IL-PAPA FRANĠISKU
UDJENZA
ĠENERALI
L-Erbgħa 10
ta’ Ġunju 2015
Il-Familja – 18. Familja u mard
Għeżież ħuti, l-għodwa t-tajba!
Inkomplu bil-katekeżi tagħna fuq il-familja, u f’din il-katekeżi nixtieq immiss ma’ aspett komuni ħafna fil-ħajja tal-familji tagħna, dak tal-mard. Hi esperjenza tad-dgħufija tagħna, li ngħixuha l-iżjed fil-familja, sa minn ċkunitna, u mbagħad fuq kollox bħala
anzjani, meta jasal il-mard tax-xjuħija. Fl-ambitu tar-rabtiet familjari, il-mard tal-persuni li nħobbu nġarrbuh b’“iżjed” tbatija u diqa. Hi l-imħabba li ġġagħalna
nħossu dan l-“iżjed”. Ħafna drabi għal missier jew omm,
hi aktar iebsa li jissaportu t-tbatija ta’ iben, ta’ bint, milli tagħhom infushom. Il-familja, biex ngħidu hekk, sa
minn dejjem kienet l-eqreb “sptar”. Sal-lum, f’ħafna partijiet tad-dinja, l-isptar hu privileġġ
għall-ftit, u spiss hu mbiegħed. Huma l-omm, il-missier, l-aħwa, in-nanniet li jiggarantixxu l-kura u jgħinu għall-fejqan.
Fil-Vanġeli hemm ħafna paġni li jirrakkontaw il-laqgħat li Ġesù kien ikollu mal-morda u kif kien
jara ħa jfejjaqhom. Hu jippreżenta ruħu pubblikament
bħala wieħed li jeħodha mal-mard u li ġie biex ifejjaq
lill-bniedem minn kull ħażen: il-ħażen tar-ruħ u
l-ħażen tal-ġisem.
Tabilħaqq tqanqalna x-xena tal-Vanġelu li għadna kemm
qrajna dwarha fil-Vanġelu ta’ Mark.
Jgħid hekk: “Fil-għaxija, imbagħad, fi nżul
ix-xemx, ħadulu quddiemu lil dawk
kollha li kienu morda jew li kienu
maħkuma mix-xitan” (1:32). Jekk naħseb fl-ibliet il-kbar ta’
żmienna, nistaqsi fejn huma l-bibien li quddiemhom nistgħu
nieħdu lill-morda tagħna bit-tama li jiġu mfejqa! Ġesù qatt ma ħarab milli jieħu
ħsiebhom. Qatt ma għadda minn
maġenbhom u baqa’ sejjer, qatt ma dawwar wiċċu n-naħa
l-oħra. U meta xi missier jew omm,
jew inkella mqar sempliċement ħbieb kienu jressqulu quddiemu xi marid
biex imissu u jfejqu, ma kienx joqgħod jaħsibha; il-fejqan kien
jiġi qabel il-liġi, anki dik hekk qaddisa bħalma kienet
tal-mistrieħ tas-Sibt (ara Mk 3:1-6).
L-għorrief tal-liġi kienu jċanfru lil Ġesù għax
kien ifejjaq nhar ta’ Sibt, għax kien jagħmel il-ġid
is-Sibt. Imma l-imħabba ta’
Ġesù kienet li jagħti l-fejqan, jagħmel
il-ġid: u dan dejjem għandu l-ewwel post!
Ġesù jibgħat lid-dixxipli biex iwettqu l-istess
opra tiegħu u jagħtihom il-qawwa li jfejqu, jew
aħjar, li jersqu lejn il-morda u jieħdu ħsiebhom kif imiss (ara
Mt 10:1). Jeħtieġ inżommu
sew f’moħħna dak li qal lid-dixxipli fl-episodju ta’ l-agħma
mit-twelid (Ġw 9:1-5). Id-dixxipli
– bl-agħma hemm quddiemhom! – kienu qed jiddiskutu fuq min kien il-ħati
tad-dnub, għax hu kien twieled agħma, jekk kienx hu jew
il-ġenituri tiegħu, li ġabu fuqu dak l-għama. Il-Mulej qalilhom b’mod ċar: la hu u
lanqas il-ġenituri tiegħu; seħħ dan biex tidher fih
il-qawwa ta’ Alla. U fejqu. Araw il-glorja ta’ Alla! Araw x’inhu xogħol il-Knisja! Li tgħin lill-morda, ma toqgħodx
tintilef fit-tpaċpiċ, imma tgħin dejjem, tfarraġ,
isserraħ, tkun qrib tal-morda; dan hu xogħolha.
Il-Knisja tistedinna għat-talb kontinwu għall-għeżież
tagħna milquta mid-deni. It-talb għall-morda m’għandu qatt jonqos. Anzi jeħtieġ nitolbu iżjed, kemm personalment u kemm fil-komunità. Ejjew naħsbu fl-episodju tal-Vanġelu tal-mara
Kagħnanija (ara Mt 15:21-28). Hi mara pagana, m’hix mill-poplu ta’ Israel,
imma pagana li titlob lil Ġesù jfejqilha lil bintha. Ġesù, biex iġarrab il-fidi tagħha,
għall-ewwel iweġibha b’mod iebes: “Ma nistax, irrid naħseb
l-ewwel fin-nagħaġ ta’ Israel”.
Imma l-mara ma ċċedix – l-omm, meta titlob l-għajnuna
għal uliedha, ma ċċedi qatt; kollha nafu li l-ommijiet jiġġiedlu
għal uliedhom – u twieġbu: “Iżda l-ġriewi wkoll jieklu l-frak li jaqa’ minn
fuq il-mejda ta’ sidienhom”, qisha trid tgħidlu: “Ta’
l-inqas ittrattanti ta’ kelb!”. Hawn
Ġesù jweġibha: “Mara, il-fidi
tiegħek kbira! Ħa jsirlek kif
tixtieq!” (v. 28).
Quddiem il-mard, anki fil-familji jqumu d-diffikultajiet, minħabba fid-dgħufija umana. Imma, ġeneralment, żmien il-mard isaħħaħ ir-rabtiet
fil-familja. U
hawn naħseb f’kemm hu importanti
nedukaw lill-ulied sa minn ċkunithom għas-solidarjetà waqt il-mard.
Edukazzjoni li tevita s-sensibbiltà għall-mard tal-bniedem, tnixxef il-qalb. U lit-tfal “tanestetizzahom” għat-tbatija ta’ l-oħrajn,
ma jkunux kapaċi jħabbtu wiċċhom
mat-tbatija u jgħixu
l-esperjenza tal-limiti tagħhom. Kemm drabi naraw
jaslu fuq il-post tax-xogħol raġel, mara b’wiċċ għajjien, b’atteġġjament għajjien,
u meta nistaqsuhom “Xi ġralek?”, iwieġbu: “Irqadt biss sagħtejn
għax id-dar noqogħdu mqajmin ftit kull wieħed
maġenb it-tifel, it-tifla, il-marid, in-nannu, in-nanna”. U
l-ġurnata tibqa’ għaddejja bix-xogħol. Dawn l-affarijiet huma erojċi, huma l-atti erojċi
tal-familji! Dawk l-atti erojċi
moħbija li jsiru bil-ħlewwa u bil-kuraġġ
meta fid-dar ikun hemm xi ħadd
marid.
Id-dgħufija u t-tbatija ta’ l-aktar persuni għeżież u sagri għalina jistgħu jkunu, għal uliedna u n-neputijiet tagħna, skola ta’ ħajja – importanti nedukaw lil uliedna, lin-neputijiet
biex jifhmu kemm hu importanti
fil-familja li tkun qrib ta’ min qed ibati – u jsiru hekk meta l-mumenti
ta’ tbatija huma msieħba mit-talb u mill-qrubija kollha mħabba u premuruża tal-familjari. Il-komunità Nisranija taf tajjeb li l-familja, fil-prova tal-mard, m’għandhiex titħalla waħidha. U għandna ngħidu grazzi lill-Mulej għal dawk l-esperjenzi sbieħ ta’ fraternità ekkleżjali li jgħinu lill-familji jgħaddu mill-mument diffiċli ta’ l-uġigħ u tat-tbatija. Din l-għożża
u qrubija Nisranija, minn familja
għall-oħra, hi tassew
teżor għall-parroċċa;
teżor ta’ għerf,
li jgħin lill-familji
fil-waqtiet diffiċli u
turi s-Saltna ta’ Alla wisq aħjar
minn ħafna diskorsi! Dan hu ż-żegħil ta’ Alla.
miġjuba
mit-Taljan għall-Malti minn Francesco Pio Attard