IL-PAPA FRANĠISKU
UDJENZA
ĠENERALI
Pjazza San Pietru
L-Erbgħa 2 ta’ April 2014
Għeżież ħuti, l-għodwa t-tajba.
Il-lum qed nagħlqu ċ-ċiklu ta’ katekeżi fuq
is-Sagramenti billi nitkellmu dwar iż-Żwieġ. Dan is-Sagrament iwassalna fil-qalba tal-pjan
ta’ Alla, li hu pjan ta’ patt mal-poplu tiegħu, magħna lkoll, patt
ta’ komunjoni. Fil-ftuħ tal-ktieb
tal-Ġenesi, l-ewwel ktieb tal-Bibbja, bħala kuruna tar-rakkont
tal-ħolqien, jingħad: “U Alla ħalaq il-bniedem fuq xbihietu, fuq xbihat
Alla ħalqu, raġel u mara ħalaqhom… Għalhekk ir-raġel iħalli lil missieru u lil ommu u jingħaqad ma’ martu u jsiru ġisem
wieħed” (Ġen 1:27; 2:24).
Hi l-koppja miżżewġa x-xbieha ta’ Alla: ir-raġel u
l-mara; mhux ir-raġel waħdu, mhux il-mara waħidha, imma t-tnejn
li huma flimkien. Din hi x-xbieha ta’
Alla: l-imħabba, il-patt ta’ Alla magħna jidher f’dak il-patt li jsir
bejn raġel u mara. U din hi
ħaġa wisq sabiħa!
Aħna maħluqin biex inħobbu, bħal mera ta’ Alla u ta’
mħabbtu. U fir-rabta konjugali,
ir-raġel u l-mara jwettqu din is-sejħa fis-sinjal
tar-reċiproċità u tal-komunjoni ta’ ħajja sħiħa u għal
dejjem.
1. Meta raġel u mara jiċċelebraw is-sagrament
taż-Żwieġ, Alla, biex ngħidu hekk, jidher fihom “bħal
f’mera”, inaqqax fihom il-fattizzi tiegħu u l-karattru indelibbli ta’
mħabbtu. Iż-żwieġ hu
l-ikona ta’ l-imħabba ta’ Alla lejna.
Fil-fatt, Alla nnifsu hu komunjoni: it-tliet Persuni tal-Missier, ta’
l-Iben u ta’ l-Ispirtu s-Santu jgħixu sa minn dejjem u għal dejjem
f’għaqda perfetta bejniethom. U hu
propju dan il-misteru taż-Żwieġ: miż-żewġ
għarajjes miżżewġa Alla jagħmel ħajja waħda. Il-Bibbja tuża espressjoni qawwija u
tgħid “ġisem wieħed”, tant hi intima l-għaqda bejn
ir-raġel u l-mara fiż-żwieġ. U hu sewwa sew dan il-misteru
taż-żwieġ: l-imħabba ta’ Alla li tidher fil-koppja li
tagħżel li tgħix flimkien.
Għalhekk ir-raġel iħalli daru, id-dar tal-ġenituri
tiegħu, u jmur jgħix ma’ martu, u tant jintrabat magħha b’mod
qawwi li t-tnejn isiru – tgħidilna l-Bibbja – ġisem wieħed.
2. San Pawl, fl-Ittra lill-Efesin, jagħfas fuq il-misteru kbir li jidher
fl-għarajjes Insara: ir-relazzjoni li waqqaf Kristu mal-Knisja, rabta
taż-żwieġ (ara Efes 5:21-33).
Il-Knisja hi l-għarusa ta’ Kristu.
Din hi r-relazzjoni. Dan ifisser
li ż-Żwieġ iwieġeb għal vokazzjoni speċifika u
għandu jitqies bħala konsagrazzjoni (ara Gaudium et spes, 48; Familiaris
consortio, 56). Hu konsagrazzjoni:
ir-raġel u l-mara huma kkonsagrati fl-imħabba ta’ bejniethom. Fil-fatt, grazzi għas-Sagrament,
l-għarajjes jitlibbsu b’missjoni vera u propja, biex, ibda mill-ħwejjeġ
l-aktar sempliċi u ordinarji, jistgħu jagħmlu viżibbli
l-imħabba li biha Kristu jħobb lill-Knisja tiegħu, u jissokta
jagħti ħajtu għaliha, fil-fedeltà u l-qadi.
Tassew hu
pjan sabiħ dak li hu għandu fin-natura tiegħu s-sagrament
taż-Żwieġ! U jitwettaq
fis-sempliċità u anki fid-dgħufija tal-qagħda umana.
Nafu tajjeb kemm diffikultajiet u provi jħabbtu wiċċhom
magħhom il-miżżewġin…
L-importanti hu li jżommu ħajja r-rabta tagħhom ma’ Alla,
li hi fil-bażi tar-rabta taż-żwieġ. U r-rabta vera dejjem hi mal-Mulej. Meta l-familja titlob flimkien, din ir-rabta
tinżamm sħiħa. Meta
r-raġel jitlob għal martu u l-mara għal żewġha, dik
ir-rabta tissaħħaħ; wieħed jitlob
għall-ieħor. Hu minnu li fil-ħajja
taż-żwieġ hemm tant diffikultajiet, tant; issa x-xogħol,
issa l-flus ma jservux, issa t-tfal bil-problemi. Tant diffikultajiet. U tant drabi r-raġel u l-mara jsiru xi
ftit nervużi u jitlewmu bejniethom.
Jitlewmu, hekk hu, fiż-żwieġ dejjem ikun hemm it-tilwim,
xi drabi jfajru wkoll il-platti. Imma
dan m’għandux isewdilna qalbna, għax din hi l-qagħda umana. U s-sigriet hu li l-imħabba hi aqwa minn
dak il-waqt li fih nitlewmu, u għalhekk jien lill-miżżewġin
nagħtihom dejjem dan il-parir: tagħlqux il-ġurnata li fiha
tlewwimtu bejnietkom mingħajr ma tagħmlu paċi. Dejjem! U biex tagħmlu paċi m’hemmx
bżonn iċċemplu lill-Ġnus Magħquda biex jiġu huma
d-dar ħalli tagħmlu paċi.
Biżżejjed ġest ċkejken, żegħila,
tislima! U nkomplu għada! U għada nibdew mill-ġdid. U din hi l-ħajja, hekk irridu mmexxuha
’l quddiem, nimxu ’l quddiem bil-kuraġġ li rridu ngħixuha
flimkien. U din hi ħaġa kbira,
hi sabiħa! Hi ħaġa
sabiħa wisq il-ħajja taż-żwieġ u rridu dejjem
inħarsuha, inħarsu l-ulied.
Drabi oħra f’din il-Pjazza jiena għidt xi ħaġa li hi
ta’ għajnuna kbira għall-ħajja fiż-żwieġ. Huma tliet kelmiet li għandna
ngħiduhom dejjem, tliet kelmiet li għandhom ikunu dejjem fid-dar
tagħna: jekk jogħġbok, grazzi, skużani. It-tliet kelmiet maġiċi. Jekk
jogħġbok: biex ma nkunux invadenti fil-ħajja
miżżewġa tagħna.
Jekk jogħġbok, imma x’taħseb? Jekk jogħġbok, ippermettili. Grazzi:
tirringrazzja lil martek jew żewġek; grazzi ta’ dak li għamilt
għalija, grazzi ta’ din il-ħaġa.
Il-ġmiel li hemm f’li tgħid grazzi! U billi kollha niżbaljaw, dik il-kelma
l-oħra li hi ftit iebsa biex illissnuha, imma hemm bżonn
ngħiduha: skużani. Jekk jogħġbok, grazzi u
skużani. B’dawn it-tliet kelmiet,
bit-talb tar-raġel u l-mara għal xulxin, billi nagħmlu paċi
dejjem qabel tintemm il-ġurnata, iż-żwieġ jimxi ’l
quddiem. It-tliet kelmiet maġiċi,
it-talba u nagħmlu paċi dejjem.
Il-Mulej iberikkom u itolbu għalija.
miġjuba mit-Taljan
għall-Malti minn Francesco Pio Attard