IL-PAPA FRANĠISKU
UDJENZA ĠENERALI
Awla Pawlu VI
L-Erbgħa 5 ta’ Awwissu 2015
Il-Familja – 21. Familji miġruħa (II)
Għeżież ħuti, l-għodwa
t-tajba!
B’dik il-katekeżi qed nerġgħu
naqbdu r-riflessjoni tagħna fuq il-familja. Wara li l-aħħar darba tkellimt fuq
il-familji miġruħa minħabba fin-nuqqas ta’ ftehim bejn
il-miżżewġin, il-lum nixtieq li nixħtu l-attenzjoni
tagħna fuq realtà oħra: kif nieħdu ħsieb ta’ dawk
li, wara l-falliment irriversibbli tar-rabta taż-żwieġ
tagħhom, daħlu f’rabta ġdida.
Il-Knisja taf tajjeb li sitwazzjoni bħal
din tmur kontra s-Sagrament Nisrani.
Madankollu, il-ħarsa tagħha ta’ għalliema
ħierġa dejjem mill-qalb ta’ omm; qalb li, imħeġġa
mill-Ispirtu s-Santu, tfittex dejjem il-ġid u s-salvazzjoni
tal-persuni. Għalhekk hi
tħossha fid-dmir, “bi mħabba lejn il-verità”, li “tgħarbel sew is-sitwazzjonijiet”. Hekk esprima ruħu San Ġwanni Pawlu
II, fl-Eżortazzjoni appostolika Familiaris
consortio (nru 84), u ġab bħala eżempju d-differenza bejn
min ġarrab is-separazzjoni u min ipprovokaha. Jeħtieġ li wieħed jagħmel
dan id-dixxerniment.
Jekk imbagħad inħarsu lejn dawn
ir-rabtiet ġodda bl-għajnejn ta’ l-ulied ċkejknin – u
ċ-ċkejknin jaraw –, bl-għajnejn tat-tfal, iżjed u
iżjed naraw l-urġenza li niżviluppaw fil-komunitajiet
tagħna mod veru ta’ kif nilqgħu l-persuni li għaddejjin minn
sitwazzjonijiet bħal dawn.
Għalhekk importanti li l-istil tal-komunità, il-lingwaġġ
tagħha, l-imġibiet
tagħha, ikunu dejjem attenti għall-persuni, ibda miċ-ċkejknin.
Dawn huma dawk li jbatu l-iktar, f’dawn is-sitwazzjonijiet. Mill-bqija, kif nistgħu ngħinu lil dawn il-ġenituri biex jagħmlu minn
kollox ħalli jedukaw lil uliedhom
għall-ħajja Nisranija,
jagħtuhom l-eżempju
ta’ fidi konvinta u pprattikata, jekk inżommuhom imbegħdin
mill-ħajja tal-komunità,
qishom kienu skomunikati? Għandna
nħabirku biex ma nżidux toqol ieħor ma’ dak li l-ulied, f’dawn
is-sitwazzjonijiet, diġà qed
ikollhom iġorru! Sfortunatament,
l-għadd ta’ dawn it-tfal u adolexxenti hu tassew kbir. Importanti li huma jħossu lill-Knisja
bħala omm attenta għal kulħadd, dejjem lesta biex
tismagħhom u tiltaqa’ magħhom.
Fil-verità, f’dawn l-aħħar għaxriet
tas-snin il-Knisja la kienet qalbha magħluqa u lanqas żammet
lura. Grazzi għat-tiftix fil-fond
li għamlu r-Ragħajja, immexxi u mwettaq mill-Predeċessuri
tiegħi, kiber tabilħaqq l-għarfien li hemm bżonn
nilqgħu bħal aħwa u b’qalb attenta, fl-imħabba u fil-verità,
lil dawk l-imgħammda li qegħdin f’konvivenza ġdida wara li
ż-żwieġ sagramentali tagħhom falla; fil-fatt, dawn
il-persuni m’huma xejn affattu skomunikati: m’humiex skomunikati!, u
assolutament m’għandhomx jiġu ttrattati bħala tali: huma dejjem
jagħmlu parti mill-Knisja.
Il-Papa Benedittu XVI tkellem fuq din
il-kwistjoni, u sejjaħ għal dixxerniment attent u tisħib
pastorali għaref, għax kien jaf li ma teżisti l-ebda
“riċetta sempliċi” (Diskors
fis-VII Laqgħa Dinjija tal-Familji, Milan, 2 ta’ Ġunju 2012,
tweġiba nru 5).
Minn hawn l-istedina mtennija tar-Ragħajja
biex juru b’mod miftuħ u koerenti d-disponibbiltà tal-komunità li tilqagħhom u
tagħmlilhom il-qalb, biex jgħixu u jrawmu dejjem iżjed
l-appartenenza tagħhom għal Kristu u għall-Knisja bit-talb,
bis-smigħ tal-Kelma ta’ Alla, bis-sehem ta’ sikwit fil-liturġija,
bl-edukazzjoni Nisranija ta’ l-ulied, bil-karità u s-servizz lill-foqra, bl-impenn
għall-ġustizzja u l-paċi.
L-ikona Biblika tar-Ragħaj it-Tajjeb
(Ġw 10:11-18) tiġbor il-missjoni kollha li Ġesù rċieva minn
għand il-Missier: dik li jagħti ħajtu għan-nagħaġ
tiegħu. Din l-imġiba hi mudell
ukoll għall-Knisja, li tilqa’ lil uliedha bħal omm li tagħti
ħajjitha għalihom. “Il-Knisja
hi msejħa tkun id-dar miftuħa tal-Missier […]”. – L-ebda
bieb magħluq! Xejn bibien
magħluqa! – “Kulħadd jista’
b’xi mod jieħu sehem fil-ħajja tal-Knisja, kulħadd jista’ jagħmel parti mill-komunità. Il-Knisja […] hi d-dar tal-Missier fejn hemm post għal kulħadd, kull wieħed bil-ħajja iebsa tiegħu”
(Eżortazzjoni appostolika Evangelii
gaudium, nru 47).
Bl-istess mod l-Insara kollha msejħin
jixbhu lir-Ragħaj it-Tajjeb. Fuq
kollox il-familji Nsara jistgħu jikkollaboraw miegħU biex jieħdu
ħsieb tal-familji miġruħa, huma u jseħbuhom fil-ħajja
tal-fidi tal-komunità. Kulħadd
jagħmel il-parti tiegħu u jagħmel tiegħu l-imġiba
tar-Ragħaj it-Tajjeb, li jaf lil kull waħda min-nagħġiet
tiegħu u lil ħadd ma jħalli barra mill-imħabba tiegħu
bla tarf!
miġjuba
mit-Taljan għall-Malti minn Francesco Pio Attard