IL-PAPA FRANĠISKU
UDJENZA ĠENERALI
Pjazza
San Pietru
L-Erbgħa
4 ta’ Novembru 2015
Il-Familja – 31. Aħfer il-ħtijiet
Għeżież
ħuti, l-għodwa t-tajba!
L-Assemblea
tas-Sinodu ta’ l-Isqfijiet, li għalqet ftit ilu, irriflettiet fit-tul fuq
il-vokazzjoni u l-missjoni tal-familja fil-ħajja tal-Knisja u
tas-soċjetà ta’ żmienna.
Kienet ġrajja ta’ grazzja.
Fit-tmiem tagħha l-Padri Sinodali għaddewli t-test
tal-konklużjonijiet tagħhom.
Ridt li dan it-test jiġi ppubblikat, biex kulħadd iħossu
qed jieħu sehem fil-ħidma li ratna impenjati flimkien għal
sentejn sħaħ. M’huwiex issa
l-waqt li niflu dawn il-konklużjonijiet, li fuqhom jien stess għad
irrid nimmedita.
Sadattant, imma,
il-ħajja ma tiqafx, b’mod partikulari l-ħajja tal-familji ma
tiqafx! Intom, għeżież familji,
intom dejjem mexjin. U kontinwament
qegħdin diġà tiktbu
fil-paġni
tal-ħajja konkreta l-ġmiel tal-Vanġelu tal-familja. F’dinja li xi drabi tinxef mill-ħajja u
mill-imħabba, intom titkellmu ta’ kuljum fuq id-don kbir li huma
ż-żwieġ u l-familja.
Il-lum nixtieq
nagħfas fuq dan l-aspett: li l-familja hi ġinnasju kbir fejn nitħarrġu fid-don u
fil-maħfra reċiproka li mingħajrha l-ebda mħabba ma
tista’ ttul. Mingħajr ma
ningħataw għal xulxin u mingħajr ma naħfru lil xulxin,
l-imħabba ma tistax tibqa’, ma ttulx.
Fit-talba li Hu stess għallimna – jiġifieri l-Missierna –
Ġesù jgħallimna
nitolbu hekk lill-Missier: “Aħfrilna
dnubietna, bħalma aħna naħfru lil min hu ħati għalina”. U fl-aħħar jikkummenta: “Għax jekk
intom taħfru lill-bnedmin il-ħtijiet tagħhom, Missierkom li hu fis-Smewwiet jaħfer
lilkom ukoll. Imma jekk
intom ma taħfrux lill-bnedmin il-ħtijiet tagħhom, anqas Missierkom ma jaħfer lilkom il-ħtijiet tagħkom”
(Mt 6:12,14-15).
Ma nistgħux ngħixu mingħajr ma naħfru, jew ta’
l-inqas ma nistgħux ngħixu tajjeb, speċjalment fil-familja. Ta’ kuljum nonqsu kontra xulxin. Jeħtieġ nagħrfu dawn
l-iżbalji, li ġejjin mid-dgħufija u l-egoiżmu
tagħna. Imma dak li hu mitlub minna
hu li dlonk indewwu l-ġrieħi li nagħmlu, li nerġgħu
ninsġu minnufih il-ħajtiet li nkun qattajna fil-familja. Jekk nistennew iżżejjed, kollox
isir iżjed diffiċli. U hemm
sigriet sempliċi biex nistgħu nfejqu l-ġrieħi u biex
intaffu l-akkużi. Dan hu: ma
nħallux tintemm il-ġurnata mingħajr ma nitolbu skuża lil
xulxin, mingħajr ma nagħmlu paċi, ir-raġel u l-mara, il-ġenituri
u l-ulied, bejn l-aħwa… bejn il-kunjata u ħtintha! Jekk nitgħallmu nitolbu skuża
mill-ewwel u naħfru lil xulxin, il-ġrieħi jfiqu,
iż-żwieġ jissoda, u l-familja ssir dar dejjem iżjed
b’saħħitha, li kapaċi tirreżisti kull skoss
tal-ħażen żgħir u kbir tagħna. U biex nagħmlu dan m’hemmx bżonn
ta’ diskorsi kbar, imma biżżejjed żegħila:
żegħila u spiċċa kollox u nibdew mill-ġdid. Imma qatt tispiċċaw il-ġurnata
fi gwerra!
Jekk
nitgħallmu ngħixu hekk fil-familja, nagħmlu dan anki barra, kull
fejn inkunu. Faċli nkunu
xettiċi fuq dan. Ħafna – anki
fost l-Insara – jaħsbu li din esaġerazzjoni. Jgħidu: Iva, kliem sabiħ, imma
impossibbli tqiegħdu fil-prattika.
Imma għall-grazzja ta’ Alla m’huwiex hekk. Fil-fatt hu sewwa sew meta nirċievu
l-maħfra ta’ Alla li, min-naħa tagħna, insiru kapaċi
naħfru lill-oħrajn. Għalhekk
Ġesù jridna ntennu dawn il-kelmiet kull darba li ngħidu t-talba tal-Missierna, jiġifieri ta’
kuljum. U huwa indispensabbli li,
f’soċjetà kull tant bla ħniena, ikollna mkejjen, bħalma hi
l-familja, fejn nistgħu nitgħallmu naħfru lil xulxin.
Is-Sinodu
qanqlilna t-tama tagħna anki fuq hekk: il-ħila li naħfru lilna
nfusna u lil xulxin tagħmel parti mill-vokazzjoni u l-missjoni
tal-familja. Il-prattika tal-maħfra
mhux biss issalva lill-familji mill-firda, imma tagħmilhom kapaċi
jgħinu lis-soċjetà
tkun inqas ħażina u inqas kiefra.
Iva, kull ġest ta’ maħfra jsewwi d-dar mix-xquq tagħha u
jsaħħaħ il-ħitan tagħha. Il-Knisja, għeżież familji,
dejjem tinsab qrib tagħkom biex tgħinkom tibnu d-dar tagħkom fuq
il-blat li dwaru tkellem Ġesù.
U ma ninsewx dawn
il-kelmiet li nsibu dritt qabel il-parabbola tad-dar: “F’dak il-jum
ikun hemm ħafna li jgħiduli: ‘Mulej,
Mulej, m’hux f’ismek ħabbarna aħna, u m’hux f’ismek keċċejna x-xjaten u f’ismek għamilna ħafna mirakli?’. Imbagħad
jien ngħidilhom: ‘Lilkom
qatt ma kont nafkom!’” (ara
Mt 7:21-23). Hi kelma qawwija, bla
dubju, li trid iċċaqlaqna u ssejħilna
għall-konverżjoni.
Niżgurakom,
għeżież familji, li jekk għandkom il-ħila timxu dejjem
iżjed b’determinazzjoni fit-triq tal-Beatitudnijiet, u titgħallmu u
tgħallmu l-maħfra lil xulxin, fil-familja kbira kollha tal-Knisja
tikber il-ħila li nagħtu xhieda tal-qawwa tal-maħfra ta’ Alla li
dejjem iġġeddidna.
Min-naħa l-oħra, nistgħu nagħmlu priedki anki
sbieħ ħafna, u forsi anki nkeċċu xi xitan, imma
fl-aħħar il-Mulej ma jagħrafniex bħala dixxipli
tiegħu, jekk ma nkunux urjena l-ħila li naħfru u nħallu
lill-oħrajn jaħfrulna!
Tabilħaqq
il-familji Nsara jistgħu jagħmlu ħafna għas-soċjetà tal-lum, u anki
għall-Knisja. Għalhekk nixtieq
li fil-Ġublew tal-Ħniena l-familji jiskopru mill-ġdid
it-teżor tal-maħfra reċiproka.
Nitolbu li l-familji jkunu dejjem iżjed kapaċi jgħixu u
jibnu toroq konkreti ta’ rikonċiljazzjoni, fejn ħadd ma jħossu
mitluq taħt it-toqol ta’ ħtijietu.
B’dawn il-fehmiet,
ngħidu flimkien: “Missierna, aħfrilna dnubietna, bħalma
aħna naħfru lil min hu ħati għalina”. [Ngħiduha flimkien: “Missierna, aħfrilna
dnubietna, bħalma aħna naħfru lil min hu ħati għalina”].
miġjuba mit-Taljan
għall-Malti minn
Francesco Pio Attard