IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 11 ta’ Novembru 2015
Kelmtejn fil-bidu ta’ l-Udjenza Ġenerali
F’dawn il-jiem il-Knisja fl-Italja qed
tiċċelebra l-Konvenju Nazzjonali f’Firenze. Il-kardinali, l-isqfijiet, l-ikkonsagrati, il-lajċi,
kulħadd flimkien. Nistedinkom
titolbu Sliema lill-Madonna għalihom.
[Sliema
għalik]
KATEKEŻI
TAL-QDUSIJA TIEGĦU L-PAPA
Il-Familja – 32. Il-konvivjalità [li ngħixu flimkien fil-ferħ]
Għeżież ħuti, l-għodwa
t-tajba!
Il-lum se nirrifletti fuq kwalità karatteristika
tal-ħajja fil-familja li wieħed jitgħallem sa mill-ewwel snin
tal-ħajja: il-konvivjalità, jiġifieri meta naqsmu flimkien il-ġid
tal-ħajja u nifirħu li nistgħu nagħmlu dan. Li naqsmu u nagħrfu naqsmu hi virtù prezzjuża! Is-simbolu tagħha, l-“ikona” tagħha, hi l-familja miġbura mal-mejda tad-dar. Il-qsim ta’ l-ikla – u għalhekk, barra ta’ l-ikel, anki tar-rispett, tar-rakkonti, tal-ġrajjiet… – hu esperjenza fundamentali. Meta hemm festa, għeluq snin xi ħadd, anniversarju, insibu ruħna madwar il-mejda. F’xi kulturi hi drawwa li dan isir
ukoll b’sens ta’ viżtu, biex wieħed ikun qrib ta’ min hu mnikket għat-telfa ta’ xi qarib.
Il-konvivjalità hi termometru żgur
biex inkejlu kemm huma b’saħħithom ir-relazzjonijiet: jekk
fil-familja hemm xi ħaġa sejra ħażin, jew xi
ġerħa moħbija, minn fuq il-mejda tintebaħ dritt. Familja li kważi qatt ma tiekol
flimkien, jew fejn fuq il-mejda ma jitkellmux ma’ xulxin imma kulħadd jara
t-televiżjoni, jew is-smartphone,
hi familja “ftit li xejn familja”. Meta
l-ulied mal-mejda huma mwaħħlin mal-kompjuter, mal-mowbajl, u ma
jisimgħux lil xulxin, din m’hix familja, dik lukanda.
Il-Kristjaneżmu għandu sejħa
speċjali għall-konvivjalità, kulħadd jafha din. Il-Mulej Ġesù kien iħobb ħafna
jgħallem madwar il-mejda, u xi drabi kien iqabbel is-saltna ta’ Alla ma’
ikla ta’ festa. Ġesù
għażel il-mejda wkoll biex jgħaddi lid-dixxipli tiegħu
t-testment spiritwali tiegħu – dan għamlu waqt ċena –
miġbur kollu fil-ġest memorjali tas-Sagrifiċċju
tiegħu: don ta’ Ġismu u ta’ Demmu bħala Ikel u Xorb ta’
salvazzjoni, li jitimgħu l-imħabba vera u li tibqa’.
F’din il-perspettiva, nistgħu ngħidu
tajjeb li l-familja tħossha “f’darha” waqt il-Quddiesa, propju għax
fl-Ewkaristija tieħu magħha l-esperjenza tagħha ta’ konvivjalità u tiftaħha għall-grazzja ta’
konvivjalità universali, ta’ l-imħabba ta’ Alla
għad-dinja. Meta tieħu sehem
fl-Ewkaristija, il-familja tiġi msoffija mit-tentazzjoni li tingħalaq
fiha nfisha, imqawwija fl-imħabba u fil-fedeltà, u twessa’
l-konfini tal-fraternità tagħha
skond il-qalb ta’ Kristu.
Fi żmienna, immarkat minn tant għeluq
u wisq ħitan, il-konvivjalità, imnissla mill-familja
u mitmugħa mill-Ewkaristija, issir opportunità kruċjali. L-Ewkaristija u l-familji mitmugħin
minnha jistgħu jegħlbu l-għeluq u jibnu pontijiet ta’ qlub li
jilqgħu u ta’ karità. Iva,
l-Ewkaristija ta’ Knisja ta’ familji, kapaċi trodd lill-komunità l-ħmira bieżla tal-konvivjalità u ta’ l-ospitalità reċiproka, hi skola ta’ inklużjoni
umana li ma tibżax mill-konfrontazzjonijiet! M’hemmx ċkejknin, iltiema, dgħajfa,
bla difiża, miġruħa u delużi, qalbhom maqtugħa u
abbandunati, li l-konvivjalità Ewkaristika
tal-familji ma tistax titmagħhom, tirrestawrahom, tħarishom u tilqagħhom.
Il-memorja tal-virtujiet familjari tgħinna
nifhmu. Aħna stess għarafna, u
għadna nagħrfu, x’mirakli jistgħu jseħħu meta omm
ikollha ħarsa u attenzjoni, dedikazzjoni u għożża
għall-ulied ta’ ħaddieħor, barra għal dawk tagħha. Sal-bieraħ, kienet biżżejjed
omm għat-tfal kollha tal-bitħa!
U mill-ġdid: nafu tajjeb x’qawwa jiksbu l-popli fejn il-missirijiet
lesti jitħarrku minn posthom biex jaqbżu għall-ulied ta’
kulħadd, għax iqisu l-ulied bħala ġid waħdieni, li
jieħdu gost u huma mkabbrin li jistgħu jipproteġuhom.
Il-lum ħafna kuntesti soċjali
jqiegħdu xkiel quddiem il-konvivjalità tal-familja.
Hu minnu, il-lum m’huwiex faċli.
Irridu nsibu mod kif nerġgħu niksbuha. Mal-mejda nitkellmu ma’ xulxin, mal-mejda
nisimgħu lil xulxin. M’għandu
jkun hemm l-ebda skiet, dak is-skiet li m’hux is-skiet tal-monaċi, imma
s-skiet ta’ l-egoiżmu, fejn kulħadd moħħu fih innifsu, jew
fit-televiżjoni jew fil-kompjuter… u ma jitkellmux. Le, xejn silenzju. Hemm bżonn niksbu mill-ġdid dik
il-konvivjalità familjari u nadattawha għal
żminijietna. Il-konvivjalità donnha saret ħaġa li tixtriha u
tbigħha, imma hekk issir ħaġa oħra. U n-nutriment m’hux dejjem is-simbolu ta’
qsim ġust tal-ġid, li kapaċi jilħaq lil min la għandu
ħobż u lanqas imħabba. Fil-Pajjiżi
għonja nispiċċaw nonfqu biex nitimgħu żżejjed, u
mbagħad nispiċċaw nerġgħu nonfqu biex nagħmlu
tajjeb għaż-żejjed li kilna.
U dan l-“iffangar” bla sens jisirqilna l-attenzjoni tagħna minn fuq
il-ġuħ veru, tal-ġisem u tar-ruħ. Meta m’hemmx konvivjalità hemm l-egoiżmu, kulħadd jibda jaħseb
għalih innifsu. Biex tagħqad,
il-pubbliċità rriduċietha għall-aptit
tal-ħlewwiet. Waqt li ħafna,
ħafna minn ħutna għadhom m’humiex mal-mejda. Tal-mistħija!
Ejjew inħarsu lejn il-misteru tal-Festa
Ewkaristika. Il-Mulej jaqsam Ġismu
u jxerred Demmu għal kulħadd.
Tabilħaqq m’hemmx qsim li jista’ jirreżisti lil dan
is-Sagrifiċċju ta’ komunjoni; l-imġiba ta’ falzità,
ta’ kompliċità mal-ħażen biss tista’ teskludi
ruħha minnu. Kull distanza
oħra ma tistax tirreżisti lill-qawwa bla difiża ta’ dan
il-ħobż maqsum u ta’ dan l-inbid imxerred, Sagrament tal-Ġisem
wieħed tal-Mulej. Il-patt ħaj
u li jagħti l-ħajja tal-familji Nsara, li fid-dinamiżmu ta’
l-ospitalità tiegħu jiġi qabel, iwieżen u
jħaddan in-niket u l-ferħ tal-ħajja ta’ kuljum, jikkopera
mal-grazzja ta’ l-Ewkaristija, li għandha l-ħila toħloq
komunjoni dejjem ġdida bil-qawwa tagħha li tinkludi u tifdi.
Il-familja Nisranija hekk turi kemm hu tassew
wiesgħa x-xefaq veru tagħha, li hu x-xefaq tal-Knisja Omm tal-bnedmin
kollha, ta’ l-imwarrbin u l-esklużi kollha, fil-ġnus kollha. Nitolbu biex din il-konvivjalità familjari tista’ tikber u timmatura
fiż-żmien ta’ grazzja tal-Ġublew tal-Ħniena li jmiss.
miġjuba
mit-Taljan għall-Malti minn Francesco Pio Attard