IL-PAPA
FRANĠISKU
UDJENZA
ĠENERALI
Pjazza San Pietru
L-Erbgħa 11 ta’ Settembru 2013
Il-Knisja Omm ta’ l-Insara
Għeżież ħuti, l-għodwa t-tajba!
Il-lum nerġgħu naqbdu l-katekeżi fuq il-Knisja f’din is-Sena tal-Fidi. Qalb ix-xbihat li l-Konċilju Vatikan II
għażel biex jgħinna nifhmu aħjar in-natura tal-Knisja, hemm
dik ta’ “omm”: il-Knisja hi omm tagħna fil-fidi, fil-ħajja
sopranaturali (ara Kostituzzjoni dommatika Lumen
gentium, 6.14.15.41.42). Din hi waħda mix-xbihat li
l-aktar jużaw Missirijiet il-Knisja fl-ewwel sekli u naħseb li tista’
tkun utli għalina wkoll. Ngħid għalija hi waħda mill-isbaħ
xbihat tal-Knisja: il-Knisja omm!
F’liema sens u b’liema mod il-Knisja hi omm? Nitilqu mir-realtà umana
tal-maternità: x’tagħmel l-omm?
1. Qabel xejn l-omm tnissel għall-ħajja, iġġorr
f’ġufha għal disa’ xhur lill-iben tagħha u mbagħad
tiftaħlu t-triq għall-ħajja meta tildu. Hekk hi l-Knisja: tnissilna fil-fidi,
bil-qawwa ta’ l-Ispirtu s-Santu li jagħtiha li tagħmel il-frott,
bħall-Verġni Marija. Il-Knisja
u l-Verġni Marija huma t-tnejn ommijiet; dak li jingħad
għall-Knisja jista’ jingħad ukoll għall-Madonna, u dak li
jingħad għall-Madonna jista’ jingħad ukoll
għall-Knisja! Hu minnu li l-fidi hi
att personali: “jiena nemmen”, jiena li b’mod personali nwieġeb lil Alla
li jgħarrafni lilu nnifsu u jixtieq jidħol fi ħbiberija
miegħi (ara Enċiklika Lumen
fidei, n. 39). Imma l-fidi jien
nirċeviha minn għand l-oħrajn, f’familja, f’komunità li
tgħallimni llissen “jiena nemmen”, “aħna nemmnu”. L-ebda Nisrani m’hu gżira! Aħna ma nsirux Insara f’xi laboratorju,
aħna ma nsirux Insara waħidna u bis-saħħa tagħna, imma
l-fidi hi rigal, hi don ta’ Alla li jingħata fil-Knisja u permezz
tal-Knisja. U l-Knisja tagħtina
l-ħajja tal-fidi fil-Magħmudija: dak hu l-mument li fih tagħtina
t-twelid bħala wlied Alla, il-mument li fih tagħtina l-ħajja ta’
Alla, tilidna kif tagħmel omm. Jekk
tmorru taraw il-Battisteru ta’ San Ġwann fil-Lateran, fil-Katidral
tal-Papa, fuq ġewwa hemm skrizzjoni bil-Latin li xi ftit jew wisq
tgħid hekk: “Hawn jitwieled poplu ta’ razza divina, imnissel mill-Ispirtu
s-Santu li jagħti l-ħajja lil dawn l-ilmijiet; il-Knisja Omm tiled
lil uliedha minn dawn l-imwieġ”.
Dan jgħallimna ħaġa importanti: li nagħmlu parti
mill-Knisja m’hux xi fatt esterjuri u formali, ma jfissirx nimlew xi karta li
jagħtuna, imma hu att interjuri u vitali; aħna m’aħniex membri
tal-Knisja l-istess kif aħna membri ta’ soċjetà, ta’
partit jew ta’ kwalunkwe organizzazzjoni oħra. Ir-rabta hi waħda li tagħti
l-ħajja, kif hi dik li wieħed ikollu ma’ ommu, għax, kif
jgħid Santu Wistin, “il-Knisja hi tabilħaqq omm ta’ l-Insara” (De moribus
Ecclesiæ, I,30,62-63: PL32,1336). Nistaqsu lilna nfusna: Kif qed
inħares lejn il-Knisja jien? Jekk
jien rikonoxxenti wkoll lejn il-ġenituri tiegħi għax tawni
l-ħajja, jien rikonoxxenti lejn il-Knisja li nisslitni fil-fidi permezz
tal-Magħmudija? Kemm Insara
jiftakru liema hi d-data tal-Magħmudija tagħhom? Jien nixtieq nagħmel din il-mistoqsija
lilkom hawnhekk, imma kull wieħed u waħda jwieġeb fil-qalb tiegħu:
Kemm minnkom jiftakru liema hi d-data tal-Magħmudija tagħhom? Xi wħud qed jgħollu jdejhom, imma
kemm oħrajn ma jiftakruhiex! Imma
d-data tal-Magħmudija hi d-data tat-twelid tagħna fil-Knisja, id-data
li fiha ommna l-Knisja wilditna! U issa
nħallilkom biċċa xogħol biex tagħmluha d-dar. Il-lum meta tmorru lura d-dar, morru fittxu
sew liema hi d-data tal-Magħmudija tagħkom, u dan agħmluh biex
tiffesteġġjawha, biex troddu ħajr lill-Mulej għal dan
id-don. Se tagħmluha? Inħobbuha lill-Knisja l-istess kif
inħobbu lil ommna, u nafu nifhmu wkoll id-difetti tagħha? L-ommijiet kollha għandhom difetti,
ilkoll għandna difetti, imma meta d-diskors jaqa’ fuq id-difetti ta’ ommna
aħna nippruvaw ngħattuhom, għax inħobbuha hekk kif
inhi. U l-Knisja wkoll għandha
d-difetti tagħha: inħobbuha bl-istess mod bħal ommna,
ngħinuha tikber fil-ġmiel tagħha, issir iżjed awtentika,
iktar kif jixtieqha l-Mulej?
Inħallikom b’dawn il-mistoqsijiet, imma tinsewx x’għandkom
tagħmlu: fittxu d-data tal-Magħmudija tagħkom biex
tgħożżuha f’qalbkom u tiffesteġġjawha.
2. L-omm ma tillimitax ruħha għall-fatt li tagħti
l-ħajja, imma b’għożża kbira tgħin lil uliedha jikbru,
tagħtihom il-ħalib, titmagħhom, tgħallimhom il-mixja
tal-ħajja, isseħibhom dejjem bl-attenzjoni tagħha, bl-affett
tagħha, bl-imħabba tagħha, anki meta jikbru. U f’dan taf anki twissi, taħfer, tifhem,
taf tkun qribhom fil-mard, fit-tbatija.
F’kelma waħda, omm tajba tgħin lil uliedha joħorġu
minnhom infushom, biex ma jibqgħux fil-kumdità ta’
taħt il-ġwenħajn materni, kif il-flieles jibqgħu mkenna taħt
ġwenħajn il-qroqqa. Il-Knisja,
bħal omm twajba, tagħmel l-istess ħaġa: timxi magħna
aħna u nikbru, hi u twasslilna l-Kelma ta’ Alla, li hi dawl li jurina
t-triq tal-ħajja Nisranija; tamministralna s-Sagramenti. Titmagħna bl-Ewkaristija, twasslilna
l-maħfra ta’ Alla permezz tas-Sagrament tal-Penitenza, tqawwina fil-mument
tal-mard bid-Dilka tal-Morda. Il-Knisja
timxi magħna fil-ħajja kollha tal-fidi tagħna, fil-ħajja
Nisranija sħiħa tagħna.
Mela nistgħu nagħmlu xi mistoqsijiet oħra: X’relazzjoni
għandi jien mal-Knisja?
Inħossha bħala ommi li tgħinni nikber bħala
Nisrani? Nieħu sehem fil-ħajja
tal-Knisja, inħossni parti minnha?
Ir-relazzjoni tiegħi hi relazzjoni formali jew hi waħda vitali?
3. It-tielet ħsieb fil-qosor.
Fl-ewwel sekli tal-Knisja kienet ċara ħafna din ir-realtà:
il-Knisja, waqt li hi omm għall-Insara, waqt li “tagħmel” l-Insara,
hi wkoll “magħmula” minnhom.
Il-Knisja m’hix xi ħaġa differenti minna nfusna, imma rridu
nħarsu lejha bħala l-ġabra sħiħa ta’ dawk li jemmnu,
bħala l-“aħna” ta’ l-Insara kollha: jien, int, ilkoll kemm aħna
nagħmlu parti mill-Knisja. San
Ġrolmu kiteb hekk: “Il-Knisja ta’ Kristu m’hix ħaġa oħra
għajr l-erwieħ ta’ dawk li jemmnu fi Kristu” (Tract. Ps 86: PL26,1084). Għalhekk il-maternità
tal-Knisja ngħixuha lkoll, rgħajja u fidili. Spiss nisma’ min jgħid: “Jien nemmen
f’Alla imma mhux fil-Knisja… Smajt li
l-Knisja tgħid… il-qassisin jgħidu…”.
Imma l-qassisin huma ħaġa oħra; imma l-Knisja m’hix
magħmula biss mill-qassisin, il-Knisja aħna lkoll! U jekk int tgħid li temmen f’Alla u ma
temminx fil-Knisja, qed tgħid li ma temminx fik innifsek; u din hi
kontradizzjoni. Il-Knisja hi aħna
lkoll: mit-tarbija li ġiet mgħammda dan l-aħħar sa
l-Isqfijiet, sal-Papa; ilkoll aħna Knisja u lkoll aħna ndaqs
f’għajnejn Alla! Ilkoll aħna
msejħa nikkollaboraw fit-twelid ta’ Nsara ġodda għall-fidi,
ilkoll imsejħa nkunu edukaturi fil-fidi, biex inħabbru
l-Vanġelu. Kull wieħed u
waħda minna jistaqsi lilu nnifsu: X’qed nagħmel jien biex oħrajn
jistgħu jaqsmu miegħi l-fidi Nisranija? Qed nagħti frott fil-fidi tiegħi
jew jien magħluq fija nnifsi? Meta
ntenni li jiena nħobb Knisja li ma tibqax magħluqa ’l ġewwa
miċ-ċint tagħha, imma li hi kapaċi toħroġ,
tiħarrek, anki b’xi riskju kultant, biex twassal lil Kristu lil
kulħadd, jiġini f’moħħi kulħadd, jiena nnifsi, inti,
kull Nisrani. Ilkoll għandna sehem
fil-maternità tal-Knisja, sa ma d-dawl ta’ Kristu jilħaq it-truf l-aktar
imbiegħda tad-dinja. Viva ommna
l-Knisja mqaddsa!
miġjub mit-Taljan għall-Malti minn Francesco Pio Attard