IL-PAPA
FRANĠISKU
UDJENZA
ĠENERALI
L-Erbgħa
2 ta’ Mejju 2018
Katekeżi
fuq il-Magħmudija: 4. Għejun ta’ ilma ħaj
Għeżież
ħuti, l-għodwa t-tajba!
Aħna u
nkomplu mexjin fir-riflessjoni tagħna fuq il-Magħmudija, illum
nixtieq nieqaf fuq ir-riti ċentrali, li jsiru biswit il-Fonti
tal-Magħmudija.
Qabelxejn ejjew
inħarsu lejn l-ilma, li fuqu
tiġi msejħa l-qawwa tal-Ispirtu biex ikun jista’ tnissel
mill-ġdid u jġedded (ara Ġw 3:5 u Tit 3:5). L-ilma hu għajn
ta’ ħajja u ta’ ġid, waqt li n-nuqqas tiegħu jwassal għall-mewt
ta’ kull ħajja, kif jiġri fid-deżert; imma l-ilma jista’ jkun
ukoll kawża ta’ mewt, meta jgħarraq bil-mewġ tiegħu jew
b’volum kbir ikaxkar kull ħaġa li jsib quddiemu; fl-aħħar
nett, l-ilma jista’ jaħsel, inaddaf u jsaffi.
Il-Bibbja titlaq
minn dan is-simboliżmu naturali, magħruf universalment, biex tfisser
l-interventi u l-wegħdiet ta’ Alla permezz tas-sinjal tal-ilma.
Madankollu, il-qawwa tal-maħfra tad-dnubiet, kif kien ifisser
Sant’Ambroġ lil dawk li kienu għadhom kemm ġew mgħammda,
mhix qiegħda fl-ilma fih innifsu: “Rajt l-ilma, imma mhux kull ilma
jfejjaq: ifejjaq l-ilma li għandu l-grazzja ta’ Kristu. […] L-azzjoni hi tal-ilma,
imma l-qawwa hi tal-Ispirtu s-Santu” (De sacramentis 1,15).
Għalhekk
li l-Knisja ssejjaħ l-azzjoni tal-Ispirtu s-Santu fuq l-ilma “biex dawk li
fih jirċievu l-Magħmudija, jindifnu ma’ Kristu fil-mewt u miegħu
jqumu mill-ġdid għall-ħajja ta’ dejjem” (Rit tal-Magħmudija tat-trabi, n. 60). It-talba tal-barka
tgħid li Alla ħejja l-ilma “biex ikun sinjal tal-Magħmudija” u
tfakkar il-prefigurazzjonijiet bibliċi: fuq l-ilmijiet tal-bidu kien
jittajjar l-Ispirtu biex jiżra’ l-ħajja (ara Ġen 1:1-2); l-ilma
tad-dilluvju mmarka tmiem id-dnub u l-bidu ta’ ħajja ġdida (ara Ġen
7:6-8,22); bl-ilma tal-Baħar l-Aħmar ulied Abraham ġew
meħlusa mill-jasar tal-Eġittu (ara Eż 14:15-31). F’rabta ma’
Ġesù, niftakru fil-magħmudija fil-Ġordan (ara Mt 3:13-17),
id-demm u l-ilma li gelglu minn ġenbu (ara Ġw 19:31-27), u l-mandat
lid-dixxipli biex jgħammdu lill-ġnus kollha fl-isem tat-Trinità (ara Mt 28:19). Imsaħħin minn din il-memorja, nitolbu lil
Alla jsawwab fl-ilma tal-fonti l-grazzja ta’ Kristu li miet u rxoxta (ara Rit tal-Magħmudija tat-trabi, n.
60). U hekk, dan l-ilma jinbidel f’ilma li jġorr fih il-qawwa tal-Ispirtu
s-Santu. U b’dan l-ilma, bil-qawwa tal-Ispirtu s-Santu, ngħammdu lin-nies,
ngħammdu lill-adulti, lit-trabi, lil kulħadd.
Wara li jiġi
mbierek l-ilma tal-fonti, hemm bżonn niftħu qalbna biex tersaq
għall-Magħmudija. Dan iseħħ biċ-ċaħda tax-Xitan u l-istqarrija tal-fidi, żewġ
azzjonijiet marbutin sfiq bejniethom. Skont kemm ngħid “le”
għat-tħajjir tax-xitan – dak li jifred – inkun kapaċi ngħid
“iva” lil Alla li jsejjaħli biex nitwaħħad miegħu
fil-ħsieb u fl-għemil. Ix-xitan jifred; Alla dejjem jgħaqqad
lill-komunità, lill-bnedmin f’poplu wieħed. Mhux possibbli nsiru nixbhu
lil Kristu jekk nagħmlulu l-kundizzjonijiet. Irridu ninqatgħu minn
ċerti rabtiet biex nistgħu tabilħaqq inħaddnu magħna
oħrajn; jew int sew ma’ Alla, jew int sew max-xitan. Għalhekk
iċ-ċaħda u l-att tal-fidi jmorru flimkien. Irridu nkissru
ċerti pontijiet, nagħtuhom daharna, biex nistgħu naqbdu t-Triq
il-ġdida li hi Kristu.
It-tweġiba
għall-mistoqsijiet – “Tiċħad lix-Xitan, l-għemil kollu
tiegħu, u l-ġibdiet kollha tiegħu għall-ħażen?” –
hi magħmula fl-ewwel persuna singular: “Niċħad”.
U bl-istess mod hi mistqarra l-fidi tal-Knisja, li tgħid: “Nemmen”. Jiena niċħad u jiena
nemmen: hawn għandna l-bażi tal-Magħmudija. Hi għażla
responsabbli, li titlob li tiġi mlaħħma f’ġesti konkreti
ta’ fiduċja f’Alla. L-att ta’ fidi jissupponi impenn li l-istess
Magħmudija tgħinna nżommu b’perseveranza fid-diversi
sitwazzjonijiet u provi tal-ħajja. Niftakru fl-għerf tal-qedem ta’ Iżrael:
“Ibni, jekk tiġi biex taqdi lill-Mulej, ħejji ruħek
għat-tiġrib” (Sir 2:1), mela ħejji ruħek għat-taqbida.
U l-preżenza tal-Ispirtu s-Santu tagħtina l-qawwa biex nitqabdu
tajjeb.
Għeżież
ħuti, meta nbillu subgħajna fl-ilma mbierek – aħna u deħlin
il-knisja mmissu l-ilma mbierek – u nagħmlu s-sinjal tas-Salib fuq
ġbinna, ejjew naħsbu bil-ferħ u l-gratitudni fil-Magħmudija
li rċivejna – dan l-ilma mbierek ifakkarna fil-Magħmudija – u
nġeddu l-“Amen” tagħna – “Jiena kuntent” –, biex ngħixu
mgħaddsa fl-imħabba tat-Trinità Qaddisa!
miġjub mit-Taljan għall-Malti minn
Francesco Pio Attard