IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 11 ta’
Marzu 2015
Għeżież
ħuti, l-għodwa t-tajba.
Fil-katekeżi tal-lum inkomplu bir-riflessjoni
tagħna fuq in-nanniet, u nħarsu lejn il-valur u l-importanza tar-rwol tagħhom fil-familja. Dan nagħmlu jien u nħossni
wieħed minn dawn il-persuni, għax anki jien ġej minn din
il-faxxa ta’ età.
Meta kont il-Filippini, il-poplu Filippin sellimli
hekk: “Lolo Kiko” – jiġifieri Nannu Franġisku – “Lolo Kiku”, qaluli! Qabel xejn importanti nagħfsu fuq
ħaġa: hu minnu li s-soċjetà tfittex li teħles minna, imma
żgur li l-Mulej le. Il-Mulej qatt
ma jarmina. Hu jsejħilna biex nimxu
warajh f’kull età tal-ħajja, u anki l-anzjanità
fiha grazzja u missjoni, vokazzjoni
vera tal-Mulej. L-anzjanità hi
vokazzjoni. Għadu ma wasalx il-waqt
li “niġbdu x-xbieki għal ġod-dgħajsa”. Dan il-perjodu tal-ħajja bla dubju hu
differenti minn dawk ta’ qablu; xi ftit irridu anki “noħolquh”, għax
is-soċjetajiet tagħna m’humiex lesti, spiritwalment u moralment, biex
lil dan il-mument tal-ħajja jagħtuh il-valur sħiħ
tiegħu. Dari, fil-fatt, ma kienx
daqshekk normali li jkollok iż-żmien għad-dispożizzjoni
tiegħek; il-lum sar iżjed normali.
U anki l-ispiritwalità Nisranija nqabdet xi ftit fuq sieq waħda,
għax hemm bżonn li jkollna spiritwalità tal-persuni anzjani. Imma għall-grazzja ta’ Alla ma tonqosx
ix-xhieda ta’ qaddisin irġiel u nisa anzjani!
Bqajt milqut ħafna mill-“Jum ta’ l-Anzjani” li
għamilna hawn fi Pjazza San Pietru s-sena l-oħra, il-pjazza kienet
imbullata. Smajt stejjer ta’ anzjani li
qattgħu ħajjithom għall-ġid ta’ l-oħrajn, u anki
stejjer ta’ koppji ta’ miżżewġin li waslu biex jgħidu:
“Niċċelebraw il-ħamsin sena żwieġ, nagħmlu
s-sittin sena żwieġ”. Dan
importanti jkunu jafu bih iż-żgħażagħ li jegħjew
wisq malajr; importanti x-xhieda ta’ l-anzjani fil-fedeltà. U f’din il-pjazza kellna ħafna minnhom
dak in-nhar. Hi riflessjoni li ta’ min
jissoktaha, f’ambitu kemm ekkleżjali u kemm ċivili. Il-Vanġelu jġibilna quddiemna
xbieha sabiħa ħafna, li tqanqalna u tinkuraġġina. Hi x-xbieha ta’ Xmun u ta’ Anna, li dwarhom
ikellimna l-Vanġelu ta’ l-infanzja ta’ Ġesù miktub minn San
Luqa. Żgur li kienu anzjani,
ix-“xwejjaħ” Xmun u l-“profetessa” Anna li kellha 84 sena. Ma kinitx taħbiha l-età tagħha din
il-mara. Il-Vanġelu jgħid li
ta’ kuljum kienu jistennew il-miġja tal-Mulej, b’fedeltà kbira, għal
snin twal. Riedu propju jarawh dan
il-jum, jaqraw is-sinjali tiegħu, jintebħu li feġġ. Forsi kienu wkoll xi ftit rassenjati, issa,
li ħa jispiċċaw imutu qabel jasal: imma dik l-istennija twila
kompliet tokkupalhom ħajjithom kollha, ma kellhomx impenji iżjed
importanti minn dan: li jistennew lill-Mulej u jitolbu. Għalhekk, meta Marija u Ġużeppi
waslu fit-Tempju biex iwettqu dak li kienet titlob minnhom il-Liġi, Xmun u
Anna minnufih qabżu minn posthom, immexxija mill-Ispirtu s-Santu (ara Lq
2:27). It-toqol ta’ l-età u ta’
l-istennija f’waqt wieħed għebu.
Huma għarfu t-Tarbija, u skoprew qawwa ġdida, għal ħidma ġdida: li jroddu
ħajr u jagħtu xhieda għal dan is-Sinjal ta’ Alla. Xmun infexx f’innu mill-isbaħ ta’
ferħ (ara Lq 2:29-32) – sar poeta f’dak il-ħin – u Anna saret l-ewwel
predikatriċi ta’ Ġesù: “bdiet titkellem fuq it-tarbija ma’ dawk kollha li kienu jistennew il-fidwa ta’ Ġerusalemm” (Lq 2:38).
Għeżież nanniet,
għeżież anzjani, ejjew nimxu fuq l-istess passi ta’ dawn
ix-xjuħ straordinarji! Insiru
aħna wkoll xi ftit poeti tat-talb: nieħdu gost nagħżlu l-kliem
tagħna, nagħmlu tagħna dak li tgħallimna l-Kelma ta’
Alla. Hu don kbir għall-Knisja, it-talb tan-nanniet u ta’ l-anzjani! It-talb ta’ l-anzjani u tan-nanniet hu don
għall-Knisja, hu għana kbir!
Injezzjoni kbira ta’ għerf anki għas-soċjetà umana kollha
kemm hi: fuq kollox għal dik li hi wisq medhija, wisq imħabbta, wisq aljenata. Xi ħadd irid jgħanni, anki
għalihom, jgħanni s-sinjali ta’ Alla, iħabbar is-sinjali ta’
Alla, jitlob għalihom! Inħarsu
lejn Benedittu XVI, li għażel li jqatta’ l-aħħar parti ta’
ħajtu fit-talb u fis-smigħ ta’ Alla!
Xi ġmiel! Bniedem kbir ta’
fidi tas-seklu l-ieħor, mit-tradizzjoni Ortodossa, Olivier Clément, qalilna: “Ċiviltà li
m’għadhiex titlob iżjed hi ċiviltà fejn ix-xjuħija tilfet
is-sens tagħha”. U din hi
ħaġa tal-biża’, għax aħna għandna bżonn
qabel xejn ta’ anzjani li jitolbu, għax ix-xjuħija għalhekk ingħatatilna. Għandna bżonn ta’ anzjani li
jitolbu għax ix-xjuħija ngħatatilna propju għalhekk. Ħaġa sabiħa t-talb ta’
l-anzjani.
Aħna nistgħu rroddu ħajr lill-Mulej għall-ġid li rċivejna, u
nimlew il-vojt ta’ l-ingratitudni li hemm madwarna. Nistgħu ninterċedu għax-xewqat tal-ġenerazzjonijiet
il-ġodda u nagħtu dinjità lill-memorja u s-sagrifiċċji ta’
dawk li għaddew. Aħna
nistgħu nfakkru liż-żgħażagħ ambizzjużi li
ħajja mingħajr imħabba hi ħajja niexfa. Nistgħu ngħidu
liż-żgħażagħ li qed jibżgħu li l-biża’
mill-futur jista’ jintrebaħ.
Nistgħu ngħallmu liż-żgħażagħ li
jħobbu wisq lilhom infushom, li hemm iżjed ferħ f’li tagħti
milli f’li tirċievi. In-nanniet
jiffurmaw “kor” permanenti ta’ santwarju spiritwali kbir, fejn it-talb ta’
supplika u l-għana ta’ tifħir iwieżnu l-komunità li taħdem
u tissielet fl-għalqa tal-ħajja.
Fl-aħħar nett, it-talb isaffi bla waqfien lill-qalb. It-tifħir u s-supplika lil Alla ma
jħallux lill-qalb tibbies fir-rabja u l-egoiżmu. Kemm hu ikrah iċ-ċiniżmu ta’
anzjan li tilef is-sens tax-xhieda tiegħu, jiddisprezza
liż-żgħażagħ u ma jxerridx l-għerf
tal-ħajja! Min-naħa
l-oħra, kemm hu sabiħ l-inkuraġġiment li l-anzjan
jirnexxielu jittrasmetti liż-żagħżugħ li qed ifittex
is-sens tal-fidi u tal-ħajja! Din
hi tabilħaqq il-missjoni tan-nanniet, il-vokazzjoni ta’ l-anzjani. Kliem in-nanniet għandu fih xi
ħaġa speċjali, għaż-żgħażagħ. U dan huma jafuh. Il-kliem li n-nanna tiegħi
ħallietli miktub dak in-nhar ta’ l-ordinazzjoni saċerdotali
tiegħi, għadni nġorru miegħi, dejjem fil-brevjar, u naqrah ta’
spiss, u dan jagħmilli tajjeb.
Kemm nixtieq Knisja li kapaċi tisfida
lill-kultura ta’ l-iskart bil-ferħ li joħroġ minn tgħanniqa
ġdida bejn iż-żgħażagħ u l-anzjani! U dan hu dak li l-lum nitlob lill-Mulej, din
it-tgħanniqa!
miġjub
mit-Taljan għall-Malti minn Francesco Pio Attard