IL-PAPA
FRANĠISKU
UDJENZA
ĠENERALI
Pjazza
San Pietru
L-Erbgħa
4 ta’ April 2018
Il-Quddiesa
– 15. Riti tal-għeluq
Għeżież
ħuti, l-għodwa t-tajba u l-Għid it-tajjeb!
Illum qed taraw li
hawn il-fjuri: il-fjuri jfissru ferħ, allegrija. F’ċerti postijiet l-Għid
jissejjaħ ukoll “Għid imwarrad”, għax iwarrad Kristu Rxoxt: hu
l-ward il-ġdid; twarrad il-ġustifikazzjoni tagħna; twarrad
il-qdusija tal-Knisja. Għalhekk dan il-ward kollu: hu l-ferħ
tagħna. Il-ġimgħa kollha aħna niċċelebraw
l-Għid, il-ġimgħa kollha. U għalhekk ejjew agħtu lil
xulxin, għal darb’oħra, ilkoll kemm aħna, l-awguri ta’
“l-Għid it-tajjeb”. Ngħidu flimkien: “L-Għid it-tajjeb”, ilkoll!
[iwieġbu: “L-Għid it-tajjeb!”]. Nixtiequ li
nagħtu wkoll l-Għid it-tajjeb – għax kien Isqof ta’ Ruma –
lill-maħbub Papa Benedittu, li qed isegwina fuq it-televiżjoni.
Lill-Papa Benedittu, nagħtuh ilkoll l-Għid it-tajjeb: [jgħidu:
“L-Għid it-tajjeb!”]
U ċapċipa, qawwija.
B’din
il-katekeżi nagħlqu ċ-ċiklu ddedikat lill-Quddiesa, li hi
sewwasew it-tifkira, imma mhux biss it-tifkira storika, għax ngħixu
mill-ġdid il-Passjoni u l-Qawmien ta’ Ġesù. L-aħħar darba
konna wasalna sat-Tqarbin u t-Talba wara t-Tqarbin; wara din it-talba,
il-Quddiesa tagħlaq bil-barka li
jagħtina s-saċerdot u t-tislima
tal-aħħar lill-poplu (ara Ordni
ġenerali tal-Missal Ruman, 90). Kif fetħet bis-sinjal tas-salib,
fl-isem tal-Missier u tal-Iben u tal-Ispirtu s-Santu, hu mill-ġdid f’isem
it-Trinità li tiġi ssiġillata l-Quddiesa, jiġifieri l-azzjoni
liturġika.
Madankollu, nafu
tajjeb li waqt li l-Quddiesa tispiċċa, jibda l-impenn tax-xhieda Nisranija. L-Insara ma jmorrux
il-Quddiesa biex iwettqu dmirhom ta’ kull ġimgħa u mbagħad
jinsew kollox, le. L-Insara jmorru l-Quddiesa biex jieħdu sehem
fil-Passjoni u l-Qawmien tal-Mulej u mbagħad jgħixu iżjed
bħala Nsara: jiftaħ hawn l-impenn tax-xhieda Nisranija.
Noħorġu mill-Knisja biex “immorru fil-paċi” ħa nwasslu
l-barka ta’ Alla fil-ħidmiet ta’ kuljum, fid-djar tagħna, fl-ambjenti
tax-xogħol, qalb it-taħbit tal-belt ta’ din l-art, “insebbħu lill-Mulej
b’ħajjitna”. Imma jekk aħna noħorġu mill-knisja
npaċpċu u ngħidu: “Ara dan, ara dak…”, bi lsienna twil,
il-Quddiesa ma tkunx daħlet fil-qalb tiegħi. Għaliex? Għax
m’iniex kapaċi ngħix ix-xhieda Nisranija. Kull darba li
noħroġ mill-Quddiesa, irrid noħroġ aħjar milli
dħalt, b’iżjed ħajja, b’iżjed qawwa, b’iżjed rieda li
nagħti xhieda Nisranija. Permezz tal-Ewkaristija l-Mulej Ġesù
jidħol fina, fil-qalb tagħna u fil-ġisem tagħna, biex
nistgħu “nħarsu fina l-frott tas-sagrament tat-twelid ġdid li
ħadna, aħna u nistqarru l-fidi” (ara Missal
Ruman, Kolletta tat-Tnejn tal-Ottava tal-Għid).
Miċ-ċelebrazzjoni
għall-ħajja, mela, għax nafu li l-Quddiesa ssib il-milja tagħha
fl-għażliet konkreti ta’ min isir parti mill-misteri ta’ Kristu. Ma
rridux ninsew li aħna niċċelebraw l-Ewkaristija biex
nitgħallmu nsiru rġiel u nisa Ewkaristiċi. Xi jfisser
dan? Ifisser li nħallu lil Kristu jaġixxi fl-opri tagħna:
il-ħsibijiet tiegħu jkunu l-ħsibijiet tagħna, is-sentimenti
tiegħu jsiru tagħna, l-għażliet tiegħu tagħna. U
din hi l-qdusija: il-qdusija Nisranija hi li nagħmlu kif għamel
Kristu. Dan jesprimih preċiż San Pawl, meta jitkellem fuq kif hu
twaħħad ma’ Ġesù, u jgħid hekk: “Issallabt ma’ Kristu. Ngħix,
imma mhux iżjed jien, iżda jgħix fija Kristu. Il-ħajja li
issa ngħix fil-ġisem qiegħed ngħixha bil-fidi fl-Iben ta’
Alla, li ħabbni u ta lilu nnifsu għalija” (Gal 2:19-20). Din hija x-xhieda Nisranija. L-esperjenza ta’ Pawlu
ddawwal lilna wkoll: iktar ma nissagrifikaw l-egoiżmu tagħna,
jiġifieri mmewtu fina dak li jeħodha kontra l-Vanġelu u
l-imħabba ta’ Ġesù, iktar inkunu nagħmlu ġo fina wisa’
ikbar għall-qawwa tal-Ispirtu tiegħu. L-Insara huma rġiel u nisa
li jħallu qalbhom titwessa’ bil-qawwa tal-Ispirtu s-Santu, wara li huma jkunu
rċivew il-Ġisem u d-Demm ta’ Kristu. Ħallu qalbkom titwessa’!
Mhux dawn il-qlub hekk dojoq u magħluqa, żgħar, egoisti, le!
Qlub wiesgħa, qlub kbar, b’ixfqa kbar… Ħallu l-qalb tagħkom
titwessa’ bil-qawwa tal-Ispirtu, wara li tkunu rċivejtu l-Ġisem u
d-Demm ta’ Kristu.
Ladarba
l-preżenza reali ta’ Kristu fil-Ħobż ikkonsagrat ma tiqafx
mal-Quddiesa (ara Katekiżmu
tal-Knisja Kattolika, 1374), l-Ewkaristija tiġi miżmuma fit-tabernaklu għat-Tqarbin tal-morda u
għall-adorazzjoni siekta tal-Mulej preżenti fis-Santissmu Sagrament; fil-fatt,
il-qima Ewkaristika barra mill-Quddiesa, kemm f’għamla privata u kemm
komunitarja, tgħinna biex nibqgħu fi Kristu (ara ibid., 1378-1380).
Għalhekk,
il-frott tal-Quddiesa jrid jikber fil-ħajja tagħna ta’ kuljum.
Nistgħu ngħidu hekk, aħna u ninqdew bl-istess xbieha:
il-Quddiesa hi bħall-ħabba, il-ħabba tal-qamħ li
mbagħad fil-ħajja ta’ kuljum tikber, tikber u timmatura fl-opri
tajba, fl-atteġġjamenti li jagħmluna nixbhu lil Ġesù. Mela
l-frott tal-Quddiesa jrid jikber fil-ħajja ta’ kuljum. Fil-verità, hija u tkabbar l-għaqda tagħna ma’ Kristu,
l-Ewkaristija ġġedded il-grazzja li l-Ispirtu tana
fil-Magħmudija u fil-Konfirmazzjoni, biex ix-xhieda Nisranija tagħna
tkun titwemmen tassew (ara ibid., 1391-1392).
U hija u tkebbes
fil-qlub tagħna l-imħabba divina, l-Ewkaristija x’tagħmel? Tifridna mid-dnub: “Aktar ma
nissieħbu fil-ħajja ta’ Kristu, aktar nimxu ’l quddiem
fil-ħbiberija miegħu, aktar isir diffiċli għalina niksruha
miegħu bid-dnub il-mejjet” (ibid.,
1395).
Jekk nersqu b’mod
regolari għall-Ikla Ewkaristika, din iġġedded,
issaħħaħ u tniżżel iktar fil-fond fina r-rabta
mal-komunità Nisranija li nagħmlu parti minnha, skont il-prinċipju li
l-Ewkaristija tagħmel il-Knisja
(ara ibid., 1396), tgħaqqadna
lkoll.
Fl-aħħar
nett, il-parteċipazzjoni fl-Ewkaristija timpenjana fil-konfront tal-oħrajn, speċjalment tal-foqra,
tedukana biex ngħaddu mill-ġisem ta’ Kristu għall-ġisem ta’
ħutna, li fihom hu qed jistenniena nagħrfuh, naqduh,
inweġġħuh, inħobbuh (ara ibid., 1397).
Aħna u
nġorru t-teżor tal-għaqda tagħna ma’ Kristu f’ġarar
tal-fuħħar (ara 2 Kor 4:7), għandna kontinwament bżonn li
nerġgħu lura lejn l-altar imqaddes, sakemm fil-Ġenna, għad
niggustaw għalkollox l-hena tal-ikla tal-festa tat-tieġ tal-Ħaruf
(ara Apok 19:9).
Irroddu ħajr
lill-Mulej għall-mixja li tana li nagħmlu flimkien biex niskopru
mill-ġdid x’inhi l-Quddiesa, u nħallu tiġbidna lejha b’fidi
mġedda din il-laqgħa vera ma’ Ġesù, li miet u rxoxta
għalina, li hu wieħed minna llum. U jalla ħajjitna tkun dejjem
“twarrad” hekk, bħall-Għid, bil-ward tat-tama, tal-fidi, tal-opri
tajba. Jalla nsibu dejjem il-qawwa għal dan fl-Ewkaristija, fl-għaqda
tagħna ma’ Ġesù. L-Għid it-tajjeb lil kulħadd!
miġjuba mit-Taljan għall-Malti minn
Francesco Pio Attard