IL-PAPA
FRANĠISKU
UDJENZA
ĠENERALI
Pjazza San Pietru
L-Erbgħa 5 ta’ Frar 2014
Għeżież ħuti, l-għodwa t-tajba!
Il-lum sa nkellimkom dwar l-Ewkaristija.
L-Ewkaristija, flimkien mal-Magħmudija u l-Konfirmazzjoni, tinsab
fil-qalba ta’ l-“inizjazzjoni Kristjana” u hi l-għajn tal-ħajja
tal-Knisja. Minn dan is-Sagrament ta’
mħabba, fil-fatt, toħroġ kull mixja awtentika ta’ fidi, ta’
komunjoni u ta’ xhieda.
Dak li nilmħu quddiemna meta ninġabru biex niċċelebraw
l-Ewkaristija, il-Quddiesa, diġà jġagħilna naħsbu fuq dan
li nkunu ħa ngħixu.
Fiċ-ċentru ta’ l-ispazju maħsub
għaċ-ċelebrazzjoni nsibu l-altar, li hu mejda, miksija bi
tvalja, u dan ifakkarna f’ikla. Fuq
il-mejda hemm salib, biex ifakkarna li fuq dak l-altar jiġi offrut
is-sagrifiċċju ta’ Kristu: Hu l-ikel spiritwali li ħa
nirċievu hemm, taħt is-sinjali tal-ħobż u ta’ l-inbid. Maġenb l-altar hemm l-ambone,
jiġifieri l-post li minnu titħabbrilna l-Kelma ta’ Alla: u dan juri
li madwaru ninġabru biex nisimgħu lill-Mulej li jitkellem permezz ta’
l-Iskrittura Mqaddsa, u għalhekk l-ikel li sa nirċievu hu anki
l-Kelma tiegħu.
Kelma u Ħobż fil-Quddiesa jsiru ħaġa waħda,
bħal fl-Aħħar Ċena, meta l-kliem kollu ta’ Ġesù,
is-sinjali kollha li għamel, inġabru flimkien fil-ġest tal-qsim
tal-ħobż u ta’ l-offerta tal-kalċi, antiċipazzjoni
tas-sagrifiċċju tas-salib, u f’dawk il-kelmiet: “Ħudu u kulu,
dan hu ġismi… Ħudu u ixorbu,
dan hu demmi”.
Il-ġest li Ġesù wettaq fl-Aħħar Ċena hu
l-ogħla radd il-ħajr lill-Missier għal imħabbtu,
għall-ħniena tiegħu.
“Radd il-ħajr” bil-Grieg hu “ewkaristija”. U għalhekk dan is-Sagrament
jissejjaħ Ewkaristija: hu l-ogħla radd il-ħajr lill-Missier, li
tant ħabbna li tana lil Ibnu għall-imħabba tagħna. Għalhekk il-kelma Ewkaristija
tiġbor fiha mill-ġdid dak il-ġest kollu, li hu l-ġest ta’
Alla u tal-bniedem flimkien, ġest ta’ Ġesù Kristu, veru Alla u veru
bniedem.
Mela ċ-ċelebrazzjoni ta’ l-Ewkaristija hi wisq aktar minn
sempliċi ikla: hi sewwa sew il-memorjal ta’ l-Għid ta’ Ġesù,
il-misteru ċentrali tas-salvazzjoni.
“Memorjal” ma jfissirx biss tifkira, sempliċi tifkira, imma jfisser
li kull darba li niċċelebraw dan is-Sagrament inkunu nieħdu
sehem fil-misteru tal-passjoni, il-mewt u l-qawmien ta’ Kristu. L-Ewkaristija hi l-quċċata ta’
l-azzjoni ta’ salvazzjoni ta’ Alla: fil-fatt il-Mulej Ġesù, li sar
ħobż maqsum għalina, isawwab fuqna l-ħniena u
l-imħabba kollha tiegħu, hekk li jġedded lil qalbna,
l-eżistenza tagħna u l-mod ta’ kif aħna ninirrelataw miegħU
u ma’ ħutna. Hu għalhekk li
normalment, meta nersqu għal dan is-Sagrament, ngħidu li “ħa
nirċievu t-Tqarbin”, “nitqarbnu”: dan ifisser li bil-qawwa ta’ l-Ispirtu
s-Santu, is-sehem fil-mejda Ewkaristija jgħaqqadna b’mod uniku u profond
ma’ Kristu, u jdewwaqna sa minn issa l-komunjoni sħiħa mal-Missier li
tikkaratterizza l-ikla tas-Sema, fejn mal-Qaddisin kollha għad ikollna
x-xorti li nikkontemplaw lil Alla wiċċ imb’wiċċ.
Għeżież ħbieb, qatt ma nistgħu rroddu ħajr
biżżejjed lill-Mulej għad-don li għamlilna
bl-Ewkaristija! Hu don hekk kbir u
għalhekk hu tant importanti mmorru l-Quddiesa nhar ta’ Ħadd. Immorru l-Quddiesa mhux biss biex nitolbu,
imma biex nirċievu t-Tqarbin Imqaddes, dan il-ħobż li hu
l-ġisem ta’ Ġesù Kristu li jsalvana, jaħfrilna, jgħaqqadna
mal-Missier. Kemm hi ħaġa
sabiħa li nagħmlu dan! U kull
nhar ta’ Ħadd immorru l-Quddiesa, għax dan hu l-jum propju
tal-Qawmien tal-Mulej. Hu għalhekk
li l-Ħadd hu tant importanti għalina.
U bl-Ewkaristija nħossu li aħna nagħmlu parti
mill-Knisja, mill-Poplu ta’ Alla, mill-Ġisem ta’ Alla, minn Ġesù
Kristu. Qatt m’aħna ħa nkunu
nistgħu ngħidu li fhimna għal kollox il-valur u l-għana
sħiħ ta’ dan kollu. Nitolbuh
għalhekk li dan is-Sagrament ikompli jżomm il-preżenza
tiegħu ħajja fil-Knisja u jagħġen il-komunitajiet
tagħna fl-imħabba u fil-komunjoni, skond il-qalb tal-Missier. U dan nagħmluh tul ħajjitna kollha,
imma nibdew nagħmluh nhar l-ewwel Tqarbina. Importanti li t-tfal jitħejjew tajjeb
għall-ewwel Tqarbina u li kull tifel u tifla jagħmluha, għax,
wara l-Magħmudija u l-Griżma, dan hu l-ewwel pass f’din
l-appartenenza qawwija għal Ġesù Kristu.
miġjuba mit-Taljan
għall-Malti minn Francesco Pio Attard