(Padre Lombardi)
Missier Qaddis, grazzi talli ġejt isselmilna fil-bidu ta’ dan il-vjaġġ. Nawgurawlek. Nafu li dan hu vjaġġ impenjattiv kemm minħabba l-post fejn sejrin kif ukoll minħabba r-relazzjonijiet ekumeniċi u r-relazzjonijiet inter-reliġjużi. Minnu li hu vjaġġ qasir imma hu intens ħafna u importanti. Aħna se nkunu miegħek bit-talb, bl-attenzjoni u bis-sostenn tagħna mill-aħjar li nistgħu għax xogħolna hu li ninfurmaw. Qiegħdin numru mhux ħażin: f’did-titjira hawn 65 li jirrappreżentaw diversi pajjiżi, media differenti, bħas-soltu ftit taħlita li tipprova tagħti każ kemm tal-media kif ukoll tal-lingwi eċċetra. Hawn ħafna nies li inti tafhom diġà, li fedelment isegwu dawn il-vjaġġi. Għandna magħna wkoll żewġ Torok: is-Sinjura Esma Cakir, li qed issellimlek bit-tixjir ta’ jdejha u s-Sinjura Yasemin Taskin, li qed ssellimlek ukoll, li mbagħad ikunu jistgħu jagħmlulek xi mistoqsijiet, waqt il-vjaġġ tar-ritorn, naturalment.
Imma dalgħodu għandna okkażjoni ta’ festa wkoll: hawn wieħed minna, li hu mistoħbi hemm wara, li llum jagħlaq 62 sena. Illum għeluq sninu: Jean Louis de La Vaissière, u aħna, flimkien miegħek, nawgurawlu.
U issa, naturalment, ngħaddilek il-mikrofonu jekk int trid tgħidilna xi ħaġa.
(Il-Papa Franġisku)
Il-ġurnata t-tajba. Intikom merħba u nirringrazzjakom tal-kumpanija waqt dan il-vjaġġ għax xogħolkom hu sapport, għajnuna u anki servizz lid-dinja: servizz lid-dinja biex twasslu l-aħbarijiet ta’ din l-attività reliġjuża u umanitarja, għax bħalissa, it-Turkija hija xhieda u toffri għajnuna lil tant refuġjati mill-inħawi fejn hemm il-kunflitti. Nirringrazzjakom ta’ dan is-servizz. Nerġgħu niltaqgħu fil-vjaġġ lura għall-konferenza stampa. Grazzi ħafna u l-ħidma t-tajba.
(Padre Lombardi)
Grazzi ħafna, Santità. U l-vjaġġ it-tajjeb. Se nkunu qed insegwuk b’attenzjoni kbira. Fuq vjaġġ bħal dan, il-preżenza waqt it-titjira hija importanti ħafna għax hemm żewġ tappi li fihom prattikament, dawn se jkunu l-uniċi ġurnalisti li se jkunu preżenti kemm f’Ankara u anki f’Istanbul biex isegwu mill-qrib il-vjaġġ tiegħek. Għalhekk se jkollhom rwol importanti ħafna bħala informaturi u jixtiequ jiżgurawk li se jagħmlu ħilithom biex jikkollaboraw mal-ministeru tiegħek. Grazzi, Santità u l-vjaġġ it-tajjeb.
Miġjub għall-Malti mit-Taljan minn Joe Huber