IL-PAPA FRANĠISKU
UDJENZA ĠENERALI
Awla Pawlu VI
L-Erbgħa 9 ta’ Awwissu
2017
It-Tama Nisranija
– 30.
Il-maħfra
divina: mutur ta’ tama
Għeżież ħuti, l-għodwa
t-tajba!
Smajnieha r-reazzjoni ta’ dawk li kienu fuq
il-mejda ma’ Xmun il-Fariżew: “Dan
min hu biex jaħfer id-dnubiet ukoll?” (Lq 7:49). Ġesù kien
għadu kemm għamel ġest skandaluż. Mara mill-belt,
magħrufa minn kulħadd bħala midinba, daħlet id-dar
tax-Xmun, niżlet f’riġlejn Ġesù u sawbet fuqhom żejt
ifuħ. Dawk kollha li kienu hemm mal-mejda bdew imaqamqu: jekk Ġesù hu
profeta, m’għandux jilqa’ ġesti ta’ dan it-tip minn mara bħal
dik. Dawk in-nisa, imsejkna, li kienu hemm biss biex tiltaqa’ magħhom
bil-moħbi, anki l-kapijiet, jew inkella biex jiġu
mħaġġra. Skont il-mentalità ta’ dak iż-żmien, bejn il-qaddis
u l-midneb, bejn is-safi u l-imniġġes, il-qasma kellha tkun
ċara.
Imma l-imġiba ta’ Ġesù hi differenti.
Sa mill-bidu tal-ministeru tiegħu fil-Galilija, hu resaq qrib
tal-imġiddmin, l-imxajtnin, il-morda u l-imwarrbin kollha. Imġiba
bħal din xejn ma kienet komuni, tant hu minnu li din is-simpatija ta’
Ġesù għall-imwarrbin, dawk li “ma jista’ jmisshom ħadd”, kienet
waħda mill-affarijiet li l-iżjed ħawdu moħħ in-nies
ta’ żmienu. Hemm fejn hemm persuna qed tbati, Ġesù jerfa’ l-piż
magħha, u dik it-tbatija ssir tiegħu. Ġesù ma jippritkax li
l-qagħda ta’ tbatija wieħed għandu jissaportiha b’eroiżmu,
bħalma kienu tal-fehma l-filosfi Stojċi. Ġesù jaqsam hu
fit-tbatija tal-bniedem, u meta jiġi wiċċ imb wiċċ
miegħu, mill-ġewwieni tiegħu tnixxi dik l-imġiba li
tikkaratterizza l-Kristjaneżmu: il-ħniena. Ġesù, quddiem
it-tbatija tal-bniedem, tiġih ħniena; il-qalb ta’ Ġesù hi
ħanina. Ġesù tiġih ħniena. Litteralment: Ġesù
jħossu jitqanqal minn ġewwa. Kemm drabi fil-vanġeli naraw
reazzjonijiet bħal dawn. Il-qalb ta’ Kristu tinkarna u turi l-qalb ta’
Alla, li hemm fejn hemm raġel jew mara li qed ibatu, irid il-fejqan
tagħhom, il-ħelsien tagħhom, il-ħajja sħiħa
tagħhom.
Għalhekk li Ġesù jiftaħ beraħ dirgħajh għall-midinba. Kemm nies
anki llum ikomplu jippersistu f’ħajja żbaljata għax ma jsibu lil
ħadd li jħares lejhom b’mod differenti, bl-għajnejn, jew
aħjar, bil-qalb ta’ Alla, jiġifieri li jħares lejhom bit-tama. Imma Ġesù jara
possibbiltà ta’ qawmien anki f’min għamel tant għażliet
żbaljati. Ġesù jinsab dejjem hemm, b’qalbu miftuħa; jiftaħ
beraħ dik il-ħniena li għandu f’qalbu; jaħfer,
jgħannaq, jifhem, jersaq qrib: hekk hu magħmul Ġesù!
Xi drabi ninsew li għal Ġesù din ma
kinitx xi mħabba faċli, bi prezz irħis. Il-vanġeli jsemmu
l-ewwel reazzjonijiet negattivi għal Ġesù proprju meta hu ħafer
id-dnubiet ta’ wieħed raġel (ara Mk 2:1-12). Kien bniedem li qed
ibati doppjament: għax ma setax jimxi u għax kien qed iħossu
“fl-iżball”. U Ġesù jifhem li t-tieni tbatija hi ikbar mill-ewwel
waħda, tant li minnufih jilqgħu b’aħbar ta’ ħelsien: “Ibni,
dnubietek maħfura!” (v. 5). Jeħilsu minn dak is-sens ta’ jasar li
jħossu fl-iżball. Hawn xi kittieba – dawk li jaħsbu li huma
perfetti: jiġuni f’moħħi tant Kattoliċi li jħossuhom
perfetti u jżebilħu lill-oħrajn… x’għafsa ta’ qalb, dan… –
xi kittieba li kienu hemm ħassewhom skandalizzati minn dak il-kliem ta’
Ġesù, li jidwu bħal xi dagħwa, għax Alla biss jista’
jaħfer id-dnubiet.
Aħna li mdorrijin induqu l-maħfra
tad-dnubiet, forsi “għal prezz tajjeb” iżżejjed, kultant irridu
niftakru xi prezz swejna lill-imħabba ta’ Alla. Kull wieħed u
waħda minna jiswa biżżejjed: il-ħajja ta’ Ġesù! Hu
kien ikun lest jagħtiha mqar għal wieħed biss minna. Ġesù
ma jitlax fuq is-salib biex ifejjaq il-morda, biex jipprietka l-imħabba,
biex ixandar il-Beatitudnijiet. Bin Alla jitla’ fuq is-salib fuq kollox biex
jaħfer id-dnubiet, għax irid il-ħelsien sħiħ,
definittiv tal-qalb tal-bnedmin. Għax ma jaċċettax li l-bniedem
jaħli ħajtu kollha b’dan it-“tatù” li jibqa’ ma jitħassar qatt,
bil-ħsieb li ma jistax jiġi milqugħ mill-qalb ħanina ta’
Alla. U b’dawn is-sentimenti Ġesù jiltaqa’ mal-midinbin, magħna
lkoll.
Hekk il-midinbin jiġu maħfura. Mhux
biss iserrħu moħħhom fuq livell psikoloġiku, għax
jiġu meħlusa mis-sens ta’ ħtija. Ġesù jagħmel
iżjed minn hekk: joffri lill-persuni li żbaljaw it-tama ta’ ħajja ġdida. “Imma, Mulej, jiena
ċerċura” – “Ħares ’il quddiem u jien nagħtik qalb
ġdida”. Din hi t-tama li jagħtina Ġesù. Ħajja mmarkata
mill-imħabba. Mattew il-pubblikan isir appostlu ta’ Kristu: Mattew, li hu
traditur ta’ pajjiżu, jisfrutta n-nies. Żakkew, għani korrott –
dan żgur kien imlaħħaq fit-tixħim minn taħt – minn
Ġeriko, jinbidel f’benefattur tal-foqra. Il-mara tas-Samarija, li kellha
ħamest irġiel u issa kienet qed tgħix ma’ ieħor, tisma’ lil
min iwegħedha “ilma ħaj” li jista’ jnixxi għal dejjem fiha (ara
Ġw 4:14). Hekk Ġesù jibdel il-qalb; jagħmel hekk magħna
lkoll.
Nagħmlu sew naħsbu li Alla, bħala
l-ewwel għaġna biex minnha jsawwar il-Knisja tiegħu, ma
għażilx il-persuni li ma kienu jiżbaljaw qatt. Il-Knisja hi
poplu ta’ midinba li jduqu l-ħniena u l-maħfra ta’ Alla. Pietru fehem
iżjed veritajiet fuqu nnifsu meta idden is-serduk, milli mill-isforzi
tiegħu ta’ ġenerożità, li bihom kien ifettaħ sidru,
għax iħossu superjuri għall-oħrajn.
Ħuti, aħna lkoll imsejkna midinba,
fil-bżonn tal-ħniena ta’ Alla li għandu l-qawwa li jibdilna u
jerġa’ jagħtina t-tama, u dan jagħmlu ta’ kuljum. U
jagħmlu! U lil dawk li fehmu din il-verità bażilari, Alla
jagħtihom l-iżjed missjoni sabiħa tad-dinja, jiġifieri
l-imħabba għal ħuthom, u t-tħabbira ta’ ħniena li hu
ma jċaħħad lil ħadd. U din hi t-tama tagħna. Ejja
nimxu ’l quddiem b’din il-fiduċja fil-maħfra, fl-imħabba
ħanina ta’ Ġesù.
miġjuba
mit-Taljan għall-Malti minn Francesco Pio Attard