UDJENZA
ĠENERALI
Pjazza
San Pietru
L-Erbgħa
6 ta’ Ġunju 2018
Katekeżi
fuq il-Konfirmazzjoni. 3: Biex il-Knisja tikber
Għeżież
ħuti, l-għodwa t-tajba!
Inkomplu
bir-riflessjoni tagħna fuq is-sagrament tal-Konfirmazzjoni, u llum
nagħtu ħarsa lejn l-effetti li d-don tal-Ispirtu s-Santu jwettaq
f’dawk li jirċevuh, sa ma jwassalhom biex isiru, huma wkoll, don
għall-oħrajn. Hu don tal-Ispirtu s-Santu. Niftakru li meta l-Isqof
jagħtina d-dilka biż-żejt, jgħidilna: “Ħu
s-siġill tad-don tal-Ispirtu s-Santu”. Dak id-don tal-Ispirtu s-Santu
jidħol fina u jagħmel il-frott, biex imbagħad aħna
nistgħu nagħtuh lill-oħrajn. Dejjem nirċievu biex
nagħtu: qatt ma nirċievu biex inżommu l-affarijiet ġo fina,
bħallikieku r-ruħ kienet xi maħżen. Le: dejjem nirċievu
biex nagħtu. Il-grazzji ta’ Alla nirċevuhom biex nagħtuhom
lill-oħrajn. Din hi l-ħajja tan-Nisrani. Għalhekk, hu proprju
xogħol l-Ispirtu s-Santu li jċaqlaqna miċ-ċentru tal-jien
tagħna biex jiftaħna għall-“aħna” tal-komunità:
nirċievu biex nagħtu. M’aħniex aħna fiċ-ċentru:
aħna strument ta’ dak id-don għall-oħrajn.
Waqt li
tikkontempla fl-imgħammdin ix-xebh ma’ Kristu, il-Konfirmazzjoni tgħaqqadhom b’qawwa ikbar bħala
membri ħajjin tal-ġisem mistiku tal-Knisja (ara Rit tal-Konfirmazzjoni, n. 25). Il-missjoni
tal-Knisja fid-dinja timxi ’l quddiem bis-sehem ta’ dawk kollha li jagħmlu
parti minnha. Hemm min jaħseb li fil-knisja hemm is-sidien: il-Papa,
l-isqfijiet, is-saċerdoti, u mbagħad hemm l-oħrajn. Le:
il-Knisja hi aħna lkoll! U lkoll għandna r-responsabbiltà li nqaddsu
lil xulxin, li nieħdu ħsieb ta’ xulxin. Il-Knisja hi aħna lkoll.
Kull wieħed u waħda għandu x-xogħol tiegħu fil-Knisja,
imma aħna lkoll aħna l-Knisja. Fil-fatt irridu naħsbu fil-Knisja
bħala organiżmu ħaj, magħmula minn persuni li nafu u li
magħhom nimxu, u mhux bħala realtà astratta u mbiegħda.
Il-Knisja hija aħna li mexjin, il-Knisja hija aħna li llum
qegħdin hawn fil-pjazza. Aħna: din hi l-Knisja. Il-Konfirmazzjoni
torbotna mal-Knisja universali mxerrda mad-dinja kollha, imma billi lil dawk li
rċevew il-Griżma tinvolvihom b’mod attiv fil-ħajja tal-Knisja
partikulari li minnha jagħmlu parti, bl-Isqof fir-ras tagħha, li hu
s-suċċessur tal-Appostli.
U għalhekk l-Isqof hu l-ministru oriġinarju tal-Konfirmazzjoni (ara Lumen gentium, 26), għax hu
jinserixxi lill-ikkonfermat fil-Knisja. Il-fatt li, fil-Knisja Latina, dan
is-sagrament b’mod ordinarju jingħata mill-Isqof, juri li “l-effett
tas-sagrament hu li jgħaqqad lil dawk li jirċevuh b’rabta aktar
qawwija mal-Knisja, mal-bidu tagħha mill-Appostli u mal-missjoni
tagħha li tagħti xhieda għal Kristu” (Katekiżmu tal-Knisja Kattolika, 1313).
U s-sinifikat ta’
din l-inkorporazzjoni fil-Knisja joħroġ tajjeb ħafna fis-sinjal
tal-paċi li jagħlaq ir-rit tad-dilka bil-griżma. Fil-fatt,
l-Isqof jgħid lil kull ikkonfermat: “Il-paċi miegħek”. Waqt li
jfakkru fit-tislima ta’ Kristu lid-dixxipli dakinhar tal-Għid
filgħaxija, mimlija bl-Ispirtu s-Santu (ara Ġw 20:19-23) – kif smajna
–, dawn il-kelmiet idawlu ġest li “jfisser u juri l-għaqda fil-Knisja
mal-isqof u mal-Insara kollha” (ara KKK,
1301). Aħna, fil-Griżma, nirċievu l-Ispirtu s-Santu u
l-paċi: dik il-paċi li rridu nagħtu lill-oħrajn. Imma
naħsbu ftit: kull wieħed jaħseb fil-komunità parrokkjali
tiegħu, ngħidu aħna. Hemm iċ-ċerimonja
tal-Griżma, u mbagħad nagħtu l-paċi lil xulxin: l-Isqof
jagħtiha lil min irċieva d-dilka, u mbagħad fil-quddiesa,
nagħtuha lil xulxin. Dan ifisser armonija, ifisser imħabba bejnietna,
ifisser paċi. Imma mbagħad x’jiġri? Noħorġu u nibdew
inzekzku fuq l-oħrajn, “inqaxxru” lill-oħrajn. Jibda t-tqassis. U
t-tqassis hu gwerra. Dan mhux sew! Jekk aħna rċivejna s-sinjal
tal-paċi bil-qawwa tal-Ispirtu s-Santu, irridu nkunu rġiel u nisa ta’
paċi, u mhux neqirdu, bi lsienna, il-paċi li niseġ l-Ispirtu
s-Santu. Imsejken Spirtu s-Santu, x’biċċa xogħol għandu
magħna, b’dan il-vizzju tat-tqassis! Aħsbu sew: it-tqassis u z-zekzik
mhuwiex opra tal-Ispirtu s-Santu, mhuwiex opra tal-għaqda tal-Knisja.
It-tqassis jeqred dak li jagħmel Alla. Imma nitlobkom: ejja nieqfu nqassu
fuq xulxin!
Il-Konfirmazzjoni
nirċevuha darba waħda biss, imma d-dinamiżmu spiritwali mqanqal
mid-dilka mqaddsa jibqa’ fiż-żmien. Ma nieqfu qatt inwettqu l-mandat
li nxerrdu ma’ kullimkien il-fwieħa t-tajba ta’ ħajja qaddisa, imnebbħa
mis-sempliċità affaxxinanti tal-Vanġelu.
Ħadd ma
jirċievi l-Konfirmazzjoni għalih innifsu biss, imma biex jikkopera
fit-tkabbir spiritwali tal-oħrajn. Hekk biss, billi ninfteħu u
noħorġu minna nfusna biex niltaqgħu mal-aħwa, li
nistgħu tabilħaqq nikbru u mhux biss naħsbu li qed nikbru. Fil-fatt,
dak li nirċievu b’don ta’ Alla għandu jingħata – id-don
qiegħed biex jingħata – biex jagħmel il-frott, u mhux jindifen
minħabba biżgħat egoistiċi, kif nitgħallmu
mill-parabbola tat-talenti (ara Mt 25:14-30). Anki ż-żerriegħa,
meta jkollna ż-żerriegħa f’idejna, din mhix qiegħda biex
nixħtuha hemm, fuq l-ixkaffa, u nħalluha hemm: qiegħda biex
niżirgħuha. Id-don tal-Ispirtu s-Santu rridu nagħtuh
lill-komunità. Inħeġġeġ lil dawk li rċevew
il-Griżma biex ma jżommux lill-Ispirtu s-Santu f’“gaġġa”,
biex ma jagħmlux reżistenza għar-Riħ li jonfoħ biex
jimbuttahom ħalli jimxu b’libertà, u ma jifgawx in-Nar imkebbes
tal-imħabba li jwassalhom biex jagħtu ħajjithom għal Alla u
għal ħuthom. Jalla l-Ispirtu s-Santu jagħti lilna lkoll
il-kuraġġ appostoliku li nwasslu l-Vanġelu, bl-għemil u
bil-kliem, lil dawk kollha li magħhom niltaqgħu fi triqitna.
Bl-għemil u bil-kliem, imma bil-kliem it-tajjeb: dak li jibni. Mhux
il-kliem tat-tpaċpiċ u z-zekzik li jeqred. Nitlobkom, meta
toħorġu mill-knisja, aħsbu kif il-paċi li rċivejtu
qiegħda hemm biex tagħtuha lill-oħrajn: mhux biex teqirduha
biz-zekzik. Tinsewhx dan.
miġjuba mit-Taljan għall-Malti minn
Francesco Pio Attard