IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 14 ta’ Ġunju
2017
It-Tama Nisranija
– 26.
Ulied
maħbuba, ċertezza tat-Tama
Għeżież ħuti, l-għodwa
t-tajba!
Illum qed nagħmlu din l-udjenza
f’żewġ postijiet, imma magħqudin flimkien bl-iskrins il-kbar:
il-morda, biex ma jbatux wisq sħana, qegħdin fl-Awla Pawlu VI, u mhux
hawn. Imma xorta nibqgħu lkoll flimkien u jgħaqqadna l-Ispirtu
s-Santu, li hu dak li dejjem iġib l-għaqda. Insellmu lil dawk li
jinsabu fl-Awla!
Ħadd minna ma jgħaddi mingħajr
imħabba. U jasar ikrah li fih nistgħu naqgħu hu dak li
naħsbu li l-imħabba nistgħu nimmeritawha. Forsi parti kbira
mit-tbatija tal-bniedem tal-lum ġejja minn hawn: għax naħsbu li
jekk ma nkunux b’saħħitna, attraenti u sbieħ, allura ħadd
mhu ħa jagħti kasna. Tant persuni llum ifittxu li jidhru
sempliċement biex jgħattu vojt li għandhom ġo fihom:
bħallikieku konna persuni dejjem fil-bżonn ta’ konfermi. Imma intom
tistgħu timmaġinaw dinja fejn kulħadd ifittex mod kif
jiġbed l-attenzjoni tal-oħrajn, waqt li ħadd mhu lest iħobb b’xejn lil persuna oħra?
Immaġinaw dinja hekk: dinja fejn ma teżistix imħabba b’xejn!
Tidher dinja umana, imma fir-realtà tkun infern. Tant narċisiżmi
tal-bniedem jitnisslu minn sentiment ta’ solitudni u għax iħossu ltim.
Wara tant imġibiet apparentement inspjegabbli hemm mistura mistoqsija:
possibbli jien ma jixraqlix nissejjaħ b’ismi, jiġifieri li niġi
maħbub? Għax l-imħabba dejjem issejjaħ bl-isem…
Meta dak li mhux iħossu jew mhux
maħbub ikun adolexxent, allura tista’ tinbet il-vjolenza. Wara tant
xejriet ta’ mibegħda soċjali u ta’ vandaliżmu spiss issib qalb
li ħadd ma ta kasha. Ma jeżistux tfal kattivi, kif ma jeżistux
adolexxenti ħżiena għalkollox, imma jeżistu persuni mdejqa. U x’jista’ jagħmilna ferħanin jekk mhux l-esperjenza tal-imħabba
mogħtija u milqugħa? Il-ħajja tal-bniedem hi skambju ta’ ħars: xi ħadd li jħares
lejna u jirnexxilu jikseb minn għandna l-ewwel tbissima, u aħna li nitbissmu mill-qalb lil min jinsab imsakkar
fid-dwejjaq tiegħu, u hekk niftħulu triq quddiemu li minnha jista’
joħroġ. Skambju ta’ ħars: inħarsu f’għajnejn xulxin u
hekk jinfetħu l-bibien tal-qalb.
L-ewwel
pass li Alla jmidd lejna hu dak ta’ mħabba li tasal qabilna u ma
fihiex kundizzjonijiet. Alla li jħobb hu l-ewwel. Alla ma jħobbniex
għax fina hemm xi raġuni li tqanqal l-imħabba. Alla jħobbna
għax hu stess hu mħabba, u
l-imħabba min-natura tagħha trid tixtered, tingħata. Alla lanqas
jorbot it-tjieba tiegħu mal-konverżjoni tagħna: jekk xejn, din
hi konsegwenza tal-imħabba ta’ Alla. San Pawl dan jgħidu b’mod
perfett: “Alla wriena l-imħabba tiegħu meta Kristu miet għalina,
aħna li konna għadna midinbin”
(Rum 5:8). Aħna li konna għadna
midinbin. Imħabba bla kundizzjonijiet. Konna “mbegħdin”,
bħall-iben il-ħali tal-parabbola: “Iżda kif kien għadu
fil-bogħod missieru lemħu u tħassru…” (Lq 15:20).
Għall-imħabba tagħna Alla ħareġ minnu nnifsu, biex
jiġi jsibna f’din il-miżbla fejn ma kienx jagħmel sens li hu jgħaddi.
Alla ħabbna anki meta konna fl-iżball.
Min minna jħobb b’dan il-mod, jekk mhux min
hu missier jew omm? Omm tkompli tħobb lil binha mqar meta binha jkun
il-ħabs. Jien, fid-djoċesi li kelli qabel, niftakar ħafna
ommijiet li kont tarahom ringiela wara xulxin biex jidħlu l-ħabs. U
ma kinux jistħu. Binhom kien il-ħabs, imma kien binhom. U kienu jbatu ħafna
umiljazzjonijiet fil-perkwiżizzjoni, qabel jidħlu, imma: “Ibni hu!”. “Imma Sinjura, ibnek
delinkwent!”. “Dak ibni!”. Din l-imħabba ta’ omm u ta’ missier biss turina
kif inhi l-imħabba ta’ Alla. Omm ma titlobx li titħassar il-ġustizzja
umana, għax kull żball jitlob fidwa, imma omm ma tieqaf qatt tbati
għal binha. Tħobbu anki meta jidneb. Alla magħna jagħmel
l-istess ħaġa: aħna wliedu
maħbuba! Imma jista’ jkun li Alla għandu xi wlied li ma
jħobbhomx? Le. Aħna kollha wlied maħbuba ta’ Alla. Ma hemm
l-ebda saħta mdendla fuq ħajjitna, imma biss kelma tajba ta’ Alla, li
ħalaqna mix-xejn. Il-verità ta’ kollox hi dik ir-relazzjoni ta’ mħabba li torbot lill-Missier mal-Iben permezz
tal-Ispirtu s-Santu, relazzjoni li fiha aħna milqugħin bi grazzja.
Fih, fi Kristu Ġesù, aħna tant aħna mixtieqa, maħbuba. Hemm
Xi Ħadd li stampa fina dak il-ġmiel tal-bidu, li l-ebda dnub, l-ebda
għażla żbaljata ma tista’ qatt tħassar għalkollox. Aħna
f’għajnejn Alla dejjem aħna għejun ċkejkna magħmula
biex minnhom igelgel ilma tajjeb. Dan qalu Ġesù lill-mara Samaritana:
“L-ilma li nagħtih jien isir fih għajn tal-ilma li jwassal
sal-ħajja ta’ dejjem” (Ġw 4:14).
X’inhi l-mediċina biex nibdlu l-qalb ta’
persuni mdejqa? X’inhi l-mediċina biex nibdlu l-qalb ta’ persuna li mhix
kuntenta?
[iwieġbu:
l-imħabba] Għajtu iktar!
[jgħajtu:
l-imħabba!] Bravi!
Bravi, kollha bravi! U kif turiha persuna li inti tħobbha? L-ewwel trid
tgħannaqha. Turiha li hi mixtieqa, li hi importanti, u hekk ma tibqax
imdejqa. L-imħabba tgħajjat
l-imħabba, b’mod iżjed qawwi milli l-mibegħda tgħajjat
il-mewt. Ġesù ma mietx u qam għalih innifsu, imma għalina, biex
jinħafrulna dnubietna. Għalhekk dan hu ż-żmien tal-qawmien
għal kulħadd: żmien li nerfgħu lill-foqra mill-qtigħ
il-qalb, fuq kollox lil dawk li ilhom mixħutin fil-qabar ħafna iktar
minn tlitt ijiem. Qed jonfoħ hawn, fuq wiċċna, ir-riħ
tal-ħelsien. Qed iwarrad hawn id-don tat-tama. U t-tama hi dik ta’ Alla
l-Missier li jħobbna kif aħna: iħobbna dejjem u kollha. Grazzi!
miġjuba
mit-Taljan għall-Malti minn Francesco Pio Attard