IL-PAPA FRANĠISKU
UDJENZA ĠENERALI
L-Erbgħa 11 ta’ April 2018
01. Il-Magħmudija. Introduzzjoni.
Għeżież
ħuti, l-għodwa t-tajba!
Il-ħamsin jum
taż-żmien liturġiku tal-Għid jixirqu biex nirriflettu fuq
il-ħajja Nisranija li, min-natura tagħha, hi l-ħajja li
tiġi minn Kristu nnifsu. Fil-fatt, aħna Nsara skont kemm inħallu
lil Ġesù Kristu jgħix fina. Mela mnejn irridu nibdew biex inqajmu
mill-ġdid fina dan l-għarfien jekk mhux mill-bidu, mis-Sagrament li kebbes fina l-ħajja
Nisranija? Din hi l-Magħmudija.
L-Għid ta’ Kristu, li miegħu jġib kollox ġdid, jasal
għandna permezz tal-Magħmudija biex jibdilna fix-xbieha tiegħu:
l-imgħammdin huma ta’ Ġesù
Kristu, u huwa s-Sid ta’
ħajjithom. Il-Magħmudija hi l-“pedament tal-ħajja Nisranija
kollha” (Katekiżmu tal-Knisja
Kattolika, 1213). Hi l-ewwel mis-Sagramenti, għax hi l-bieb li minnu Ġesù Kristu
jgħaddi biex jgħammar fil-persuna tagħna u aħna ngħaddu
biex nidħlu fil-Misteru tiegħu.
Il-verb Grieg
“tgħammed” ifisser “tgħaddas”
(ara KKK, 1214). Il-banju bl-ilma hu
rit komuni f’ħafna reliġjonijiet biex jesprimi l-passaġġ
minn kundizzjoni għall-oħra, sinjal ta’ tisfija għal bidu
ġdid. Aħna l-Insara m’għandniex ninsew li jekk hu l-ġisem
li jiġi mgħaddas fl-ilma, hi
r-ruħ li ġiet mgħaddsa fi Kristu biex tirċievi
l-maħfra mid-dnub u tilma bid-dawl divin (ara Tertulljanu, Dwar il-qawmien tal-mejtin, VIII, 3: CCL 2, 931; PL 2, 806). Bil-qawwa tal-Ispirtu s-Santu, il-Magħmudija tgħaddasna fil-mewt u l-qawmien
tal-Mulej, tgħarraq fil-fonti tal-magħmudija l-bniedem il-qadim,
maħkum mid-dnub li jifridna minn Alla, u twelled il-bniedem il-ġdid,
maħluq mill-ġdid fi Kristu. Fih, ulied Adam kollha huma msejħin
għal ħajja ġdida. Għalhekk il-Magħmudija hi twelid
mill-ġdid. Jiena ċert, ċertissmu, li kollha kemm aħna
niftakru d-data ta’ meta twelidna: bla dubju. Imma nistaqsi bejni u bejn
ruħi, kemxejn dubjuż, u nistaqsi lilkom: hawn kulħadd jiftakar
x’kienet id-data tal-magħmudija tiegħu? Xi wħud qed jgħidu
iva – tajjeb. Imma hi iva xi ftit mejta, għax forsi ħafna ma
jiftakruhiex din. Imma jekk aħna niċċelebraw jum twelidna, kif
ma niċċelebrawx – tal-inqas infakkru – il-jum tat-twelid
mill-ġdid tagħna? Se nagħtikom biċċa xogħol
għad-dar, biċċa xogħol biex tagħmluha d-dar illum.
Dawk fostkom li ma jiftakrux id-data tal-magħmudija tagħhom, imorru
jistaqsu lil ommhom, liz-zijiet, lin-neputijiet, jistaqsuhom: “Int taf x’inhi
d-data tal-magħmudija?”, u tinsieha qatt. U dakinhar rodd ħajr
lill-Mulej, għax dak hu sewwasew il-jum li fih Ġesù daħal fija,
l-Ispirtu s-Santu daħal fija. Fhimtu sew x’għandkom tagħmlu d-dar?
Kollha għandna nkunu nafu x’inhi d-data tal-magħmudija tagħna.
Hu jum ieħor li fih nagħlqu sninna: l-anniversarju tat-twelid
mill-ġdid tagħna. Tinsewx tagħmluh dan, nitlobkom.
Niftakru x’kienu
l-aħħar kelmiet tal-Irxoxt lill-Appostli; huma mandat preċiż:
“Morru, mela, agħmlu dixxipli mill-ġnus kollha, u għammduhom
fl-isem tal-Missier u tal-Iben u tal-Ispirtu
s-Santu” (Mt 28:19). Permezz tal-ħasil bil-magħmudija, min
jemmen fi Kristu jiġi mgħaddas fl-istess ħajja tat-Trinità.
Fil-fatt dak
tal-Magħmudija mhuwiex ilma kien li kien, imma l-ilma li fuqu nitolbu
jinżel l-Ispirtu li “jagħti
l-ħajja” (Kredu). Naħsbu ftit f’dak li qal Ġesù lil Nikodemu
biex ifissirlu t-twelid għall-ħajja divina: “Jekk wieħed ma
jitwelidx mill-ilma u l-Ispirtu, ma jistax jidħol fis-Saltna ta’ Alla. Dak
li jitwieled mill-ġisem hu ġisem; u dak li jitwieled mill-Ispirtu hu
spirtu” (Ġw 3:5-6). Għalhekk
il-Magħmudija tissejjaħ ukoll “tnissil
mill-ġdid”: aħna nemmnu li Alla fdiena “bil-ħasil ta’
twelid ġdid u t-tiġdid tal-Ispirtu s-Santu,
[…] minħabba
l-ħniena tiegħu” (Titu 3:5).
Għalhekk
il-Magħmudija hi sinjal qawwi ta’ twelid mill-ġdid, biex nimxu
f’ħajja ġdida. Ifakkarhulna San Pawl meta jikteb lill-Insara ta’
Ruma: “Ma tafux li aħna lkoll li tgħammidna fi Kristu Ġesù,
tgħammidna fil-mewt tiegħu? Indfinna miegħu fil-mewt permezz
tal-magħmudija sabiex kif Kristu kien imqajjem mill-imwiet permezz
tal-qawwa glorjuża tal-Missier, hekk aħna ngħixu ħajja
ġdida” (Rum 6:3-4).
Meta
tgħaddasna fi Kristu, il-Magħmudija tagħmilna wkoll membri ta’ Ġismu, li hi l-Knisja, u
tagħtina sehem fil-missjoni tiegħu fid-dinja (ara KKK, 1213). Aħna l-imgħammdin
m’aħniex waħidna: aħna membri tal-Ġisem ta’ Kristu.
Il-ħajja li toħroġ mill-fonti tal-magmudija tidher f’dan
il-kliem ta’ Ġesù: “Jiena d-dielja, intom il-friegħi. Min jibqa’ fija
u jiena fih, dan jagħmel ħafna frott” (ara Ġw 15:5). Ħajja
waħda, dik tal-Ispirtu s-Santu, toħroġ minn Kristu għal
għand l-imgħammdin, u tgħaqqadhom f’Ġisem wieħed (ara
1 Kor 12:13), midluk bid-dilka mqaddsa u mitmugħ mill-mejda Ewkaristika.
Bil-Magħmudija,
Kristu jista’ jgħix fina u aħna ngħixu magħqudin
miegħu, biex nikkollaboraw fil-Knisja, kull wieħed u waħda skont
il-qagħda tiegħu, għall-bidla tad-dinja. Il-ħasil bl-ilma
tal-Magħmudija, li aħna nirċievu darba biss, idawwal
il-ħajja kollha tagħna, u jmexxi l-passi tagħna lejn
Ġerusalemm tas-Sema. Hemm qabel u hemm wara l-Magħmudija.
Is-Sagrament jissupponi mixja ta’ fidi, li aħna nsejħulha katekumenat, li tidher ċara meta
jkun adult li jitlob il-Magħmudija. Imma anki t-trabi, sa mill-qedem,
jiġu mgħammda fil-fidi tal-ġenituri (ara Rit tal-Magħmudija tat-trabi, Introduzzjoni, 2). U dwar dan
irrid ngħidilkom xi ħaġa. Xi wħud jgħidu: imma
għaliex ngħammdu tarbija li ma tista’ tifhem xejn? Nittamaw li
tikber, li tibda tifhem u tkun hi stess li titlob il-Magħmudija. Imma dan
ifisser li m’għandniex fiduċja fl-Ispirtu s-Santu, għax meta
aħna ngħammdu tarbija, f’dik it-tarbija jidħol l-Ispirtu
s-Santu, u l-Ispirtu s-Santu jkabbar f’dik it-tarbija, sa minn ċkunitha,
il-virtujiet Insara li mbagħad iwarrdu. Dejjem għandna nagħtu
din l-opportunità lil kulħadd, lit-trabi kollha, li jkollhom ġo fihom
l-Ispirtu s-Santu li jmexxihom tul ħajjithom. Tinsewx tgħammdu
lit-trabi tagħkom! Ħadd ma jimmeritaha l-Magħmudija, li hi
dejjem don b’xejn għal kulħadd, adulti u trabi tat-twelid. Imma kif
tiġrilha żerriegħa mimlija ħajja, dan id-don iniżżel
l-għeruq u jġib il-frott f’art li tkun imsoqqija mill-fidi.
Il-wegħdiet tal-magħmudija li ta’ kull sena nġeddu fil-Velja
tal-Għid għandna ngħixuhom mill-ġdid ta’ kuljum sa ma
l-Magħmudija “tikkristifika”: ejja ma nibżgħux minn din
il-kelma; il-Magħmudija “tikkristifikana”, min irċieva l-Magħmudija
u jiġi “kkristifikat”, isir jixbah lil Kristu, jinbidel fi Kristu u jsir
tassew Kristu ieħor.
miġjuba mit-Taljan għall-Malti minn
Francesco Pio Attard