IL-PAPA
FRANĠISKU
UDJENZA
ĠENERALI
L-Erbgħa
15 ta’ Novembru 2017
Il-Quddiesa
– 2. Il-Quddiesa hi talba
Għeżież
ħuti, l-għodwa t-tajba!
Inkomplu
bil-katekeżi fuq il-Quddiesa. Biex nifhmu l-ġmiel
taċ-ċelebrazzjoni Ewkaristika, nixtieq nibda b’aspett sempliċi
ħafna: il-Quddiesa hi talba, anzi, hi t-talba per eċċellenza,
l-ogħla waħda, l-aktar sublimi, u fl-istess waqt l-iżjed
“konkreta”. Fil-fatt, hija l-laqgħa ta’ mħabba ma’ Alla permezz
tal-Kelma tiegħu u tal-Ġisem u d-Demm ta’ Ġesù. Hi laqgħa
mal-Mulej.
Imma l-ewwel
irridu nwieġbu għal mistoqsija. X’inhu tabilħaqq it-talb? Hu
qabelxejn djalogu, relazzjoni personali ma’ Alla. U l-bniedem ġie
maħluq bħala essri f’relazzjoni personali ma’ Alla li jsib il-milja
sħiħa tiegħu biss fil-laqgħa mal-Ħallieq tiegħu.
It-triq tal-ħajja miexja lejn il-laqgħa għal dejjem mal-Mulej.
Il-Ktieb
tal-Ġenesi jafferma li l-bniedem ġie maħluq fuq ix-xbieha u
s-sura ta’ Alla, li hu Missier u Iben u Spirtu s-Santu, relazzjoni perfetta ta’
mħabba li hi għaqda. Minn dan nistgħu nifhmu li aħna lkoll
ġejna maħluqa biex nidħlu f’relazzjoni perfetta ta’ mħabba,
f’għotja kontinwa tagħna nfusna lil xulxin biex hekk nistgħu
nsibu l-milja ta’ dak li aħna.
Meta Mosè, quddiem
l-għollieq jaqbad, sema’ lil Alla jsejjaħlu, talbu jgħidlu
x’jismu. U xi jwieġeb Alla? “Jien dak li jien” (Eż 3:14). Din l-espressjoni,
fis-sens oriġinali tagħha, tesprimi preżenza u risq, u fil-fatt dritt wara Alla jżid:
“Il-Mulej, Alla ta’ missirijietkom, Alla ta’ Abraham, ta’ Iżakk u ta’
Ġakobb” (v. 15). Hekk ukoll Kristu, meta jsejjaħ lid-dixxipli
tiegħu, isejħilhom biex jibqgħu miegħu. Mela din hija l-ikbar grazzja: li nħossu li
l-Quddiesa, l-Ewkaristija hi l-mument ipprivileġġjat biex
noqogħdu ma’ Ġesù, u, permezz tiegħu, ma’ Alla u ma’ ħutna.
It-talb, bħal
kull djalogu veru, ifisser ukoll li tagħraf toqgħod fis-skiet –
fid-djalogi hemm mumenti ta’ silenzju –, u fis-skiet flimkien ma’ Alla. U meta
aħna mmorru l-Quddiesa, forsi naslu xi ħames minuti qabel u nibdew
inpaċpċu ma’ ta’ maġenbna. Imma dak mhuwiex il-mument li fih toqgħod
tpaċpaċ: hu l-mument tas-skiet biex nitħejjew għad-djalogu.
Hu l-mument li fih nidħlu ġewwa fina biex nitħejjew
għal-laqgħa tagħna ma’ Ġesù. Is-skiet hu importanti
ħafna! Ftakru x’għidtilkom il-ġimgħa li għaddiet:
m’aħniex sejrin għal xi spettaklu, sejrin għal-laqgħa
tagħna mal-Mulej, u s-skiet iħejjina u jseħibna. Nibqgħu
ma’ Ġesù fis-skiet. U mis-skiet misterjuż ta’ Alla toħroġ
il-Kelma tiegħu li tidwi fil-qalb tagħna. Ġesù nnifsu
jgħallimna kif hu tabilħaqq possibbli “noqogħdu” mal-Missier u
dan jurihulna bit-talb tiegħu. Il-Vanġeli juruna lil Ġesù li
jinġabar waħdu f’postijiet maqtugħa biex jitlob; id-dixxipli,
meta jaraw din ir-relazzjoni intima tiegħu mal-Missier, iħossu
l-bżonn li jkollhom sehem minnha, u jitolbuh: “Mulej, għallimna
nitolbu” (Lq 11:1). Smajna fl-Ewwel Qari, fil-bidu tal-udjenza. Ġesù
jweġibhom li l-ewwel ħaġa meħtieġa biex nistgħu
nitolbu hi li nagħrfu llissnu “Missier”. Attenti: jekk jien lil Alla ma
nafx ngħidlu “Missier”, m’iniex kapaċi nitlob. Irridu nitgħallmu
ngħidu “Missierna”, jiġifieri noqogħdu fil-preżenza
tiegħu b’kunfidenza ta’ wlied. Imma biex nistgħu nitgħallmu,
hemm bżonn li umilment nagħrfu li għandna bżonn niġu
mgħallma, u ngħidu bis-sempliċità: Mulej, għallimni nitlob.
Dan l-ewwel punt:
inkunu umli, nagħrfu li aħna wlied, nistrieħu fil-Missier,
nafdaw fih. Biex nidħlu fis-Saltna tas-smewwiet hu meħtieġ
niċċekknu bħal tfal. Fis-sens li t-tfal jafu jafdaw, jafu li xi
ħadd ħa jieħu ħsiebhom, ħa jieħu ħsieb
jipprovdilhom l-ikel, x’jilbsu u l-bqija (ara Mt 6:25-32). Dan hu l-ewwel
atteġġjament: fiduċja u
kunfidenza, bħall-ulied mal-ġenituri tagħhom; int taf li
Alla se jiftakar fik, jieħu ħsiebek, tiegħek, tiegħi, ta’
kulħadd.
It-tieni
predispożizzjoni, li wkoll hi ħaġa li ssibha fit-tfal, hi li nħallu lil min jissorprendina.
It-tfal dejjem jagħmlu elf mistoqsija għax iridu jiskopru d-dinja; u
jistagħġbu mqar bi ħwejjeġ żgħar għax kollox
ġdid għalihom. Biex nidħlu fis-Saltna tas-smewwiet hemm
bżonn inħallu lil min jgħaġġibna. Fir-relazzjoni
tagħna mal-Mulej, fit-talb – nistaqsi jien – qed inħallu lil min
jgħaġġibna, jew naħsbu li t-talb ifisser nitkellmu ma’ Alla
bħall-pappagalli? Le, ifisser li nafdaw ruħna f’idejh u niftħu
qalbna biex inħalluh jgħaġġibna. Qed inħallu lil Alla
jissorprendina, hu li hu dejjem Alla tas-sorpriżi? Għax
il-laqgħa mal-Mulej hi dejjem laqgħa ħajja, mhux laqgħa ta’
xi mużew. Hi laqgħa ħajja u aħna mmorru għall-Quddiesa
u mhux f’xi mużew. Sejrin għal laqgħa ħajja mal-Mulej.
Fil-Vanġelu
nisimgħu dwar ċertu Nikodemu (Ġw 3:1-21), raġel anzjan,
awtorità f’Iżrael, li jmur għand Ġesù biex isir jafu aħjar;
u l-Mulej ikellmu fuq il-ħtieġa li “jitwieled ġdid mill-għoli”
(ara v. 3). Imma xi jfisser dan? Tista’ “terġa’ titwieled”? Possibbli
terġa’ lura għall-gost, il-ferħ, l-għoġba
tal-ħajja, anki quddiem tant traġedji? Din hi mistoqsija fundamentali
tal-fidi tagħna u din hi x-xewqa ta’ kull min jemmen: ix-xewqa li
jerġa’ jitwieled mill-ġdid, il-ferħ li jerġa’ jibda
mill-ġdid. Aħna għandna din ix-xewqa? Kull wieħed u
waħda minna jixtieq jitwieled dejjem mill-ġdid biex jiltaqa’
mal-Mulej? Intom għandkom din ix-xewqa? Fil-fatt, nistgħu
faċilment nitilfuha, għax, minħabba tant attivitajiet, tant
proġetti li rridu nagħmlu, fl-aħħar ftit li xejn jifdlilna
ħin u nitilfu l-mira ta’ dak li hu fundamentali: il-ħajja tal-qalb
tagħna, il-ħajja spiritwali tagħna, il-ħajja tagħna li
hi laqgħa mal-Mulej fit-talb.
Fil-verità,
il-Mulej jissorprendina meta jurina li hu jħobbna anki fid-dgħufijiet
tagħna. “Ġesù Kristu […] iħallas għal dnubietna,
mhux għal tagħna biss, iżda wkoll għal dawk tad-dinja kollha” (1 Ġw 2:1-2). Dan id-don, għajn ta’
faraġ veru – għax il-Mulej dejjem jaħfrilna – dan, ifarraġ,
hu faraġ tassew, hu don li jingħatalna permezz tal-Ewkaristija, dik
l-ikla tat-tieġ li fiha l-Għarus jiltaqa’ mad-dgħufija
tagħna. Nista’ ngħid li meta nitla’ nitqarben fil-Quddiesa, il-Mulej qed
jiġi jiltaqa’ mad-dgħufija tiegħi? Iva! Nistgħu ngħidu
hekk, għax hu minnu! Il-Mulej jiltaqa’ mad-dgħufija tagħna biex
ireġġagħna lura għall-ewwel sejħa tagħna: dik li
nkunu fuq ix-xbieha u s-sura ta’ Alla. Dan hu l-ambjent tal-Ewkaristija, dan hu
t-talb.
miġjub mit-Taljan għall-Malti minn
Francesco Pio Attard