IL-PAPA
FRANĠISKU
UDJENZA
ĠENERALI
Pjazza
San Pietru
L-Erbgħa
7 ta’ Settembru
2016
28.
Hi l-ħniena li ssalva (ara
Mt 11:2-6)
Għeżież
ħuti, l-għodwa t-tajba!
Smajna silta
mill-Vanġelu ta’ Mattew (11:2-6). LEvanġelista jrid idaħħalna
iżjed fil-fond tal-misteru ta’ Ġesù, biex nifhmu t-tjieba u
l-ħniena tiegħu. L-episodju hu dan li ġej: Ġwanni
l-Battista jibgħat lid-dixxipli tiegħu għand Ġesù –
Ġwanni kien il-ħabs – biex jagħmlulu mistoqsija ċara
ħafna: “Inti huwa dak li għandu jiġi, jew nistennew lil ħaddieħor?” (v. 3). Kien sewwasew fil-mument tad-dalma… Il-Battista
kien qed jistenna bil-ħerqa lill-Messija u fil-predikazzjoni tiegħu
kien fissru bi xbihat qawwija, bħala mħallef li saflaħħar
kien sa jwaqqaf is-saltna ta’ Alla u jsaffi lill-poplu tiegħu, jippremja
lit-tajbin u jikkastiga l-ħżiena. Hu kien jipprietka hekk: “Il-mannara ġa tressqet ma’ għerq is-siġra; u għalhekk, kull siġra li ma tagħmilx frott tajjeb titqaċċat u tinxteħet fin-nar” (Mt 3:10). Issa li Ġesù nieda l-missjoni pubblika
tiegħu bi stil differenti, Ġwanni qed ibati għax sab ruħu
f’dalma doppja: fid-dalma tal-ħabs u ta’ ċella, u fid-dalma tal-qalb.
Ma jifhmux dan l-istil ta’ Ġesù u jrid jaf jekk huwiex dan il-Messija, jew
inkella kellhomx jistennew ieħor.
U t-tweġiba
ta’ Ġesù għall-ewwel donnha ma taqbilx mat-talba tal-Battista.
Fil-fatt Ġesù jgħid: “Morru agħtu lil Ġwanni l-aħbar
ta’ dak li qegħdin tisimgħu u taraw: l-għomja jaraw, iz-zopop
jimxu, il-lebbrużi jfiqu, it-torox jisimgħu, il-mejtin iqumu,
l-Evanġelju jixxandar lill-foqra. Hieni hu min ma jitfixkilx minħabba
fija!” (vv. 4-6). Hawn tidher ċara l-fehma tal-Mulej Ġesù: hu
jwieġeb li hu l-istrument ħaj tal-ħniena tal-Missier, li
joħroġ jiltaqa’ ma’ kulħadd biex iwassal il-faraġ u l-fidwa,
u hekk juri l-ħaqq ta’ Alla. L-għomja, iz-zopop, l-imġiddma,
it-torox, jerġgħu jiksbu d-dinjità tagħhom u ma jibqgħux
imwarrba minħabba fil-mard tagħhom, il-mejtin jerġgħu lura
għall-ħajja, waqt li lill-foqra hi mxandra l-Aħbar it-tajba. U
din issir il-ġabra tal-għemil kollu ta’ Ġesù, li hekk juri b’mod
viżibbli u tanġibbli kif jaħdem Alla nnifsu.
Il-messaġġ
li l-Knisja tirċievi minn dan ir-rakkont tal-ħajja ta’ Kristu hu
ċar ħafna. Alla ma bagħatx lil Ibnu fid-dinja biex jikkastiga
lill-midinbin u lanqas biex jeqred il-ħżiena. Minflok, għand
dawn tasal l-istedina għall-konverżjoni biex, meta jaraw is-sinjali
tat-tjieba divina, jerġgħu jsibu t-triq lura. Kif jgħid is-Salm:
“Jekk tal-ħtijiet
int tagħti kas, Mulej, Sidi,
min jista’ jżomm sħiħ? Imma għandek hemm il-maħfra, biex hekk inqimuk fil-biża’ tiegħek” (130:3-4).
Il-ġustizzja
li l-Battista qiegħed fil-qalba tal-predikazzjoni tiegħu, f’Ġesù
tidher qabelxejn bħala ħniena. U d-dubji tal-Prekursur ma
jagħmlu xejn għajr idewquna minn qabel l-istagħġib li iktar
tard Ġesù kellu jqanqal bl-għemil u l-kliem tiegħu. Allura
nifhmu għaliex Ġesù jagħlaq hekk it-tweġiba tiegħu.
Jgħid: “Hieni
hu min ma jitfixkilx minħabba fija!” (v. 6). Li wieħed jieħu skandlu jfisser
“jitfixkel”. Ġesù għalhekk iwissi dwar periklu partikulari: jekk dak
li qed ifixkel lil min jemmen huma fuq kollox l-għemejjel tiegħu ta’
ħniena, dan ifisser li dak li jkun għandu idea falza tal-Messija.
Imma henjin dawk li, quddiem il-ġesti u l-kliem ta’ Ġesù, jagħtu
glorja lill-Missier li hu fis-Smewwiet.
It-twissija ta’
Ġesù hi dejjem attwali: anki llum il-bniedem joħloq xbihat ta’ Alla
li jżommuh milli jiggosta l-preżenza reali tiegħu. Xi wħud
joħolqu għalihom fidi “agħmilha int” li tirriduċi lil Alla
fl-ispazju limitat tax-xewqat u l-konvinzjonijiet tagħhom. Imma din il-fidi
mhix konverżjoni lejn il-Mulej li jirrivela ruħu, anzi,
iżżommu milli jipprovoka l-ħajja u l-kuxjenza tagħna.
Oħrajn jirriduċu lil Alla għal idolu falz: jużaw l-isem
qaddis tiegħu biex jiġġustifikaw l-interessi tagħhom jew
saħansitra l-mibegħda u l-vjolenza. Għal oħrajn Alla hu
biss post ta’ kenn psikoloġiku fejn iħossuhom imqawwija fil-mumenti
iebsin: din hi fidi magħluqa fiha nfisha, li ma tħallix tidħol
il-qawwa tal-imħabba ħanina ta’ Ġesù li tiġbidhom lejn
l-aħwa. Oħrajn iqisu lil Kristu biss bħala mgħallem twajjeb
ta’ tagħlim etiku, wieħed fost ħafna fl-istorja.
Fl-aħħar nett, hemm min jifga l-fidi f’relazzjoni purament ta’
intimità ma’ Ġesù, u jinjora l-qawwa missjunarju tiegħu li
kapaċi tibdel id-dinja u l-istorja. Aħna l-Insara nemmnu f’Alla ta’
Ġesù Kristu, u x-xewqa tagħna hi dik li nikbru fl-esperjenza
ħajja tal-misteru ta’ mħabbtu.
Għalhekk
inħabirku biex ma nqiegħdu l-ebda xkiel għall-għemil
ħanin tal-Missier, imma nitolbuh id-don ta’ fidi kbira biex insiru
aħna wkoll sinjali u strumenti ta’ ħniena.
miġjub mit-Taljan għall-Malti minn
Francesco Pio Attard