IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 9 ta’ Settembru 2015
Il-Familja – 26. Komunità
Għeżież ħuti, l-għodwa
t-tajba!
Il-lum nixtieq li nixħtu l-attenzjoni
tagħna fuq ir-rabta bejn il-familja
u l-komunità Nisranija. Hi rabta,
biex ngħidu hekk, “naturali”, għax il-Knisja hi familja spiritwali u
l-familja hi Knisja żgħira (ara Lumen gentium, 9).
Il-Komunità Nisranija
hi d-dar ta’ dawk li jemmnu f’Ġesù bħala l-għajn tal-fraternità bejn il-bnedmin kollha. Il-Knisja timxi qalb il-popli, fl-istorja ta’
l-irġiel u tan-nisa, tal-missirijiet u ta’ l-ommijiet, ta’ l-ulied: din hi
l-istorja li tiswa f’għajnejn il-Mulej.
Il-ġrajjiet kbar tal-qawwiet dinjija jitniżżlu fil-kotba
ta’ l-istorja, u hemm jibqgħu. Imma
l-istorja tar-relazzjonijiet tal-bnedmin tinkiteb direttament fil-qalb ta’
Alla; u hi l-istorja li tibqa’ għal dejjem. Dan hu l-post tal-ħajja u tal-fidi. Il-familja hi l-post ta’ l-inizjazzjoni
tagħna – xejn ma jista’ jeħdilha postha, tibqa’ għal dejjem –
f’din l-istorja. F’din l-istorja ta’
ħajja sħiħa, li għad tintemm fil-kontemplazzjoni ta’ Alla
għall-eternità kollha
fil-Ġenna, imma li tibda fil-familja!
U għalhekk hi hekk importanti l-familja.
L-Iben ta’ Alla tgħallem l-istorja umana
f’din it-triq, u mxieha sa l-aħħar (ara Lhud 2:18; 5:8). Hi ħaġa sabiħa nikkontemplaw
lil Ġesù u s-sinjali ta’ din ir-rabta!
Hu twieled f’familja u hemm “tgħallem id-dinja”: ħanut tax-xogħol,
erbat idjar, nitfa ta’ raħal. Imma,
fit-tletin sena li għex din l-esperjenza, Ġesù għamel
tiegħu l-qagħda umana, u laqagħha fil-komunjoni tiegħu
mal-Missier u fl-istess missjoni appostolika tiegħu. Imbagħad, meta ħalla Nazareth u
beda l-ħajja pubblika tiegħu, Ġesù sawwar madwaru komunità, “ġemgħa”,
jiġifieri grupp ta’ persuni. Din hi
t-tifsira tal-kelma “knisja”.
Fil-Vanġeli, il-ġemgħa ta’
Ġesù għandha l-bixra ta’ familja u ta’ familja li tilqa’, mhux ta’ setta esklussiva, magħluqa: insibu
lil Pietru u Ġwanni, imma wkoll lill-imġewwaħ u l-għatxan,
il-barrani u l-imġarrab, il-midinba u l-pubblikan, il-Fariżej u
l-folol. U Ġesù ma jieqaf qatt
jilqa’ u jitkellem ma’ kulħadd, anki ma’ min m’għadux jistenna
iżjed li ħa jiltaqa’ ma’ Ġesù f’ħajtu. Hi lezzjoni b’saħħitha
għall-Knisja! Id-dixxipli stess
huma magħżula biex jieħdu ħsieb ta’ din
il-ġemgħa, ta’ din il-familja tal-mistednin ta’ Alla.
Biex il-lum tibqa’ ħajja din ir-realtà tal-ġemgħa ta’ Ġesù, bil-fors
hemm bżonn inġeddu l-patt bejn il-familja u l-komunità Nisranija.
Nistgħu ngħidu li l-familja
u l-parroċċa huma żewġ imkejjen li fihom isseħħ
dik il-komunjoni ta’ mħabba li ssib l-għajn aħħarija
tagħha f’Alla nnifsu. Knisja
tabilħaqq skond il-Vanġelu ma jistax ma jkollhiex bixra ta’ dar li tilqa’, bil-bibien miftuħa,
dejjem. Il-knejjes,
il-parroċċi, l-istituzzjonijiet li għandhom il-bibien tagħhom
magħluqa m’għandhomx jissejħu knejjes, għandhom
jissejħu mużewijiet!
U l-lum, dan hu l-patt kruċjali. “Kontra ċ-‘ċentri ta’ poter’
ideoloġiċi, finanzjarji u politiċi, minflok, inqiegħdu
t-tamiet tagħna f’dawn iċ-ċentri ta’ l-imħabba
evanġelizzaturi, għonja fl-imħabba umana, imsejsa fuq
is-solidarjetà u
l-parteċipazzjoni” (Kunsill Pontifiċju
għall-Familja, Gli insegnamenti
di J.M. Bergoglio – Papa Francesco sulla famiglia e sulla vita 1999-2014, LEV 2014, 189), u
anki fil-maħfra ta’ bejnietna.
It-tisħiħ tar-rabta bejn familja u
komunità Nisranija
l-lum
hu indispensabbli u urġenti.
Tassew, hemm bżonn ta’ fidi ġeneruża biex insibu
mill-ġdid l-intelliġenza u l-kuraġġ biex inġeddu dan
il-patt. Il-familji xi kultant
iħarsu lura, għax jaħsbu li m’humiex kapaċi: “Dun,
aħna familja fqira u anki xi ftit imħarbta”, “M’aħniex
kapaċi”, “Diġà għandna ħafna problemi d-dar”,
“M’għandiex saħħa”. Dan
hu veru. Imma ħadd ma
jistħoqqlu, ħadd m’hu kapaċi biżżejjed, ħadd
m’għandu s-saħħa!
Mingħajr il-grazzja ta’ Alla, ma nistgħu nagħmlu
xejn. Kollox hu mogħti lilna,
mogħti b’xejn! U l-Mulej qatt ma
jasal f’familja ġdida bla ma jagħmel xi miraklu. Niftakru x’għamel fit-tieġ ta’
Kana! Iva, il-Mulej, jekk nintelqu
f’idejh, jagħtina li nagħmlu l-mirakli – imma dawk il-mirakli
tal-ħajja ta’ kuljum! – meta hemm il-Mulej preżenti, hemm, f’dik
il-familja.
Naturalment, anki l-komunità Nisranija trid tagħmel il-parti
tagħha. Ngħidu aħna,
tipprova tissupera atteġġjamenti wisq maniġerjali jew wisq
funzjonali, tiffavorixxi d-djalogu interpersonali u l-għarfien u l-istima
reċiproka. Il-familji jieħdu
inizjattivi u jħossu r-responsabbiltà li jaqsmu
d-doni prezzjużi tagħhom mal-komunità. Ilkoll
jeħtieġ nagħrfu li l-fidi Nisranija tingħax fl-għalqa
miftuħa tal-ħajja maqsuma ma’ kulħadd; il-familja u
l-parroċċa jridu jwettqu l-miraklu ta’ ħajja iżjed
komunitarja għas-soċjetà kollha.
F’Kana, kien hemm l-Omm ta’ Ġesù, l-“omm
tal-parir it-tajjeb”. Ejjew
nisimgħu kliemha: “Agħmlu kull ma jgħidilkom hu” (ara Ġw
2:5). Għeżież familji,
għeżież komunitajiet parrokkjali, inħallu lil din l-Omm
tnebbaħna, nagħmlu dak kollu li jgħidilna Ġesù, u nsibu
ruħna mill-ġdid quddiem il-miraklu, il-miraklu ta’ kuljum! Grazzi.
miġjuba mit-Taljan għall-Malti minn
Francesco Pio Attard