IL-PAPA
FRANĠISKU
UDJENZA
ĠENERALI
Pjazza San Pietru
L-Erbgħa 14 ta’ Frar 2018
Il-Quddiesa
– 10. Il-Liturġija tal-Kelma. III. Il-Kredu
u t-Talbiet universali
Għeżież
ħuti, l-għodwa t-tajba!
L-għodwa
t-tajba mqar jekk il-ġurnata ma tantx ħarġet sabiħa. Imma
jekk il-qalb tkun ferħana, dejjem hi għodwa tajba. Għalhekk,
l-għodwa t-tajba! Illum l-udjenza sa ssir f’żewġ partijiet:
grupp ċkejken ta’ morda fl-awla, minħabba fit-temp, u aħna hawn.
Imma aħna qed naraw lilhom u huma qed jaraw lilna fuq l-iskrin il-kbir.
Ejja nsellmulhom b’ċapċipa.
Inkomplu bil-katekeżi
tagħna fuq il-Quddiesa. Is-smigħ tal-Qari mill-Bibbja, imtawwal
fl-omelija, għal xiex iwieġeb? Iwieġeb għal jedd: il-jedd
spiritwali tal-poplu ta’ Alla li jirċievi bil-kotra t-teżor tal-Kelma
ta’ Alla (ara Introduzzjoni
għal-Lezzjonarju, 45). Kull wieħed u waħda minna meta jmur
il-Quddiesa għandu d-dritt li jirċievi bil-kotra l-Kelma ta’ Alla
moqrija tajjeb, imlissna tajjeb u mbagħad, imfissra tajjeb fl-omelija. Dan
hu dritt! U meta l-Kelma ta’ Alla ma tinqarax kif imiss, ma tiġix
ippritkata b’ħeġġa mid-djaknu, mis-saċerdot jew mill-isqof,
inkunu nonqsu dritt tal-fidili. Aħna għandna d-dritt li nisimgħu
l-Kelma ta’ Alla. Il-Mulej jitkellem għal kulħadd, Ragħajja u
fidili. Hu jħabbat il-bieb ta’ qalb dawk kollha li jieħdu sehem
fil-Quddiesa, kull wieħed u waħda fil-qagħda ta’ ħajtu,
l-età, is-sitwazzjoni. Il-Mulej ifarraġ, isejjaħ, iqanqal għal
ħajja ġdida u rikonċiljata. U dan permezz tal-Kelma tiegħu.
Il-Kelma tiegħu tħabbat fuq il-qalb tagħna u tibdel il-qlub!
Għalhekk,
wara l-omelija, hemm ħin ta’ skiet li jippermetti
ż-żerriegħa li rċivejna tinżel u toqgħod
fir-ruħ, biex minnha jitnisslu proponimenti li nagħmlu dak li
l-Ispirtu jkun issuġġerixxa lil kull wieħed u waħda minna.
Is-skiet ta’ wara l-omelija. Hemmhekk għandu jkun hemm daqsxejn ta’ skiet
ħelu u kulħadd jaħseb f’dak li għadu kemm sema’.
Wara dak is-skiet,
kif tkompli l-Quddiesa? It-tweġiba personali tal-fidi ssir parti mill-istqarrija tal-fidi tal-Knisja, espressa
fil-“Kredu”. Aħna lkoll
nistqarruh il-Kredu fil-Quddiesa.
Meta tgħidu l-ġemgħa kollha flimkien, is-Simbolu juri fid-dieher
it-tweġiba komuni għal dak li flimkien inkunu smajna mill-Kelma ta’
Alla (ara Katekiżmu tal-Knisja
Kattolika, 185-197). Hemm rabta ħajja bejn is-smigħ u l-fidi.
Huma magħqudin flimkien. Din – il-fidi –, fil-fatt, ma titwelidx
mill-fantasija ta’ mħuħ il-bnedmin imma, kif ifakkar San Pawl,
“tiġi mis-smigħ, u s-smigħ mix-xandir tal-kelma ta’ Kristu” (Rum
10:17). Il-fidi, għalhekk, insaħħuha bis-smigħ u twassal
għas-Sagramenti. Hekk, l-istqarrija tal-“Kredu” tgħin
lill-ġemgħa liturġika biex “terġa’ lura
għall-meditazzjoni u l-istqarrija tal-misteri kbar tal-fidi, qabel
iċ-ċelebrazzjoni tagħhom fl-Ewkaristija” (Ordni ġenerali tal-Missal Ruman, 67).
Is-Simbolu
tal-fidi jorbot flimkien l-Ewkaristija mal-Magħmudija, li rċivejnieha
“fl-isem tal-Missier u tal-Iben u tal-Ispirtu s-Santu”, u jfakkarna li
s-Sagramenti nistgħu nifhmuhom biss fid-dawl tal-fidi tal-Knisja.
It-tweġiba
għall-Kelma ta’ Alla milqugħa bil-fidi mbagħad tiġi
espressa fit-talba komuni, li tissejjaħ Talba universali, għax tħaddan il-bżonnijiet kollha
tal-Knisja u tad-dinja (ara OGMR,
69-71; Introduzzjoni
għal-Lezzjonarju, 30-31). Tissejjaħ ukoll Talbiet tal-fidili.
Il-Padri
tal-Konċilju Vatikan II riedu jerġgħu jagħtu l-ħajja
lil din it-talba wara l-Vanġelu u l-omelija, speċjalment
fil-Ħdud u l-festi, biex “bis-sehem tan-nies isir talb għall-Knisja
mqaddsa, għal dawk li għandhom is-setgħa pubblika, għal
dawk li jinsabu fi ħtiġijiet differenti, u wkoll għall-bnedmin
kollha u għas-salvazzjoni tad-dinja kollha” (ara Kostituzzjoni Sacrosanctum concilium, 53; ara 1 Tim
2:1-2). Għalhekk, immexxi mis-saċerdot li jiftaħ u jagħlaq,
“il-poplu, fit-tħaddim tas-saċerdozju li għandu
mill-Magħmudija, joffri lil Alla talbiet għas-salvazzjoni ta’
kulħadd” (OGMR, 69). U wara
l-intenzjonijiet waħda waħda, proposti mid-djaknu jew minn lettur,
il-ġemgħa xxierek il-leħen tagħha u titlob: “Ismagħna,
nitolbuk, Mulej”.
Fil-fatt, niftakru
dak li qalilna l-Mulej Ġesù: “Jekk tibqgħu fija u kliemi jibqa’
fikom, itolbu kulma tridu, u jingħatalkom” (Ġw 15:8). “Imma dan
aħna ma nemmnuhx, għax ftit għandna fidi”. Imma kieku kellna
fidi – jgħidilna Ġesù – imqar daqs żerriegħa tal-mustarda,
kollox konna naqilgħu. “Itolbu kuma tridu, u jingħatalkom”. “Kollox
jista’ jkun għal min jemmen”, qalilna l-Mulej. X’wieġeb dak
ir-raġel li lilu l-Mulej qallu din il-kelma – kollox possibbli għal
min jemmen? Qallu: “Nemmen, Mulej. Għinni fil-fidi nieqsa tiegħi”.
Anki aħna nistgħu ngħidulu: “Mulej, jiena nemmen. Imma
għinni fil-fidi nieqsa tiegħi”. U din it-talba rridu nagħmluha
b’dan l-ispirtu ta’ fidi: “Nemmen, Mulej, għinni fil-fidi nieqsa
tiegħi”. Imma mill-banda l-oħra l-pretensjonijiet tal-loġika ta’
din id-dinja ma jitilgħux lejn is-Sema, l-istess kif jibqgħu mhux
mismugħa t-talbiet awtoreferenzjali (ara Ġak 4:2-3). Il-fehmiet li
għalihom nistiednu lill-poplu fidil biex jitlob għandhom jagħtu
leħen lill-ħtiġijiet konkreti tal-komunità ekkleżjali u
tad-dinja, u jevitaw li jirrikorru għal formli konvenzjonali jew li jaraw
sa mneħirhom. It-talba “universali”, li tagħlaq il-Liturġija
tal-Kelma, tistedinna nagħmlu tagħna l-ħarsa ta’ Alla nnifsu, li
jieħu ħsieb ta’ wliedu kollha.
miġjub mit-Taljan għall-Malti minn
Francesco Pio Attard