IL-PAPA FRANĠISKU
UDJENZA ĠENERALI
Pjazza
San Pietru
L-Erbgħa
11 ta’ Diċembru 2013
Għeżież
ħuti, l-għodwa t-tajba!
Il-lum nixtieq
niftaħ l-aħħar serje ta’ katekeżi fuq l-istqarrija tal-fidi
tagħna billi nittratta l-affermazzjoni “Nemmen fil-ħajja ta’ dejjem”. B’mod partikulari nieqaf fuq il-ġudizzju
fl-aħħar taż-żmien.
Imma m’għandniex għax nibżgħu: nisimgħu
x’tgħidilna l-Kelma ta’ Alla. Dwar
dan, naqraw hekk fil-Vanġelu ta’ Mattew: Dak in-nhar Kristu “jiġi fil-glorja tiegħu u bl-anġli kollha miegħu…
U quddiemu
jinġabru l-ġnus kollha, u hu jifridhom
minn xulxin, bħalma r-ragħaj jifred in-nagħaġ mill-mogħoż: in-nagħaġ iqegħedhom fuq il-lemin tiegħu
u l-mogħoż fuq
ix-xellug…
U dawn imorru
fit-tbatija ta’ dejjem u l-ġusti fil-ħajja ta’ dejjem” (Mt
25:31-33,46). Meta naħsbu f’dak
il-jum li fih Kristu għad jerġa’ jiġi u fil-ġudizzju ta’
l-aħħar, li fih jidher il-ġid li kull bniedem ikun għamel
jew ikun naqas li jagħmel tul il-ħajja tiegħu fuq din l-art,
bil-konsegwenzi kollha li joħorġu minn hekk, inħossuna
qegħdin quddiem misteru ogħla minna, li bilkemm nistgħu
nimmaġinaw. Misteru li kważi b’mod
naturali jqajjem fina sens ta’ biża’, u forsi anki ta’ twerwir. Imma jekk nirriflettu tajjeb fuq din
ir-realtà, din m’hix ħlief raġuni qawwija ta’ faraġ u ta’ fiduċja
li twessa’ qalb in-Nisrani.
Dwar dan,
ix-xhieda ta’ l-ewwel komunitajiet Insara tidwi qawwija daqs qatt qabel. Fil-fatt, fiċ-ċelebrazzjonijiet u fit-talb
tagħhom, huma kienu mdorrija jlissnu l-akklamazzjoni Maranathà, espressjoni magħmula minn żewġ kelmiet
bl-Aramajk li, skond kif jiġu ppronunzjati, jistgħu jinftiehmu
bħala supplika: “Ejja, Mulej!”, jew bħala ċertezza li tiġi
mill-fidi: “Iva, il-Mulej ġej, il-Mulej hu fil-qrib”. F’din l-esklamazzjoni tilħaq il-qofol
tagħha r-Rivelazzjoni Nisranija kollha kemm hi, fi tmiem kontemplazzjoni
meraviljuża li joffrulna l-Apokalissi ta’ Ġwanni (ara Apok
22:20). F’dak il-każ, hi
l-Knisja-għarusa li, f’isem l-umanità kollha u bħala l-ewwel frott
tagħha, iddur f’riġlejn Kristu, l-għarus tagħha, fuq
ix-xwiek li tinħafen mit-tgħanniqa tiegħu: it-tgħanniqa ta’
Ġesù, li hi l-milja tal-ħajja u l-milja ta’ l-imħabba. Hekk jgħannaqna Ġesù. Jekk naħsbu fil-ġudizzju minn din
il-lenti, inwarrbu kull biża’ u dubju u minflok ikollna sens ta’ stennija
u ferħ profond: dan għad ikun sewwa sew il-mument li fih niġu
ġġudikati, lesti sa fl-aħħar biex niġu mlibbsa
bil-glorja ta’ Kristu, bħal b’libsa ta’ tieġ, u mmexxija lejn
il-festa tat-tieġ, xbieha tal-komunjoni sħiħa u dejjiema ma’
Alla.
It-tieni
raġuni li timliena bil-fiduċja qiegħda fil-wegħda li
għandna li, fil-waqt tal-ġudizzju, m’aħniex sa nitħallew waħidna. Ġesù nnifsu, fil-Vanġelu ta’
Mattew, iħabbar kif, fl-aħħar taż-żminijiet, dawk li
jkunu mxew warajh isibu posthom fil-glorja tiegħu, biex jagħmlu
ħaqq flimkien miegħu (ara Mt 19:28)
Imbagħad l-Appostlu Pawlu, huwa u jikteb lill-komunità ta’ Korintu,
jistqarr: “Jaqaw ma tafux li
l-qaddisin għad jagħmlu ħaqq mid-dinja? Kemm iktar, mela, mill-ħwejjeġ ta’
din il-ħajja!” (1 Kor 6:2-3). Kemm
hi ħaġa sabiħa din li nafu li f’dak il-mument deċiżiv,
barra fuq Kristu, il-Paraklitu tagħna, l-Avukat tagħna quddiem
il-Missier (ara 1 Ġw 2:1), nistgħu norbtu wkoll fuq
l-interċessjoni u t-tjieba ta’ tant minn ħutna rġiel u nisa ikbar
minna li terrqu qabilna l-mixja tal-fidi, li offrew ħajjithom għalina
u li jissoktaw iħobbuna b’mod li ma jitfissirx bil-kliem! Il-qaddisin diġà jgħixu quddiem
Alla, fil-ġmiel tal-glorja tiegħu, u jitolbu għalina li għadna
ngħixu f’din id-dinja. Liema
faraġ tqajjem f’qalbna din iċ-ċertezza! Il-Knisja hi tabilħaqq omm u, bħal
kull omm, tfittex il-ġid
ta’ wliedha, fuq kollox ta’ dawk li huma l-iżjed imbiegħda u
mħabbta, sakemm issib il-milja tagħha fil-ġisem glorjuż ta’
Kristu bil-membri kollha tiegħu.
Ħaġa
oħra li taffaxxinana nsibuha fil-Vanġelu ta’ Ġwanni, fejn insibu
l-affermazzjoni espliċita li “Alla
ma bagħatx lil Ibnu fid-dinja biex jagħmel ħaqq mid-dinja, imma biex id-dinja
ssalva permezz tiegħu. Min jemmen
fih ma jkunx ikkundannat; iżda min ma jemminx huwa ġa
kkundannat, għax ma emminx fl-isem ta’ l-Iben il-waħdieni ta’ Alla” (Ġw 3:17-18). Dan allura
jfisser li dak il-ġudizzju finali
diġà qed iseħħ, jibda issa matul l-eżistenza
tagħna. Dan il-ġudizzju
jitlissen f’kull waqt tal-ħajja, qisu konferma ta’ kull għemil li bih
aħna nilqgħu bil-fidi s-salvazzjoni li hi preżenti u taħdem
fi Kristu, inkella ta’ meta ma nemmnux u hekk ningħalqu fina nfusna. Imma jekk aħna ningħalqu
għall-imħabba ta’ Ġesù, aħna stess inkunu nikkundannaw
lilna nfusna. Is-salvazzjoni hi li
ninfetħu għal Ġesù, biex Hu jsalvana; jekk aħna midinbin – u lkoll aħna –
nitolbuH maħfra, u jekk immorru għandU bir-rieda li ngħixu
ħajja tajba, il-Mulej jaħfrilna.
Imma biex nagħmlu dan jeħtieġ ninfetħu
għall-imħabba ta’ Ġesù, li hi aqwa mill-ħwejjeġ
l-oħra kollha. L-imħabba ta’ Ġesù
hi kbira, l-imħabba ta’ Ġesù hi kollha ħniena, l-imħabba
ta’ Ġesù taħfer; imma jeħtieġ li int tiftaħ qalbek, u
tiftaħ qalbek ifisser tindem, tixli lilek innifsek b’dawk
il-ħwejjeġ li m’humiex tajbin u li int għamilt. Il-Mulej Ġesù ngħata u jkompli jingħata
għalina, biex jaħsilna bil-ħniena kollha tiegħu u
bil-grazzja tal-Missier. Għalhekk
f’ċertu sens aħna stess nistgħu nsiru mħallfin tagħna
nfusna, billi nikkundannaw lilna nfusna għal ħajja ’l barra
mill-komunjoni ma’ Alla u ma’ ħutna.
Għalhekk ejjew ma negħjew qatt ngħassu fuq
il-ħsibijiet u l-atteġġjamenti tagħna, biex nistgħu
nduqu minn issa stess l-imħabba u l-ġmiel tal-wiċċ ta’ Alla
– u dan sa jkun sabiħ ħafna – li fil-ħajja ta’ dejjem għad
nikkontemplawh fil-milja kollha tiegħu.
Nibqgħu mexjin ’il quddiem, bil-ħsieb f’moħħna ta’
dan il-ġudizzju li jibda minn issa, li diġà beda. Nimxu, u nagħmlu mod li qalbna tkun
miftuħa għal Ġesù u għas-salvazzjoni tiegħu; nimxu bla
biża’, għax l-imħabba ta’ Ġesù hi wisq ikbar, u jekk
aħna nitolbu maħfra ta’ dnubietna, Hu jaħfrilna. Hekk hu magħmul Ġesù! Ejjew mela nimxu b’din iċ-ċertezza,
li trid twassalna għall-glorja tas-Sema!
miġjuba mit-Taljan
għall-Malti minn Francesco Pio Attard