IL-PAPA
FRANĠISKU
UDJENZA ĠENERALI
L-Erbgħa
10 ta’ Frar
2016
7. Il-Ġublew fil-Bibbja. Ġustizzja u qsim ma’ xulxin
Għeżież
ħuti, l-għodwa t-tajba u l-mixja tar-Randan it-tajba!
Hi ħaġa
sabiħa u anki sinifikattiva li qed nagħmlu din l-udjenza propju f’dan
l-Erbgħa tar-Rmied. Qed nibdew
il-mixja tar-Randan, u l-lum se nieqfu fuq l-istituzzjoni antika
tal-“ġublew”; hi ħaġa antika, li nsibuha fl-Iskrittura
Mqaddsa. Insibuha b’mod partikulari
fil-Ktieb tal-Levitiku, li jippreżentaha bħala mument qawwi fil-qofol
tal-ħajja reliġjuża u soċjali tal-poplu ta’ Israel.
Kull ħamsin
sena, “f’jum l-espjazzjoni” (Lev 25:9),
meta l-ħniena tal-Mulej kienet tiġi msejħa fuq il-poplu
kollu, id-daqq tal-qarn kien iħabbar ġrajja kbira ta’ ħelsien. Fil-fatt naqraw hekk fil-ktieb tal-Levitiku:
“Tqaddsu intom il-ħamsin sena u tniedu l-ħelsien fl-art lil kull
min jgħammar fiha. Tkun is-sena tal-ġublew għalikom: kull wieħed jerġa’ għal li kellu u għal ma’ niesu […].
F’din
is-sena tal-ġublew kulħadd jerġa’ lura għal li kellu” (25:10,13). Skond dawn id-dispożizzjonijiet, jekk xi ħadd kien ġie mġiegħel
ibigħ l-art tiegħu
jew id-dar tiegħu,
fil-ġublew seta’ jerġa’
jakkwistaha; u jekk xi ħadd kellu d-djun u, billi ma
kellux mnejn iħallashom, spiċċa
lsir ta’ dak li miegħu kien midjun, issa
seta’ jerġa’ lura ħieles
għand il-familja tiegħu u jikseb mill-ġdid il-propjetà kollha tiegħu.
Kienet speċi
ta’ “amnestija ġenerali”, li biha kulħadd seta’ jerġa’ lura
għall-qagħda oriġinarja, bit-tneħħija ta’ kull dejn,
l-għoti mill-ġdid ta’ l-art, u l-possibbiltà li wieħed igawdi
mill-ġdid il-libertà li hi tal-membri tal-poplu ta’ Alla. Poplu “qaddis”, fejn preskrizzjonijiet
bħal dik tal-ġublew kienu jservu biex wieħed jiġġieled
il-faqar u n-nuqqas ta’ ugwaljanza, u jiżgura ħajja dinjituża
għal kulħadd u tqassim ġust ta’ l-art li fuqha ngħixu u
minnha niddependu għall-ikel tagħna.
L-idea ċentrali hi li l-art oriġinarjament hi ta’ Alla u
ġiet fdata f’idejn il-bnedmin (ara Ġen 1:28-29), u għalhekk
ħadd ma jista’ jgħid li hi tiegħu biss, ħaġa li toħloq
sitwazzjonijiet ta’ nuqqas ta’ ugwaljanza.
Dan il-lum nistgħu nerġgħu naħsbu fuqu; kull
wieħed fil-qalb tiegħu għandu jaħseb jekk għandux wisq
ħwejjeġ tiegħu. Imma
għaliex ma nwarrbux xi ħaġa għal dawk li m’għandhom
xejn? L-għaxra fil-mija, il-ħamsin
fil-mija… Jien ngħid: jalla
l-Ispirtu s-Santu jnebbaħ lil kull wieħed u waħda minnkom.
Bil-ġublew,
min kien ikun ftaqar, kien jerġa’ jikseb il-meħtieġ biex
jgħix, u min kien stagħna ħafna kien jerġa’ jrodd lura
lill-fqir dak li jkun ħadlu. It-tir
kien soċjetà msejsa fuq l-ugwaljanza u s-solidarjetà, fejn il-libertà,
l-art u l-flus jerġgħu jsiru ġid għal kulħadd u mhux
biss għall-ftit, kif qed jiġri l-lum, jekk m’iniex sejjer żball… Ftit jew wisq, iċ-ċifri m’humiex
preċiżi, imma t-tmenin fil-mija tal-ġid tal-bnedmin jinsab
f’idejn inqas minn għoxrin fil-mija tal-popolazzjoni. Hu ġublew – u dan qed ngħidu billi
nfakkar fl-istorja tas-salvazzjoni tagħna – biex nikkonvertu, biex il-qalb
tagħna titwessa’ iżjed, issir iżjed ġeneruża, insiru
iżjed ulied Alla, b’iktar imħabba.
Ħa ngħidilkom ħaġa: jekk din ix-xewqa, jekk
il-ġublew ma jmissx il-but tagħna, m’huwiex veru ġublew. Fhimtuni?
U dan insibuh fil-Bibbja! M’hux
qed jivvintah dan il-Papa: jinsab fil-Bibbja.
L-għan – kif għidt – kien soċjetà msejsa fuq l-ugwaljanza
u s-solidarjetà, fejn il-libertà, l-art u l-flus kienu jsiru ġid għal
kulħadd u mhux għall-ftit.
Fil-fatt il-ġublew kellu l-funzjoni li jgħin lill-poplu
jgħix fraternità konkreta, magħmula minn għajnuna
reċiproka. Nistgħu ngħidu
li l-ġublew Bibliku kien “ġublew ta’ ħniena”, għax kienu
jgħixuh ifittxu b’sinċerità l-ġid ta’ ħuthom
fil-bżonn.
Fl-istess linja,
anki istituzzjonijiet oħra u liġijiet oħra kienu jiggwidaw il-ħajja
tal-poplu ta’ Alla, biex setgħet tinħass il-ħniena ta’ Alla permezz
ta’ dik tal-bnedmin. F’dawk in-normi
nsibu indikazzjonijiet validi anki l-lum, li jġagħluna
nirriflettu. Ngħidu aħna,
il-liġi Biblika kienet tgħid li l-“għexur” kellhom imorru
għal-Leviti, inkarigati mill-kult, li ma kellhomx art, u għall-foqra,
għall-iltiema, għar-romol (ara Dewt 14:22-29). Mela kienu jippriedkaw li waħda minn
kull għaxar partijiet tal-ħsad, jew tad-dħul minn xogħol
ieħor, kellha tingħata lil dawk li ma kellhomx min jipproteġihom
u kienu fil-bżonn, biex hekk ikun hemm l-ugwaljanza fost il-poplu fejn
kulħadd kellu jġib ruħu ta’ aħwa.
Kien hemm ukoll
il-liġi dwar “l-ewwel frott”.
X’kien dan? L-ewwel parti
tal-ħsad, l-aktar parti prezzjuża, kellha tinqasam mal-Leviti u
l-barranin (ara Dewt 18:4-5; 26:1-11), li ma kellhomx
għelieqi tagħhom,
biex anki
għalihom l-art tkun għajn ta’ nutriment u ta’ għajxien. “L-art
hi tiegħi, u intom qiskom frustieri jew qegħdin miegħi”, jgħid il-Mulej (Lev 25:23).
Aħna kollha mistednin tal-Mulej, fl-istennija ta’ pajjiżna tas-Sema (ara Lhud
11:13-16; 1 Piet 2:11), imsejħin
biex din id-dinja li laqgħetna nagħmluha iżjed post uman fejn wieħed
iħossu milqugħ. U kemm minn dan l-“ewwel
frott” min hu xortih tajba jista’
jagħti lil min jinsab f’diffikultà! Kemm frott! Mhux biss minn
dak ta’ l-għelieqi, imma minn ta’ kull
prodott ieħor tax-xogħol, tal-pagi,
tal-flus li wieħed ikun
ħażen, ta’ tant ħwejjeġ li nippossedu u xi drabi naħlu. Dan qed jiġri l-lum ukoll. Fl-Elemożinerija
Appostolika jaslu tant ittri b’xi
ftit tal-flus magħhom:
“Din parti mill-paga tiegħi biex ngħin lill-oħrajn”. U
din hi ħaġa sabiħa; ngħinu lill-oħrajn, l-għaqdiet
ta’ karità, l-isptarijiet, id-djar ta’ l-anzjani…; nagħtu wkoll lill-barranin, dawk li ġew minn barra u waqfu fostna biss
għal ftit. Ġesù wkoll kien barrani
fl-Eġittu.
U propju b’dan
fil-ħsieb tagħha, l-Iskrittura Mqaddsa tsejħilna bil-qawwa biex
inwieġbu b’ġenerożità għat-talba ta’ min jixtieqna nisilfuh
xi flus, bla ma noqogħdu nagħmlu kalkoli kiefra u bla ma nippretendu
interessi impossibbli: “Jekk
jiftaqar ħuk u jiġi b’xejn, int għandek tgħinu, bħalma tgħin lill-barrani jew lill-frustier; u hu jgħix miegħek. Teħodlux imgħax, u anqas żieda fuq is-self; imma ibża’
minn Alla tiegħek u jgħix ħuk miegħek. Tisilfux flusek bl-imgħax, u anqas tagħtih l-ikel tiegħek bi ħlas żejjed”
(Lev 25:35-37). Dan it-tagħlim
jibqa’ dejjem attwali. Kemm familji spiċċaw
jiġru fit-triq, vittmi ta’ l-użura! Nitlobkom, ejjew nitolbu biex
f’dan il-Ġublew il-Mulej ineħħi minn qlubna lkoll
din ix-xewqa li nakkwistaw iżjed, l-użura. Ħa nerġgħu lura lejn ħajja ta’ ġenerożità u tjieba. Kemm sitwazzjonijiet ta’ użura qed naraw u kemm
tbatija u wġigħ ta’ qalb iġibu
dawn fil-familji! U ħafna drabi, fid-disperazzjoni, kemm nies jispiċċaw
jagħmlu suwiċidju
għax ma jifilħux iktar u tilfu kull tama,
ma sabu l-ebda driegħ miftuħ għalihom biex jgħinhom; sabu biss dik
l-id li tiġi biex iġġagħalhom iħallsu
l-interessi.
L-użura hi dnub
gravi, hi dnub li jgħajjat quddiem Alla. Imma l-Mulej wiegħed
il-barka tiegħu fuq min jiftaħ idejh biex iqassam
b’idu miftuħa (ara Dewt 15:10). Hu jagħtik id-doppju, forsi mhux
fi flus imma fi ħwejjeġ
oħra, il-Mulej dejjem se jroddlok id-doppju.
Għeżież
ħuti, il-messaġġ tal-Bibbja hu ċar ħafna: niftħu
qalbna b’kuraġġ għall-qsim tal-ġid ma’ l-oħrajn, u din
hi ħniena! U jekk aħna rridu
l-ħniena ta’ Alla, ħa nibdew nuruha aħna l-ewwel. Din hi: nibdew nuruha aħna bejn
iċ-ċittadini ta’ l-istess post, bejn il-familji, bejn il-popli, bejn
il-kontinenti. Li nagħtu sehemna
biex ikollna dinja bla foqra jfisser nibnu soċjetajiet bla diskriminazzjoni,
imsejsa fuq is-solidarjetà li twassalna biex naqsmu ma’
xulxin dak li għandna, fi tqassim ta’ riżorsi msejjes fuq
l-imħabba bejn l-aħwa u l-ġustizzja. Grazzi.
miġjuba mit-Taljan għall-Malti minn
Francesco Pio Attard