ĠUBLEW
STRAORDINARJU TAL-ĦNIENA
IL-PAPA
FRANĠISKU
UDJENZA ĠUBILARI
Pjazza
San Pietru
Is-Sibt
20 ta’ Frar
2016
Ħniena
u impenn
Għeżież
ħuti, l-għodwa t-tajba!
Il-Ġublew
tal-Ħniena hu opportunità vera biex nidħlu fil-fond ġewwieni
tal-misteru tat-tjieba u ta’ l-imħabba ta’ Alla. F’dan iż-żmien tar-Randan,
il-Knisja qed tistedinna nsiru nafu dejjem iżjed lill-Mulej Ġesù, u
ngħixu b’mod koerenti l-fidi bi stil ta’ ħajja li jesprimi
l-ħniena tal-Missier. Hu impenn li
aħna msejħin nieħdu biex noffru lil dawk kollha li magħhom
niltaqgħu s-sinjal konkret ta’ kemm Alla hu qrib tagħna. Ħajti, l-imġiba tiegħi, il-mod
kif ngħix għandu jkun sewwa sew sinjal konkret tal-fatt li Alla hu
qrib tagħna. Ġesti
żgħar ta’ mħabba, ta’ ħlewwa, ta’ għożża, li
juru li l-Mulej hu magħna, hu qrib tagħna. U hekk jinfetaħ il-bieb tal-ħniena.
Il-lum nixtieq
fil-qosor nieqaf nirrifletti magħkom fuq it-tema ta’ din il-kelma li
għidt: it-tema ta’ l-impenn. Xi
jkun impenn? U xi jfisser timpenja
ruħek? Meta nimpenja ruħi,
ifisser li nassumi responsabbiltà, naħdem b’riżq xi ħadd; u
jfisser ukoll l-istil, l-atteġġjament ta’ fedeltà u ta’ għotja,
ta’ attenzjoni parikulari li bih inwettaq din il-ħidma. Kull jum hu mitlub minna li nimpenjaw
ruħna fl-affarijiet li nagħmlu: fit-talb, fix-xogħol,
fl-istudju, imma anki fl-isport, fl-attivitajiet tal-ħin liberu… Insomma, nimpenjaw ruħna jfisser
inħaddmu r-rieda tajba tagħna u l-isforzi tagħna biex intejbu
l-ħajja.
Għax anki
Alla impenja ruħu magħna.
L-ewwel impenn tiegħu kien dak li joħloq id-dinja, u minkejja
t-tentattivi tagħna biex nirvinawha – u huma ħafna –, Hu għadu
jimpenja ruħu biex iżommha ħajja. Imma l-ikbar impenn tiegħu kien dak li
tana lil Ġesù. Dan hu l-impenn kbir
ta’ Alla! Iva, Ġesù hu sewwa sew
l-ogħla impenn li Alla ħa magħna. Dan ifakkarhulna wkoll San Pawl meta jikteb
li Alla “lanqas lil Ibnu
stess ma ħafirha, imma tah għalina lkoll” (Rum 8:32). U għalhekk, flimkien ma’ Ġesù, il-Missier
se jagħtina kull ħaġa li għandna bżonn.
U kif deher dan
l-impenn ta’ Alla għalina?
Sempliċi ħafna nikkonfermawh fil-Vanġelu. F’Ġesù, Alla impenja ruħu b’mod
sħiħ biex irodd it-tama lill-foqra, lil dawk li kienu
mċaħħda mid-dinjità, lill-barranin, lill-morda,
lill-ħabsin, u lill-midinbin li kien jilqa’ b’tant tjieba. F’dan kollu, Ġesù kien espressjoni
ħajja tal-ħniena tal-Missier.
U nixtieq ngħid dan: Ġesù kien jilqa’ lill-midinbin bi tjieba
kbira. Jekk aħna naħsbu b’mod
uman, il-midneb suppost hu għadu ta’ Ġesù, għadu ta’ Alla, imma
Hu resaq lejhom bi tjieba, ħabbhom u bidlilhom qalbhom. Aħna lkoll midinbin: kollha kemm
aħna! Kollha għandna xi
ħtija quddiem Alla. Imma ma rridux
naqtgħu qalbna: Hu jersaq lejna propju biex ifarraġna, jagħtina
l-ħniena u l-maħfra tiegħu.
Dan hu l-impenn ta’ Alla u għalhekk hu bagħat lil Ġesù:
biex jersaq qrib tagħna, tagħna lkoll u jiftħilna l-bieb ta’
mħabbtu, ta’ qalbu, tal-ħniena tiegħu. U din hi ħaġa sabiħa
ħafna. Sabiħa ħafna!
Fuq ix-xempju ta’
din l-imħabba ħanina li biha Ġesù esprima l-impenn ta’ Alla,
anki aħna nistgħu u għandna nikkorrispondu għal
imħabbtu bl-impenn tagħna. U
dan fuq kollox fis-sitwazzjonijiet ta’ l-ikbar bżonn, fejn hemm l-aktar
għatx għat-tama. Naħseb –
ngħidu aħna – fl-impenn tagħna mal-persuna mitluqa, ma’ dawk li
għandhom diżabbiltajiet iebsin ħafna, mal-morda serjament,
mal-moribondi, ma’ dawk li ma jistgħux jesprimu r-rikonoxxenza
tagħhom… F’dawn ir-realtajiet
kollha aħna nwasslu l-ħniena ta’ Alla permezz ta’ impenn
fil-ħajja tagħna, li hu xhieda tal-fidi tagħna fi Kristu. Dejjem għandna nwasslu dik
iż-żegħila ta’ Alla – għax Alla mellisna lkoll
bil-ħniena tiegħu – inwassluha lill-oħrajn, lil dawk li
għandhom bżonnha, lil dawk li qed iġorru xi tbatija fil-qalb
tagħhom jew huma mdejqin: nersqu b’dik iż-żegħila ta’ Alla,
li hi l-istess waħda li Hu ta lilna.
Jalla dan
il-Ġublew jgħin lil moħħna u lil qalbna biex imissu
b’idejhom l-impenn li Alla ħa għal kull wieħed u waħda
minna, u hekk jista’ jibdel il-ħajja tagħna f’impenn ta’ ħniena
għal kulħadd.
miġjuba mit-Taljan għall-Malti minn
Francesco Pio Attard