l-Kelma
ta’ Alla. Meta naħsbu
fis-suċċessuri ta’ l-Appostli, l-Isqfijiet, inkluż il-Papa
għax anki hu huwa Isqof, jeħtieġ nistaqsu jekk dan
is-suċċessur ta’ l-Appostli qabel xejn jitlobx u mbagħad jekk
iħabbarx il-Vanġelu: dan ifisser li tkun Appostlu u għalhekk
il-Knisja hi appostolika. Ilkoll kemm
aħna, jekk irridu nkunu appostli kif se nfisser issa, jeħtieġ
nistaqsu lilna nfusna: Jien qed nitlob għas-salvazzjoni tad-dinja? Qed inħabbar il-Vanġelu? Din hi l-Knisja appostolika! Hi rabta kostituttiva li għandna ma’
l-Appostli.
Nitlaq propju minn dan, u nixtieq fil-qosor nagħfas fuq tliet
tifsiriet ta’ l-aġġettiv “appostolika” applikat għall-Knisja.
1. Il-Knisja hi appostolika għax hi mwaqqfa fuq il-predikazzjoni u t-talb ta’ l-Appostli, fuq
l-awtorità li tahom Kristu nnifsu. San
Pawl kitbilhom hekk lill-Insara ta’ Efesu: “Intom ċittadini flimkien mal-qaddisin u nies tad-dar ta’ Alla, mibnija
lkoll fuq is-sisien ta’ l-Appostli u tal-Profeti, fejn Kristu hu l-ġebla
tax-xewka” (2:19-20); jiġifieri
jqabbel lill-Insara ma’ ġebel ħaj li jifforma binja li hi l-Knisja, u din il-binja hi mwaqqfa fuq l-Appostli,
bħala kolonni, u l-ġebla tax-xewka li żżomm kollox wieqaf hu Ġesù
nnifsu. Mingħajr Ġesù l-Knisja ma tistax teżisti! Ġesù hu sewwa
sew il-bażi tal-Knisja,
il-pedament!
L-Appostli għexu
ma’ Ġesù, semgħu kliemu, qasmu miegħu
l-ħajja tiegħu, fuq kollox kienu
xhieda tal-Mewt u l-Qawmien tiegħu. Il-fidi tagħna, il-Knisja li Kristu ried, ma
tinbeniex fuq xi idea,
ma tinbeniex fuq xi filosofija, imma tinbena fuq Kristu
nnifsu. U l-Knisja hi bħal xitla li tul is-sekli kibret, żviluppat,
għamlet il-frott, imma l-għeruq tagħha huma mniżżla sewwa fiH, u l-esperjenza fundamentali ta’ Kristu li kellhom l-Appostli, magħżula u mibgħuta
minn Ġesù,
tasal sa għandna. Minn dik ix-xitla
tassew ċkejkna sa żmienna:
hekk hi l-Knisja fid-dinja kollha.
2. Imma nistaqsu lilna nfusna: Kif jista’ jkun li aħna ningħaqdu
ma’ dik ix-xhieda, kif jista’ jasal sa għandna dak li għexu
l-Appostli ma’ Ġesù, dak li huma semgħu minn għandU? Hawn hi t-tifsira tat-terminu
“appostoliċità”. Il-Katekiżmu tal-Knisja Kattolika
jafferma li l-Knisja hi appostolika għax “tħares u twassal, bl-għajnuna ta’ l-Ispirtu s-Santu, li
jgħammar fiha, it-tagħlim, it-teżor sabiħ, il-kliem qaddis
li ġie fdat lill-Appostli” (nru 857).
Il-Knisja ilha tgħożż matul is-sekli dan it-teżor
prezzjuż, li hu l-Iskrittura Mqaddsa, id-duttrina, is-Sagramenti,
il-ministeru tar-Rgħajja, biex hekk nistgħu nkunu fidili lejn Kristu
u nieħdu sehem fl-istess ħajja tiegħu. Hu bħal xmara li tnixxi fl-istorja,
tiżviluppa, issaqqi, imma l-ilma li jnixxi minnha dejjem jibqa’ dak li jagħmel
parti mill-għajn, u l-għajn hu Kristu nnifsu: Hu l-Irxoxt, Hu
l-Ħaj, u kliemu ma jgħaddix, għax Hu ma jgħaddix, Hu
ħaj, Hu l-lum jinsab hawn fostna, Hu jismagħna u aħna nitkellmu
miegħU u Hu jismagħna, qiegħed fil-qalb tagħna. Ġesù jinsab magħna, il-lum! Dan hu l-ġmiel tal-Knisja:
il-preżenza ta’ Ġesù Kristu fostna.
Qatt ħsibna fuq kemm hu importanti dan id-don li Kristu tana,
id-don tal-Knisja, fejn nistgħu niltaqgħu miegħu? Qatt ħsibna fuq kif hi propju l-Knisja
fil-mixja tagħha matul dawn is-sekli – minkejja d-diffikultajiet,
il-problemi, id-dgħufijiet, id-dnubiet tagħna – li tgħaddilna l-messaġġ
awtentiku ta’ Kristu? Tagħtina
ċ-ċertezza li dak li nemmnu aħna hu tabilħaqq dak li
xandrilna Kristu?
3. L-aħħar ħsieb: il-Knisja hi appostolika għax hi mibgħuta biex twassal il-Vanġelu
lid-dinja kollha. Hi tissokta
fil-mixja ta’ l-istorja l-istess missjoni li Ġesù fada lill-Appostli: “Morru, mela, agħmlu dixxipli mill-ġnus kollha, u għammduhom fl-isem tal-Missier u ta’ l-Iben u ta’ l-Ispirtu s-Santu, u għallmuhom
iħarsu dak kollu li ordnajtilkom jien. U ara, jiena magħkom
dejjem, sa l-aħħar taż-żmien” (Mt
28:19-20). Dan hu dak li Ġesù
talabna nagħmlu! Ninsisti fuq dan
l-aspett tal-missjonarjetà, għax Kristu lil kulħadd qed jistieden
biex “immorru” niltaqgħu ma’ l-oħrajn, jibgħatna, jitlobna
niċċaqilqu minn postna biex inwasslu l-ferħ tal-Vanġelu! Nistaqsu lilna nfusna għal
darb’oħra: Qed inkunu missjunarji permezz ta’ kliemna, imma fuq kollox
bil-ħajja Nisranija tagħna, bix-xhieda tagħna? Jew aħna Nsara magħluqa fil-qalb
tagħna u fil-knejjes tagħna, Insara tas-sagristija? Insara tat-tpaċpiċ biss, imma li
jgħixu ta’ pagani? Irridu
nagħmluhom dawn il-mistoqsijiet, li m’humiex ċanfira. Anki jien nistaqsi lili nnifsi: Kif qed inkun
Nisrani, bix-xhieda vera?
Il-Knisja għandha l-għeruq tagħha fit-tagħlim ta’
l-Appostli, xhieda awtentiċi ta’ Kristu, imma hi tħares lejn
il-futur, hi fermament konxja li hi mibgħuta – mibgħuta minn
Ġesù –, li hi missjunarja, li qed twassal l-isem ta’ Ġesù permezz
tat-talb, tat-tħabbira u tax-xhieda.
Knisja li tingħalaq fiha nfisha u fl-imgħoddi, Knisja li
tħares biss lejn ir-regoli żgħar tad-drawwiet, ta’
l-atteġġjamenti, hi Knisja li qed tittradixxi l-identità tagħha;
Knisja magħluqa tittradixxi l-identità tagħha! Għalhekk il-lum ejjew niskopru
l-ġmiel kollu u r-responsabbiltà li għandna bħala Knisja
appostolika! U ftakruha din: Knisja
appostolika għax nitolbu – dan l-ewwel dmir – u għax inħabbru
l-Vanġelu bil-ħajja tagħna u bi kliemna.
miġjuba mit-Taljan
għall-Malti minn Francesco Pio Attard